بينا مشكلة ولا بنواجه مشكلة؟

زوجي العزيز شخص مش بيحب الظهور على قنوات السوشيال ميديا..

وبالرغم من كده، الا انه وافق يظهر معايا في لقاء تلفزيوني..

بعد الحاح مني..

خلال سنواتي معاه اتعلمت منه كتير..

بفضل الله، عنده أخلاق ومهارات وقيم عليا..

جملة من الجمل المحورية اللي اتعلمتها منه جملة

"فكري هل فيه بينا مشكلة ولا بنواجه مشكلة؟"

ونصيحته ليا

"ما تخليش مشكلة بنواجهها تتحول لمشكلة بينا"

الجملتين دول بشوف إنهم كانوا هيعملوا فريق كبير في بيوت كتير..

بدل ما الزوجين لما يواجهوا مشكلة يقفوا يتخانقوا،

لا.. يقفوا مع بعض يتحدوا ويفكروا..

من كام سنة سمعت عن حد ابنه توفى 

(ربنا يصبره ويحفظ اولادنا)

هو ومراته كانوا بيحبوا بعض جدًا…

وبعد وفاة الإبن، اتحولت وفاته لمشكلة بينهم..

وبعد شهور من الإختلاف والخناق.. 

اتطلقوا.. 

ابتلاء كبير.. بدل ما يقربهم من بعض، 

هز العيلة كلها وفرق الزوجين..

اللي كانوا مع بعض فوق العشرين سنة..

٢ مخطوبين..

الأسعار زادت التكاليف ارتفعت…

تحضيرات الجواز بقت اعلى..

مشكلة بيواجههوها..

بدل ما يفكروا مع بعض ازاي يتعاملوا معها..

بيتخانقوا مع بعض..

ايه فعلًا يكون مشكلة بين زوجين؟

اختلاف القيم الأخلاقية 

عروسة مهم بالنسبة لها بر الوالدين.. والعريس شايف ان بعد الجواز هو وبيته وبس.. 

عريس عايز مراته تكون متشددة، تمنع الإختلاط وما تتفرجش على تلفزيون.. وهي عايزة تكون معتدلة.. 

دي مشاكل بينهم..

اختلاف الأولويات 

عروسة عايزة تشتغل لما تخلف.. والولاد يبقوا مع شغالة او في حضانة وهما لسه رُضَع..

اولوياتها شغلها ومستقبلها المهني..

والعريس عايز ولاده يشبعوا من حنان الأم بالذات اول سنين لهم.. اولوياته الأسرة..

دي مشكلة بينهم..

اختلاف الرغبات 

عروسة عايزة تسافر وتتفسح وتلف الدنيا مع جوزها..

وهو عايز يحوش ويعمل خميرة لمشروع.. 

دي مشكلة بينهم..

ايه المشكلة في موضوع الزواج؟

ان ناس مش متجوزة مش فاهمة الفرق بين "مشكلة بينهم ومشكلة بيواجهوها مع بعض"

إن ازواج كتير بيحولوا مشاكل بيواجههوها لمشاكل بينهم وبالتالي الناس اللي حواليهم بيتعقدوا من الزواج

ان مفيش ناس عاقلة تساعدهم يفهموا الفرق بين مشكلة بينهم ومشكلة بيواجهوها

ان الناس خايفة من الزواج لأنه فيه مشاكل.. 

ان الناس بقت شايفة الجانب المظلم بس من الزواج (انه باب المشاكل)

الزواج سنة من السنن الكونية..

فيه جوانب ايجابية.. كتير..

وفيه تحديات، زي كل حاجة في الحياة..

زي الشغل، زي الصحة، زي العلاقة مع الأهل والأصحاب..

مرة قريت ان الناس اللي معندهاش مشاكل هما اللي في القبور..

طالما احنا في الحياة يبقى هيكون فيها الحلو والصعب..

والصعب، بيهون ويفرق قوي لما يكون معانا شريك حياة

بينا تفاهم على القيم والأولويات والرغبات..

ونواجه الصعوبات والتحديات مع بعض..

لكل حد بيفكر يتجوز..

افتكر جملة جوزي دي لأنها محورية..

ولكل حد خايف يتجوز..

افتكر ان الجواز مش باب المشاكل وان العازب حياته مش خالية من المشاكل..

لينك الحلقة مع زوجي العزيز هنا..

وفيها الجملة المحورية اللي اتعلمتها منه ومعاه..

https://youtube/tJ9a43jouLM?si=0TGc6GP_LwW8eyz-

 #اتجوز؟_٣٧

#الزواج

#اﻷسرة

#المجتمع

#السنة