مين بابا مين؟

مرة كنت بحضر احتفال زوجين بعيد جوازهم، الزوج في لحظة عاطفية قال لنا مراتي دي حبيبتي ومراتي وبنتي.. وهي ابتسمت والناس وقفت وانا وداني صفرت..
”بنتي"؟
تبادل الأدوار لص من لصوص العلاقات..
الزوجة ممكن تفرح ان الزوج شايفها بنته،
ومش مستوعبة كم العبث اللي ممكن يحصل بسبب الفكرة دي..
الزوج والزوجة شركاء..
هي دورها تساند الزوج.. هي شخص كبير مسؤول..
مش طفل..
والزوج محتاج سند مش زوجة طفلة محتاجة رعاية..
بدل ما تبقى ايديهم في ايدين بعض ويشيلوا مع بعض مسؤولية الأسرة،
تتحول الزوجة لعالة على الزوج.. على حمل عليه.. استنوا ..
هل مستوعبين تبعات ده ايه؟
كام أم علي مدار السنين اختارت تتبادل الأدوار مع ولادهم،
وتتحول إلى عالة
والأولاد من باب البر، يتكسفوا
ويقرروا تبقى امهم بنتهم
وبدل ما الأم تقوم بدورها
تلعب دور البنت وتستنزف ولادها نفسيًا وبدنيًا وتحرمهم منها،
من احساس البنوة.. من احساسهم ان عندهم ام..
وتبقى السرقة مضاعفة..
انسان في سن الأربعين..
أمه عايشة في الستين،
حارماه منها كأم
وكمان محملاه مسؤولياتها كبنت..
من كام سنة وانا في زيارة عند فاروق ابني في سويسرا
دخلت سوبر ماركت لاقيت ست كبيره في السن جدًا
ماسكة مشاية فيها سَبَت.. وبتتحرك ببطء شديد..
واشترت وخرجت واعتمدت على نفسها..
رجعت حكيت لفاروق، رد قالي
”هنا كبار السن عايشين، بيتحركوا وبيلعبوا رياضة. مش محبوسين في البيوت ولا راقدين في السرير. ودي احد الحاجات اللي عجباني هنا.“
رجعت من السفر وبدأت اتأمل كبار السن،
نسبة منهم فاهمة دورها صح، ولسه بتقوم بدورها كأم حتى مع تقدم العمر..
ونسبة تانية استسلمت انها ضعيفة
وقررت تبقى هي البنت وحد من بناتها (أو مرات ولادها أو ولادها) يقوم بدور الأم.
تبادل الأدوار لص من لصوص العلاقات
تبادل الأدوار لص من لصوص العلاقات
تبادل الأدوار لص من لصوص العلاقات
مرة ملك بنتي كانت بتتكلم معايا،
وبتقول لي اجيب لك …. عشان أدلعك، كأنك بنتي
قلت لها على طول ”لأ“. انا امك وانت بنتي
مفيش بينا خالص موضوع تبادل الأدوار..
مرة اتصلت بأمي، وعاتبتها اني كنت رايحة للدكتور وانها ما كلمتنيش تسألني عملت ايه زي ما دايمًا بتعمل…
قالت لي خلاص بقى انت كبرتي..
رديت بشكل تلقائي اني مهما كبرت هفضل محتاجة لأمي..
الإنسان اللي بيبادل الدور مع حد تاني المه بيكون مضاعف
الم انه مفتقد الدور اللي التاني طبيعي يقوم بيه تجاهه
الم انه شايل دور مش دوره
من فترة كنت بكلم جيهان اختي ويطلب منها حاجة..
وفي وسط الكلام قالت لي عشان انا الاخت الكبيرة..
وقفت مع كلمتها وسألتني هل أنا بحملها فوق طاقتها عشان هي الأخت الكبيرة؟
الأخت الكبيرة مش أم..
الأخت الكبيرة اخت..
يعني هي اختنا واحنا اخوتها
يعني نتعاون، زي كتاب ”معنى الحياة“ ما كان بيشرح
موضوع تبادل الأدوار ده موضوع خطير
واتمنى المعالجين والمتخصصين النفسيين يتكلموا عنه
وعن خطورته وتبعاته على الصحة النفسية بالذات مع تقدم سن الزواج وزيادة نسبة الشباب اللي ما اتجوزتش والبنات اللي لسه عايشة مع اهلها بتتحول هي لأم والأهل يلعبوا دور الأطفال والأدوار تتوه تحت مسمى بر الوالدين
ولأننا مهما كبرنا بنحتاج لأهلنا..
فأتمنى من كل حد عنده اولاد
وبوجه الكلام لنفسي قبل اي حد
انه يهتم بصحته ويمارس رياضة ولو خفيفة ويهتم بذاكرته وبالنوم
عشان يفضل يقوم بدوره بفاعلية
وهو فاكر ان النبي صلى الله عليه وسلم قال: (أَلَا كُلُّكُمْ رَاعٍ، وَكُلُّكُمْ مَسْئُولٌ عَنْ رَعِيَّتِهِ، فَالْأَمِيرُ الَّذِي عَلَى النَّاسِ رَاعٍ، وَهُوَ مَسْئُولٌ عَنْ رَعِيَّتِهِ، وَالرَّجُلُ رَاعٍ عَلَى أَهْلِ بَيْتِهِ، وَهُوَ مَسْئُولٌ عَنْهُمْ، وَالْمَرْأَةُ رَاعِيَةٌ عَلَى بَيْتِ بَعْلِهَا وَوَلَدِهِ، وَهِيَ مَسْئُولَةٌ عَنْهُمْ، وَالْعَبْدُ رَاعٍ عَلَى مَالِ سَيِّدِهِ وَهُوَ مَسْئُولٌ عَنْهُ، أَلَا فَكُلُّكُمْ رَاعٍ، وَكُلُّكُمْ مَسْئُولٌ عَنْ رَعِيَّتِهِ) متفق
وكمان فاكر ان النبي صلى الله عليه وسلم قال: ”لَا تَزُولُ قَدَمَا عَبْدٍ يَوْمَ القِيَامَةِ حَتَّى يُسْأَلَ عَنْ عُمُرِهِ فِيمَا أَفْنَاهُ، وَعَنْ عِلْمِهِ فِيمَ فَعَلَ، وَعَنْ مَالِهِ مِنْ أَيْنَ اكْتَسَبَهُ وَفِيمَ أَنْفَقَهُ، وَعَنْ جِسْمِهِ فِيمَ أَبْلَاهُ“ رواه الترمذي
يا أهل يا أهل يا أهل..
تبادل الأدوار لص رهيب..
افيقوا..
ولادكم مش اهلكم..
ربنا يسألكم عن صحتكم وعن رعيتكم..
اللهم بلغت واللهم فاشهد
#تصرفات_مدمرة_20