عقد التنازلات

الجواز عقد تنازلات بين الطرفين..

جملة كررها حد من دايرة اصدقائنا واحنا بنتكلم على حال الشباب دلوقتي..

وكان بيشارك وجهة نظره وهي ان الزوجين لما بيقدموا على الزواج كل حد فيهم بيمضي على عقد زواج هو في حقيقته عقد تنازلات… ومحتاج كل حد منهم يستوعب ده علشان الزواج ينجح..

كلمة تنازلات استوقفتني..

ولأن بقيت مستوعبة تأثير الكلمات اللي بنكررها علينا

(لأن الكلمات مع تكرارها بتتحول لمعتقد وبعدها بيولد مشاعر وتترجم في سلوك)

فكرت قي ايه الكلمة دي ممكن تكون موقفة ناس كتير عن الزواج..

لو من قرب ال٣٠ سنة كان والدي قال لي هتمضي على عقد تنازلات كنت خفت.. ويمكن رفضت..

زوجي العزيز لما اتعرفت عليه كان بتكلم عن شراكة..

شركة مساهمة.. احنا الإتنين شركاء فيها..

احنا الإتنين بنكمل بعض..

وكل حد فينا بيقدم للتاني دعم، حب، تفاهم، مساعدة..

اهتمام، إخلاص، وفاء، أمان..

كل حد كان بيفكر ازاي هيكمل التاني علشان الأسرة تقوم..

وازاي ننجح الشركة دي..

خلال السنين بفضل الله ما شفتش اني بقدم تنازلات..

شفت اني بختار في وقت احط عيلتي اولوية..

لأني عايزة اسرتي تكون سعيدة..

في وقت احتاجت اشد الحزام،

علشان الظروف المادية مع ارتفاع الأسعار والتعويم احتاجت كده..

انما عمري ما شفت اني في علاقة تنازلات..

ايه علاقة ده بسلسلة اتجوز..؟

يا ترى الجواز بالنسبة لك ايه؟

الفكرة اللي في بالك مع تكرراها غالبًا اتحولت لمعتقد.. والمعتقد ده مأثر علي اقبالك على الزواج..

وعلى ترددك او رفضك له.. او هروبك منه..

هل شايفاه سجن؟

هل شايفه عبودية؟

هل فكرتك عنه انه تقييد للحرية؟

هل شايف انه نظام اجتماعي فاشل؟

هل شايفة انه شر لابد منه؟

هل شايف انه موضة قديمة؟

لكل حد متجوز او لسه..

جرب تمسك ورقة وقلم وتكتب 

الجواز من وجهة نظري هو………………..

وكمل الجملة بأول فكرة هتيجي في عقلك..

وقارن الجملة دي بكلام ربنا عنه..

اه سكن ومودة ورحمة..

وان الزوجة الصالحة خير متاع الدنيا..

هتقول لي هي فين الصالحة دي؟

هقول لك اصلح نفسك يرزقك بالصالحة..

وهقول لك اصلحي نفسك وحالك من ربنا هيرزقك بالصالح..

لو انت متجوز فعلًا ولاقيت الجملة اللي كتبتها عن الجواز جملة سلبية..

استعيذ بالله من الشيطان الرجيم..

وافتكر ان الزواج ده سنة نبيك..

وافتر ان الشيطان قاعد لك انت ومراتك..

واكبر نصر له انه يهد بيتكم..

فاستعن بالله ولا تعجز..

ونادي مراتك وابدأ معاها صفحة جديدة..

وراجعوا العقد..

وعيدوا تعريفه..

عقد سكن ومودة ورحمة..

فيه هنتأسى برسولنا الكريم عليه الصلاة والسلام

ونفتكر قوله ان "خيركم خيركم لأهله"

ونفتكر كمان عظم اجر الزوج..

وان العلاقة دي اساها سكن..

سكن نفسي.. سكن عقلي..سكن روحاني.. وسكن بدني..

كفاا عيشة في بيوت خربانة..

وتمثيل على السوشيال ميديا اننا سعداء..

خلينا نرجع بيوتنا..

ونصحح عقولنا وعقدونا..

ونعيش في بيوت نخذي فيها الشيطان..

ونحس فيها بالأمان..

 #اتجوز؟_٣٩

#الزواج

#اﻷسرة

#المجتمع

#السنة