٦ مجالات محتاج تكون منظم فيهم
”مامي ما شفتيش العرايس بتاعتي؟“
”لا… انتي سيبتيهم فين؟“
”على الكنبة في الليفنج رووم (غرفة الجلوس)..“
الحوار ده دار بيني وبين امي وأنا طفلة. كان يوم عندنا ضيوف وكنت معايا عرايسي وراحت عليا نومة. صحيت الصبح لاقتني في سريري. روحت اجيب العرايس اللي كانت معايا في غرفة الجلوس مالاقيتهاش. سألت أمي.. ماشفتهاش. فضلنا ندور بلا نتيجة. سألت ابويا الله يرحمه رفض يرد. ومع الصمت أمي فهمت إنه شالها. هي دورت في كل حتة، في البيت وفي عيادته ومفيش اثر. وبعد أيام من البحث من جانبنا والصمت من جانبه وصلنا الى حالة استسلام اننا مش هنلاقيها.
ومرت السنين وفعلًا من يوم ماراحت عليا نومة ماشفتش العرايس دي تاني. ابويا يومها قصد يعملني درس للحياة. علمهولي بطريقة قاسية للأسف. وعلمهوني في صمت، بدون ولا كلمة. بتصرف بس.
موقف/Attitude التنظيم وقيادة الذات
مرت سنين من الحدث ده، وفي يوم في شغلي في المدرسة اللي كنت بشتغل فيها، كان فيه تصويت الطلبة والمدرسين بيشاركوا فيه وبيدوا القاب مثلًا اكتر حد دمه خفيف، اكتر حد كريم، اكتر حد مثقف.. لاقتني يومها بافوز بلقب اكتر حد منظم. يومها ابتسمت وافتكرت العرايس. افتكرت ازاي ابويا علمني درس غالي طلع من نفوخي زي ما بنقول انما اتعلمته. درس اسمه ”النظام“.
لما نتكلم على قيادة الذات اكيد هنتطرق للموقف ده. موقف التنظيم. اللي عايز يقود نفسه محتاج يكون منظم. مش بس في حاجته. محتاج يكون منظم في مجالات مختلفة زي:
١- تنظيم الأفكار. يفكر هو مين، عايز يقود نفسه من فين لفين، ازاي. مين ممكن يساعده. ايه الموارد اللي عنده وممكن يستخدمها ازاي.. يفكر بشكل منظم هو فين وعايز يروح فين وازاي يروح هناك.
٢- تنظيم الوقت… احد المواقف والمهارات الأساسية للقائد.. بيحتاج يدرك ويقدس الوقت وينظمه ويقسمه وفقًا لأهدافه ورؤيته وحلمه في الحياة.. ازاي يحسن استثماره، ازاي يوازن بين جوانب الحياة المختلفة، ازاي يهتم بصحته..ازاي ينظم يومه ويعيشه بفاعلية ويكون فعلًا عايش فيه مش بس موجود..
٣- ينظم اولوياته.. ايه قبل ايه وليه.. ايه السنة دي وايه ممكن سنين جاية، وايه الشهر ده وايه النهاردة..
٤- ينظم اكله ونومه ورياضته ومواعيد كشوفاته الدورية.. الحاجات دي هي حجر الأساس انه يكون بصحة كويسة فيقدر يقود نفسه..
٥- تنظيم الأشياء سواء كانت ادوات، ملابس، كتب، ايًا كان.. بيحتاج يكون منظم، يعرف عنده ايه ومكانه فين، يعرف يلاقيه علي طول وما يهدرش وقت في التدوير على ايه راح فين وامتى وليه.. يعرف بدقة هو اصلًا بيملك ايه علشان يبقى ذهنه حاضر في ازاي يستخدمه..
٦- ينظم ميزانيته ويفكر في اللي داخل واللي خارج واللي محتاج يدخره علشان يساعده يوصل لأهدافه…
خلينا نفتكر ان القائد زي سواق العربية، معاه عربية (جسمه) فيها بنزين وسايقها وبتتحرك لقدام (لقرب خط النهاية). هو كسواق محتاج يحدد هدف عايز يوصل له/وجهة متجه لها ويبدأ يتحرك. عشان يتحرك محتاج ينظم نفسه. هيروح فين؟ هيقف في السكة؟ يحط بنزين في النص منين؟ مين هيركب معاه؟ الساعة كام؟….هو هيرتاح امتى ويكمل امتى؟ وبالتالي يقدر يقود نفسه من نقطة الف لنقطة ب بنظام.
موقف/Attitude التنظيم والرغبات
من سنين طويلة قرأت كتاب بعنوان ”Who am I“ كتبه طبيب في علم النفس مشهور وتعمق جدًا في البحث عن سر الدافعية عن الناس (Motivation). وخلال بحثه الكبير وجد ان الناس بتحركهم ١٦ رغبة. كل واحد فينا عنده تركبيته الخاص من الرغبات القوية والمتوسطة والضعيفة. واحدة من الرغبات دي كانت رغبة النظام. من الكتاب فهمت انها رغبة. فيه ناس بفطرتها قوية عندها الرغبة دي وفيه ناس تانية لا. وبالتالي مش كلنا زي بعض. طيب بس هي موقف مهم جدًا للقائد، نعمل ايه لو الرغبة دي عندنا ضعيفة؟
موقف/Attitude التنظيم والمهارة
زي ما التنظيم هو موقف ورغبة من الرغبات اللي بتختلف شدتها عن الإنسان، زي ما هي مهارة بتتمنى بالممارسة. والأهم بالتدريب. بعد سنين طويلة من قصتي مع والدي والعرايس، بقيت أم ولاقتني حريصة اني أعلم ولادي يطلعوا منظمين. وقتها بدأت اقرأ ازاي نساعد الطفل يكون منظم. ولاقيت المفاتيح دي:
١- نكون احنا قدوة في التنظيم
٢- نعلمه ازاي ينظم (ادواته، خطته، أفكاره، يومه…)
٣- نوفر له الأدوات اللي تساعده يكون منظم (ممكن ادراج او ارفف لتنظيم ادواته والعابه، منبه او ساعة رملية لتنظيم وقته، الوان وادوات مكتبية لتنظيمه افكاره وخطته..)
٤- ندرب ونشجع ونصبر، كومبو مع بعضه كده. ادرب الطفل على المهارة، اشجعه علي المحاولة واصبر ان التعلم هياخد وقت..
٥- نخصص وقت للتنظيم.. مثلًا من انشطتي الأسبوعية هي تخصيص وقت لتنظيم خطتي الأسبوعية. ووقت يومي لعظيم افكاري من خلال الكتابة الصبح بدري ومراجعة وترتيب اولوياتي، ووقت خلال الأسبوع لتنظيم حاجتي زي الملابس او البيت. وقت يوميًا لتنظيم مكتبي. كمان الطفل كده، وقت قبل النوم لتنظيم شنطة المدرسة، وقت بعد اللعب لتنظيم اللعب. وقت خلال الأسوبع لتنظيم اولوياته وجدوله ما بين مدرسة ولعب ورياضة وفسحة وعيلة واصدقاء…
٦- نخلي الوقت ده ممتع، يعني يبقى نشاط مش عقاب. مثلًا نسمع اغاني واحنا ننظم او نستخدم الوان وستيكرز واحنا بنخطط.. نختار حاجة تفتح نفسه على التنظيم..
٧- نراعي الفروق الفردية… والنقطة دي اتعلمتها من بنتي، ان الوقت اللي نخصصه للتنظيم يكون مناسب له.. حد مش بيحب التنظيم والرغبة دي عنده ضعيفة، نخصص خمس او عشر دقايق في المرة الواحدة، نسايسه مش نضغط عليه يقعد ينظم لمدة ساعدة وبالتالي يحصل مرة وبعد كده يهرب ويتهرب من التنظيم لأنه اتضغط..
٨- نحط توقعات منطقية.. اننا مش هنعيش في مكان منظم ١٠٠٪ وإن الطفل انسان مش ماكينة، بيلعب وينحكش. ان البيت اللي فيه حياة فيه ناس بتستخدم حاجات وبالتالي مش هيكون منظم ١٠٠٪ وكمان مش معناه يكون منحكش تمامًا. لأ.. الوسطية والاعتدال مطلوب في توقعاتنا من نفسنا ومن غيرنا.. لأننا بنقود حياتنا صحيح انما حياتنا ككائنات اجتماعية متشابكة ومتداخلة مع غيرنا. وبالتالي محتاجين توقعاتنا منهم ومن نفسنا تكون منطقية، توقعات معتدلة وبمرونة…
٩- نركز على النجاحات مش الإخفاقات. يعني مثلًا عرف ينظم اولوياته النهاردة انما مكتبه منحكش. نهنيه على النجاح في تنظيم الأولويات. من غير ما نوبخه على كركبة المكتب.. عملًا بقاعدة “What you focus on you get more of." يعني اللي هتركز عليه في حياتك هيكثر ويتضاعف. مركز علي قدرته على التنظيم، هيتقدم ويبقى منظم اكتر واكتر مع الوقت. مركز على طفلك غير المنظم وبتوبخه بدل ما تدربه وتساعده، هتلاقيه بيتحول لكائن فوضوي اكتر مع الوقت.
١٠- احذر ان النظام يتحول لهوس تضغط بيه عليه فيخنقه ويكرهه. النظام هو موقف بنعلمه ونغرس في ولادنا علشان يستخدموه في قيادة حياتهم وتحقيق اهدافهم. النظام وسيلة مش غاية.
أحد المقولات اللي بحبها جدًا عن النظام بتقول: “For every minute spent organizing, an hour is earned.”
يعني كل دقيقة بنقضيها في التنظيم، بنوفر قدامها ساعة. بنكسب ساعة قصاد كل دقيقة.
ملخص للي اتعلمته عن تنظيم الوقت قدمته في مجموعة فيديوهات قصيرة على قناة اليوتيوب عندي، اولها هنا:
shorturl.at/jzPWX
أحد الأدوات اللي ساعدتني انظم افكاري وانمي مهارات التفكير عندي أداة اسمها الخرائط الذهنية. قدمتها في فيديو عملي، لينك الفيديو هنا:
فيديو كمان على قناتي عن تنظيم المقتنيات موجود في اللينك ده:
#الموقف_التاسع_عشر_التنظيم
#كتابة
#قراءة
#تعليم
#تطبيق
#مجتمع
#كن_إنسانًا
#سيب_اثر
بعاداتي باصمم حياتي
سلسلة بعاداتي باصمم حياتي - ١٧ حلقة هدية للتعرف على كيفية تبني العادات والإلتزام بها
