حضرتك متجوز راجل ولا ست؟

في الجواز، احيانًا الاختلافات والمشاكل بتكون موجودة..

بس في البداية مش بنشوفها، او بنغمض عيونا عنها، او بنتجاهلها..

انما للأسف، مع مرور الوقت، بنبدأ نشوفها، ونلاحظها..

وتبدأ تدوس على زرايرنا.. ونلاقي نفسنا بنتعصب وننفجر من ابسط مشكلة..

ايه المشكلة الحقيقة في الجواز؟

من وجهة نظري، المشكلة اللي في الجذور تحت هي 

عدم استيعاب الراجل ان الست ست، مش راجل زيه..

وعدم استيعاب الست ان الراجل راجل، مش ست زيها..

من كام يوم اول ما صحيت زوجي العزيز طلب مني احضر له الفطار..

لاقتني متعصبة ومتضايقة..

بدأت أنظم تنفسي والاحظ مشاعري..

وبدأت افكر في افكاري..

ايه مضايقني كده؟

زوجي العزيز لاحظ، سألني: "مالك؟"

شرحت له اني: "مش بحب ابدأ اول ما اصحى اقوم ادخل المطبخ..

بحتاج وقت اعمل جلسة التأمل اليومية، اكتب في الjournal بتاعي وبعدين اتنقل للمهام المطلوبة.."

رد بعفوية وقال: "ما أنا اول ما قمت عملت كذا وكذا..

لاقتني برضه بتلقائية وباقول له: "ايوه ما علشان انت راجل..

أنا مختلفة عنك..أنا ست.. 

طبيعتي، زي اغلب الستات، اني احب اخد وقت الأول، اهيأ نفسي لمهام اليوم..

زي ما ربنا خلقنا، يهيئنا ٩ شهور لحد ما المولود يوصل.. 

مش في لحظة اتنقل من زوجة لأم..

برضه مش في لحظة اصحى اقف في المطبخ.."

خلال اليوم فكرت في الموضوع ده..

بعد ٢٧ سنة زواج هل لسه محتاجة اقف اشرح لزوجي الفرق ده؟

لاقيت اني ايوه..

لأني حاليًا في مرحلة جديدة عليا كزوجة، كإنسانة..

مرحلة فيها تغير في الهرمونات..

واللي كان عادي وبتقبله من سنين ما بقاش حاليًا عادي..

بقى بيضغطني..

وحاليًا، مع المرحلة الجديدة، بحتاج وقت اطول، 

بحتاج اعمل حاجات اقل في يومي، وانام اكتر..

بحتاج طولة بال عليا اكتر..

بحتاج مساعدة اكتر..

بحتاج اقعد وارتاح واتأمل اكتر..

مرحلة الإنتقال من سن الأربعين لسن الخمسين..

ايه علاقة ده بسلسلة اتجوز؟

علاقته محورية..

• ان كل طرف يستوعب ان الطرف الأخر مختلف تمامًا عنه

• ان كل طرف يستوعب ان فيه مراحل للحياة وان شريك الحياة فعلًا بيتغير على مدار المراحل من حيث المشاعر والاحتياجات والمساعدة المطلوبة

• ان كل طرف مسؤول مسؤولية تامة انه يفهم نفسه واحتياجاته أولًا على مدار المراحل المختلفة 

• ان كل طرف عليه يشرح بهدوء واحترام طبيعته واحتياجاته لأن مفيش راجل هيفهم الست محتاجة ايه من غير ما هي تطلب وتوضح ولا ست هنفهم الراجل محتاج ايه فعلًا من غير ما يطلب ويشرح

• ان كل طرف عليه يستوعب الطرف الأخر بطبيعته واحتياجاته ومراحله السنية والهرمونية من باب الرمودة والرحمة

• ان الولاد في البيت بيشوفوا ام واب بيتخانقوا ويتشاكلوا، لأن الأم والأب (كتير منهم) مش منتبه للفروق الجوهرية بين الراجل والست وكتير منهم عنده مقاومة داخلية انه يعترف انه هو وشريك حياته بقوا في مرحلة عمرية مختلفة باحتياجات مختلفة 

لكل حد مش متجوز..

اوعى الناس اللي اتجوزت قبلك تعقدك..

الجوازات مش كلها وحشة ولا فاشلة..

الناس اللي متجوزة وسعيدة مش عايزة تقول لأن كتير منهم خايف من الحسد..

والناس اللي بتشتكي ومكملة ممكن تكون بتخزي العين..

والناس اللي مكملة وفعلًا مش سعيدة رافضة تتعلم ازاي تبقى سعيدة مع شريك حياتها

واتعودت على دور الضحية المسكينة اللي بتستجدي تعاطف من كل من هب ودب….

ياللا اقوم اتعمل الفرق بين الراجل والست..

سواء كنت متجوز او لسه..

ده علم اساسي.. 

بحلم في يوم يكون من ضمن مناهج المدارس..

من احسن اللي اتكلم عن الفروقات دي هو د. جون جراي

صاحب مدرسة المريخ والزهرة

وكتابه الرجال من المريخ والنساء من الزهرة كتاب محوري!

يعني سواء متروج ولا لا الكتاب ده A must read 

ياللا..

اقرأ.. واتعلم..

اتنور.. وجدد نيتك وتوكل..

سواء بالجواز او بتحسين علاقتك بزوجتك…

واعمل ده بنية لله..

 #اتجوز؟_٣٨

#الزواج

#اﻷسرة

#المجتمع

#السنة