خاتمة السلسلة

حلو قوي اللي بتكتبيه.. كملي..

بقيت استنى اقرأ كتبتي ايه الأسبوع ده..

بخلي ولادي يقرأوا اللي بتكتبيه عن الجواز..

جمل كتير اترددت على مسامعي..

من ناس من عيلتي او من اصحابي..

او من زمايلي او من عملائي الكرام..

او من جمهور الفيس بوك..

جمل شبه بعض.. كلها في نطاق كملي كتابة عن الموضوع ده..

موضوع الزواج..

الموضوع اللي لما بدأت فيه كنت مترددة اكتب عنه 

ودي كانت اول سطور كتبتها فيه 

"ترددت كتير قبل ما اكتب في الموضوع ده... لاقتني بتحسس في اختيار الأفكار والمحاور..

لاقتني بفكر في رد فعل القراء ما بين معارض ومؤيد..

فضلت اقلب الموضوع في دماغي.. وامشي في الطبيعة وافكر اكتب فيه ولا لأ..

لحد ما روحت حضرت نادي قراءة مع كاتبة عزيزة على قلبي..

وهناك اتفتح الموضوع.. ولاقيت هجوم من جانب السيدات على الأفكار اللي بطرحها.."

لم اكن انخيل اني هفضل اكتب عنه على مدار شهور..

على مدار اربعين اسبوع..

في محاولة مخلصة مني اني ادق جرس انذار مجتمعي..

واقول للي مش سامع يسمع..

الأسرة هي عمود المجتمع..

والجواز هو اساس الأسرة..

من غير اسر مترابطة مفيش مجتمع ناجح..

ومن غير جواز على رسمي مشهر ومعلن، جواز حقيقي هدفه اسرة 

كله بعد كده عك وزنا في شكل مقنن..

زنا مربوط بفيونكة اسمها مساكنة او زواج عرفي او زواج ويكانند..

المهم انه مش زواج.. مش سكن ومودة ورحمة..

قرب اخر السلسلة كنت في زيارة دورية عن دكتور الأسنان..

راجل محترم في سن والدي..

سألني ع اخر كتبي..قلت له كتاب عن المراهقين..

قال لي اكتبي حاجة عن الجواز..

قلت له بكتب على صفحتي على الفيس بوك..

قال لي الناس مش عايزة تتجوز..

البنات بقت بتاخد ادوية اكتئاب،

وبيجوا زايدين في الوزن ومحبطين..

قلت له بكتب…

كل اسبوع كتبت..

وكل اسبوع كنت بجدد نيتي..

وباتمنى..

• الناس تعيد النظر في فكرتها عن الجواز..

• والأهل يصلحوا البيوت الأول علشان ولادهم يشوفوا دليل حي ان الجواز سكن ومودة ورحمة..

• والمسؤولين يعيدوا النظر في قانون الأسرة اللي مخوف الشباب 

• ورجال الدين يراجعوا الخطاب الديني ويقدموا دورات عن دور الزوج ودور الزوجة وقدسية الزواج

• ومسؤولين التربية والتعليم يدرجوا جزء في المنهج عن الفرق بين الراجل والست وازاي يفهموا بعض ويحترموا فروقهم الفردية

• والزوجة السعيدة تبطل شكوى علشان تخزي العين 

• والراجل السعيد يشجع أصحابه على الزواج

• ووقت الخلاف نلاقي رجل رشيد مع الزوجين يصلح بينهم

• والمقبل على الزواج يختار بحكمة، عيلة تناسب عيلته وام صالحة لولاده

• والمقبلة على الزواج تختار راجل فعلًا.. من عيلة مناسبة لها.. ويكون اب لولادها وابن لأهلها واخ لأخواتها

 باتمنى لمجتمعي..

وبشتغل على نفسي.. علشان اكون قدوة لأولادي.. 

وبدعي ربنا يديم عليا نعمة الزوج الصالح..

والسكن والمودة والرحمة..

تم..

ايمان رفعت 

يوليو ٢٠٢٥

#اتجوز؟_٤٠

#الزواج

#اﻷسرة

#المجتمع

#السنة