٤ خطوات للتخلص من داء السعي للكمال - Perfectionism

في يوم جمعة من شهر اكتوبر سنة ٢٠١٣ كنت باتغدى مع زوجي العزيز في النادي. الولاد كانوا في تمارين رياضية، واحتا بنتغدى لوحدنا. اللي يشوفنا من بره يقول يادي الهنا، عصفورين في حالة انسجام. الواقع كان مختلف جدًا عن الصورة الخارجية. واحنا بناكل، بدأت اتكلم مع جوزي، وبدأ صوتي يتحشرج.. بدأت دموعي تنزل.. وقلت جملة لعبت دور محوري في حياتي وحياة ناس كتير بعد كده لأني بعد ما لاقيت مساعدة في لحظة مظلمة، قررت اتحول لتقديم المساعدة. 

الجملة كانت ببساطة بتتكون من ٥ كلمات: ”أنا مش قادرة أكمل الحياة..“

جوزي طبعًا كان ممكن يفتكر إني باهزر، لو ماكنش صوتي متحشرج ولا دموعي على خدي.. ورده وهو كان متفاجئ:“ليه كده؟ ايه اللي حصل؟“

اللي حصل كان قشة قسمت ظهر البعير.. كان إني فضلت اضغط عليا لحد ما وصلت إني مش قادرة اكمل الحياة. اضغط عليا بطريقة تفكير سامة اسمها ”السعي للكمال Perfectionism“. توقعاتي من نفسي إني أكون ١٠٠٪ في كل حاجة. في البيت كزوجة وكأم. في الشغل كمُدرسة وكقائد وكزميلة، في الحياة كبنت وأخت صديقة.. إني أكون أنا كمان ١٠٠٪ في وزني وأخلاقي وردود أفعالي وطريقة لبسي ومظهري… والنتيجة إني فضلت اضغط عليا لحد ما قلت الجملة المحورية بتاعت مش قادرة اكمل الحياة.

من الموقف ده ومن اليوم ده، حياتي أخدت سكة تانية خالص. بدأت بإني من قمة الألم روحت مكتبة ادور علي كتاب في رف ال Self-Help. وفي ايدي وقع كتاب اسمه .Be Happy Without Being Perfect وأثناء قراءتي للكتاب كوتش زميلتي ساعدتني احط ايدي علي اول طرف للخيط.. إني باعاني من طريقة تفكير اسمها السعي للكمال.. وإني عندي تشوه فكري.. بيقول ياكون ١٠٠٪ يا ”أنا ولا حاجة“. 

من خلال الكتاب وجلساتي مع الكوتش اتعلمت حاجات مختلفة، من أهمها:

١- إني ممكن أفكر بطريقة مختلفة. أولها إني افصل نفسي عن اللي باعمله. يعني لو عملت حاجة وطلعت مش هايلة، مش معنى كده إني أنا نفسي مش شاطرة.. معناها اني محتاجة اتعلم اكتر علشان احسن الحاجة.. اتطور علشان اطور الطريقة. 

٢- إني إنسان غير كامل و إن الكمال لله وحده. واني سعيي للكمال سعي باطل، زي اللي بيدور على المياه في الصحراء.. كل ابن آدم خطاء.. ومفيش إنسان كامل.. وبالتالي أنا لما بسعى للكمال بسعى لهلاكي..

٣- إني ابطل تعميم..واراجع توقعاتي.. يعني ما اتوقعش من نفسي إني أكون ١٠٠٪ في كل حاجة.. لأ.. احدد ايه اللي عايزة أكون متميزة فيه..(مش كاملة ولا مثالية فيه). إني احدد حاجات معينة، مهمة ليا ومتناسبة مع قيمي واهدافي في الحياة ورسالتي الشخصية.. وهي دي اللي اسعى إني اتطور فيها واتحسن فيها وابقى في حالة تقدم.. وابطل أفكر إني ”لازم“ أكون شاطرة في كل حاجة.

بعد الكتاب والجلسات بدأت اركز في طريقة تفكيري.. ولأني مؤمنة إن To do better we need to know better، يعني علشان نتصرف احسن محتاجين نعرف ونتعلم احسن، النتيجة كانت إني بدأت اتفرج على فيديوهات على اليوتيوب لناس ملهمة جدًا.. اتعلم منهم ازاي ابقى احسن في التفكير وفي الحياة. منهم كانت ليزا نيكولز، متحدثة أمريكية شهيرة، جملة لها نورت لي لمبة كبيرة جدًا.. قالت فيها إن مش دورنا إننا نسعى للكمال.. دورنا إننا ندير نفسنا بكل سلاطتها وباباغنوجها بطريقة مثالية تساعدنا نوصل لأحسن نتيجة.. (السلاطة ولاسباب غنوج دول تحابي من عندي على كلامها :)). هي قالت حرفيًا: ”.I am perfect in managing my imperfection“

من فيديوهات ليزا وناس مختلفة زي Les Brown و Steven Harvey بدأت اركز فيا كإنسان، في سعي إنه يقود نفسه.. بدأت اصنف حياتي ل ٣ اجزاء:

١- جزء انا عايزة فعلًا اتطور فيه واوصل لدرجة إني أكون متميزة فيه 

٢- جزء أنا بواجه صعوبة فيه إنما محتاجة له في حياتي وبالتالي محتاجة مساعدة

٣- جزء تالت مش فارق معايا وبالتالي هتقبل ان قدراتي ضعيفة فيه وولا هسعى إني اتطور فيه ولا هطلب مساعدة فيه 

الجزء الأول زي قيادة مشاريع خدمة مجتمع أو بناء قادة جدد أو تقديم ورش تدريب..

الجزء التاني زي المهارات التكنولوجيا أو الالتزام بنظام رياضي أو بنظام غذائي..

الجزء التالت زي الطبيخ مثلًا أو إني اتكلم فرنساوي :) 

ازاي تتخلص من السعي للكمال في ٤ خطوات 

١- فكر نفسك إن الكمال لله وحده وإن انت ”إنسان“ 

٢- افتكر إن مفيش اي حد كامل مهما ظهر لك أو تخيلت إنه كامل 

٣- اسعى إنك تتعلم تدير نفسك بكل نواقصها بطريقة توصلك لأحسن نتيجة ممكنة

٤- حدد المجالات اللي نفسك فعلًا تكون متميز فيها وهي دي اللي اتحرك بجد وحب إنك تتميز فيها 

قيادة الذات وال Acceptance         

موقف/Attitude محوري ومهم جدًا إنه يكون عند الإنسان اللي بيقود ذاته انه يكون عنده قبول، قبول لنفسه، لقدراته، لمهاراته، للنواقص اللي عنده. وما يقفش عند القبول. لأ، يقبل الأول إنه إنسان عنده نواقص ومش كامل. ويبدأ بعد ما يقبل يفكر هو نفسه بيتمنى يكون متميز في ايه؟ ومع تحديد ده يبدأ يتعلم ويتطور مع وضع توقعات منطقية واحترام سرعته واساليب تعلمه ومع عدم مقارنة نفسه مع حد تاني.

اللي عايز يقود ذاته، محتاج يقبلها الأول. تخيل لو حد بيسوق عربية لادا، وكل يوم يتخانق معاها ويرفس فيها ويقول لها أنت ليه مش مرسيدس. وكل يوم يدور الموتور ويتوقع منها تجري زي المرسيدس. مهما داس بنزين، مش هتوصل زي المرسيدس. محتاجين علشان نقود نفسنا، نقبل نفسنا، ونسعى إننا نتحسن واحدة واحدة في سعي للتميز وليس للكمال. فتبقى عربية لادا متميزة في سوق العربيات اللادا.

الكتاب اللي قريته عن التخلص من السعي للكمال هنا 

https://bit.ly/3vpCQWw

اللقاء اللي فيه اتكلمت ليزا نيكولز عن ادارة نفسها هنا 

https://bit.ly/3iNdzD0

أحد الفيديوهات اللي اتكلمت فيها عن التشوهات الفكرية على قناتي علي اليوتيوب اللينك بتاعها هنا:

https://bit.ly/3xibZgu

#الموقف_الثالث_القبول

#كتابة

#قراءة

#تعليم

#تطبيق

#مجتمع

#كن_إنسانًا

#سيب_اثر