خمس طرق بيهم نبقى في مرونة النخل

attitudes change coaching flexibilty jim rohn meta programs parenting programs self-leadership strategies strength wisdom

وأنا طفلة كان عادل إمام نجمي المفضل. اتفرجت علي أفلامه ومسرحياته.. وحضرت له مسرحيات مع أهلي زي الواد سيد الشغال والزعيم.. مسرحية شاهد ماشفش حاجة كانت من المسرحيات اللي اتفرجت عليها مرات كتييير جدًا.. ومشاهد بعينها كانت معلقة معايا جدًا. مشهد منهم كان في المحكمة، والقاضي بيسأل الشاهد، اللي هو عادل إمام، كان بيعمل ايه وقت الجريمة ما تمت.. والقاضي قال جمل شهيرة أثرت علي تفكيري وسلوكي لمدة سنين، لأ لأ.. اثرت عليا لمدة عقود.. لحد ما عديت سن الأربعين.. الجمل كانت :“يا أبيض يا أسود، مفيش حاجة اسمها بين البينين، اللون الرمادي ده ما أنا ماحبوش. يا أبيض يا أسود. اجابتك لازم تكون واضحة ومحددة وقاطعة.“

 

كبرت وأنا شايفة الحياة كده. بلونين. يا أبيض يا اسود. يا إنسان محترم يا صايع. يا ناجح يا فاشل. يا مواعيده مضبوطة يا بايظة. كبرت في مدرسة راهبات. وأمي وجدتي كبروا في نفس المدرسة. وطبعًا مع تربية الرهبات وفي وسط عيلة جد، كبرت وأنا متخيلة إن الحياة كلها كده، أبيض واسود. وإن أنا بسلوكي ونتايجي يا أبيض يا أسود. طول الوقت كنت رافضة إني في الرمادي، وشايفة إن ده غلط، فشل، إني طالما مش أبيض ١٠٠٪ يبقى أنا اسود.. ما هو لو مش أبيض، يبقى اسود.. لأن في قاموسي، اللي هو قاموس عيلتي، مفيش رمادي.

كبرت وعشت حادة، في تصرفاتي مع نفسي للأسف أول شئفي علاقاتي.. وفي تعاملاتي. في نظرتي للأمور.. في نظرتي للأشخاص.. ومع شغلي في التربية والتعليم بدأت اتغير بصعوبة شديدة وبعد فترة مش قصيرة في نظرتي للطلاب وتعاملي معاهم، في تعاملي مع زمايلي.. في نظرتي لهم.. اتغيرت شوية صحيح إنما بصعوبة وجهاد نفس وبعد مرور سنين من التمسك بقانون الأبيض والأسود. انما فضلت بالقانون ده مع نفسي. منتظرة مني ابقي ١٠٠٪ والا ابقى اسود. وكان دايمًا ردي لما حد من المقربين ليا يديني نصيحة إني: ”أنا كده، اتربيت كده. وخلاص. ده أنا.“

 

المواقف/Attitudes وبرامج الطفولة والتنشئة

وأنا في سن الواحد واربعين بدأت ادرس كوتشينج. ودكتور مايكل هول اللي درست معاه اتكلم علي حاجة اسمها Meta programs. وشرح ازاي كل انسان بيتولد ورقة بيضا وعلي حسب التربية والنشأة والبيئة اللي كبر فيها بيطلع، بيكبر وتتكون له شخصية معينة. وشرح ان الشخصية دي ممكن تتغير، لو الإنسان اختار بوعي إنه يتغير. شرح إن التغيير مش هيكون من النقيض للنقيض، انما فيه مساحة تغيير. وقتها عجبتني اوي الفكرة. إني ممكن اتغير، أنا مش كده. أنا متبرمجة من الطفولة وأنا ممكن اتغير لو عايزة. حبيت اتعلم اكتر عن موضوع ال Meta programs، فاشتريت كتاب لدكتور مايكل يجي كده اكتر من ٦٠٠ صفحة وقريته.. وهوب جيت عند واحد من البرامج وهو برنامج المرونة. واخ! آي! ايه الكلام ده؟! اكتشفت طبعًا إن قانون الأبيض والأسود ده برنامج، وإنه زي المسطرة وفيه درجات كتير من الرمادي ما بين الأبيض والأسود. واكتشفت معاه إني متعذبة ومعذبة اللي بتعامل معاهم بسبب إني حادة جدًا، قاطعة جدًا، معنديش مرونة. 

 

بعد الكتاب بدأت الاحظني، والاحظ أنا مش مرنة فيه ايه والأهم ليه. مش مرنة في جدولي، في خطتي، في أكلي، في انشطتي، في ميزانيتي، في تعاملي مع الفريق اللي باشتغل معاه.. مش مرنةكش مرنة مع جوزي ولا ولادي ولا اللي بتساعدني في البيت.. مش مرنة! بدأت وقتها اركز ليه أنا مش مرنة. ولاقيت..

 

الجمود/عدم المرونة والخوف

لاقيت إني عندي خوف، إني اكون مرنة ف..

-  الخطة تبوظ خالص..

  •  اتحول إلي إنسان غير منضبط
  •  الناس تبطل تثق فيا 
  •  اضيع اوقت 
  •  مخي يتشتت
  •  اتوه عن أهدافي في الحياة
  •  الناس تفتكر اني مش ملتزمة 
  •  معرفش التزم في الحياة تانية لو بقيت مرنة..

- الناس تستخف بيا وتديني على قفايا

 

بعدها بدأت اسأل طيب الحدة دي عاملة فيكي ايه يا ايمان؟

ولاقيت إنها مسببة لي ضغط، ضغط عصبي شديد..على طول مضغوطة وبجري علشان أنا أبيض ولو بطأت ابقى اسود.. ومسببة ضغط للي حواليا..ومأثرة بالسلب على علاقاتي.. 

بدأت اتكلم معايا.. هل فعلًا عايزة تفضلي حاسة بضغط؟ هل مستمعة بالحياة وانت ماسكة بايديكي واسنانك في برنامج الجمود؟ هل فعلًا يا ايمان لو بقيتي مرنة حبيتين هايحصل كل اللي مخوفك ده؟

بعد صولات وجوالات كتير مع نفسي. وحوارات وكتابات في كرستي لاقيت اني تعبانة. مش مستمتعة بالحياة. عايشة بجدول تاعبني. أنا اللي حاطة الجدول وأنا اللي تاعبة نفسي. وقتها فكرتني بفكرة مهمة، كنت سمعتها في مقولة للمتحدث العالمي جيم رون. كان بيقول فيها للمستمعين إنهم يكونوا كالنخل، مرنين، يعرفوا يميلوا لما الريح تيجي، مش يتكسروا.. وقال إن دي من مميزات النخلة، إنها مرنة مش جامدة. واتكلم عن مزج القوة بالمرونة. 

 

موقف/Attitude المرونة وقيادة الذات

هل إني اتغير كان سهل؟ Absolutely بصوت محمد سعد في فيلم اللي بالي بالك. ده اكتر موقف/Attitude واجهت صعوبة في تبنيه. واعترف إني لسه بواجه صعوبة فيه وباحتاج اطلب مساعدة احيانًا من كوتش او من عيلتي إنهم يساعدوني او يفكروني بالمرونةواحيانًا تانية باقفشني وافكرني بأهمية مزج القوة والانضباط بالمرونة، اني اكون نخلة مش شجرة. 

 

ازاي تخلصت من الجمود..

بقيت مرنة شوية، مش مرنة طول الوقت ولا في نص المسطرة. إنما ما بقيتش زي زمان عند طرف المسطرة. ازاي حصل ده؟ إني اتكلمت معايا، واتفقت إننا هنكون عقلانيين. ونكون عاطفيين. هنختار الجمود والحدة في بعض المواقف. ونختار المرونة في مواقف تانية. هنختار الجمود والحدة في بعض الأوقات وهنختار المرونة في أوقات تانية. يعني هنكون Selective. وإن ده مش معناه إن معندناش إنضباط. لأ. ده معناه إن عندنا حكمة. 

مثلًا أنا ملتزمة بالنوم الساعة عشرة مساءًا من سنين. مرة سهرت مع جوزي واصحابنا لحد الساعة ١١ ونص. يومها بنتي استعجبت وسألتني ازاي واشمعنا سهرت كده واتأخرت عن ميعاد نومي. وكان ردي اني لاقيت جوزي، ابوها، مبسوط ومنسجم وبيضحك، وحبيت انه يقعد براحته وما اعكرش عليه القاعدة الحلوة. اتصرفت بالعواطف، من باب الحب واني اشوفه مبسوط. واتصرفت بالعقل إني فكرت إنه يوم خميس والسهر مرة استثنائية مش هيأثر بشكل سلبي على اليوم التالي، واني اقدر اصحى اتمرن واعمل الروتين بتاعي الساعة ٦ صباحًا بدل ٥ صباحًا يوم الجمعة. 

 

موقف/Attitude المرونة والحكمة

تخيل لو حاطط لولادك ميزانية، وكل مرة تحليت بالمرونة. ولادك هيتعملوا ايه؟ 

أحد المواقف اللي علمت معايا جدًا مع أمي كان عن الميزانية. كنا مسافرين في ديزني لاند، الملاهي الشهيرة. وكانت حاطة ميزانية لكل حد فينا أنا واختي نشتري بيها من المحل اللي هناك. واحنا عينينا اتزغللت في المحل.. وهي قررت، لما شافتنا نفسنا اوي في الحاجة، تزود الميزانية. تحلت بالمرونة في موقف استثنائي، ليه؟ لأن الملاهي دي مش في مصر، لأن يمكن ما نرجعهاش تاني، لأنها شايفة قد ايه نفسنا في الحاجة.. موقف.. اتصرفت بيه بحكمة.. مش بجمود.. كانت Selective.

 

ازاي نتحلى بالمرونة؟

١- نفكر نفسنا إننا اتولدنا صفحة بيضا وإن المرونة برنامج بينزل في العقل زي ما الجمود ماهو برنامج

٢- نفكر مع نفسنا ايه اللي مش نقبل فيه مرونة خالص، ونحدد فيه قايمة واضحة لنفسنا، وتكون قايمة قصيرة مش صفحات طويلة. مثلًا مش هكون مرنة إني اطنش التمرين الأسبوعي الا لو مريضة مرض عضوي يمنعني من التمرين بأمر الطبيب، مش هكون مرنة فاقبل مال حرام. مش هاكون مرنة اني اقبل كلام يتخطى حدود الاحترام مع زمايلي في الشغل، مش هكون مرنة مع ولادي لو خلفوا اتفاقنا مع بعض وهاطبق العواقب اللي اتفقنا عليها (مش العقاب، وعلشان يتربوا..)

٣- نفكر مع نفسنا ايه في الحياة محتاج مننا شوية رمادي علشان نستمتع بالحياة بدل ما نجري. مثلًا ممكن ابدأ شغلي بين الساعة ٩ و ٩ ونص، علشان مابقاش بجري كل يوم الصبح. مثلًا اتفق مع ولادي إن ميعاد النوم بين كذا وكذا.. ممكن نلعب ٣ ادوار بدل دورين لأن بنتي كان نفسها لسه تلعب معايا.. ممكن أكل بولتين ايس كريم بدل واحدة الدنيا ماتهدتش واستمتع بالطعم.. من غير ما اشغل برنامج انت مستهتر اتاخرت على الشغل ولا انت أم مش كويسة لأنك نزلتي كلمتك الأرض ولا أنت طفسة ومش بتعرفي تلتزمي بدايتايزي.. Take it Easy Ya Zizi

٤- إننا نلاحظ نفسنا لو المرونة سحبتنا واحدة واحدة إننا نبعد عن اهدافنا. نرجع تاني نفكر نفسنا بالهدف الأساسي، إننا نقود حياتنا واحنا مستمتعين. المرونة نفسها مش هدف. المرونة موقف بنستخدمه علشان يساعدنا نقرب من أهدفنا. لو عطلتنا، محتاجين نقف ونعمل نقطة نظام. لو لاقينا إننا بدأنا نروح الشغل الساعة عشرة وبعدين سحبت لعشرة ونص.. لأ، دي مش مرونة، ده بداية تسيب.. نلحق نفسنا ونرجعها تاني للاتفاق الأساسي.

٥- اننا نلاحظ اللي حواليا ونتعلم منهم، نقلد/نقتدي بمرونة الشخص المرن المستمتع بحياته وهو بيقدم ذاته من نقطة ا لنقطة ب. وإننا نتعلم من اخطاء الشخص المرن اللي حياته بقت مهلبية بالتقلية ولا فيه ا ولا ب ولا اي حرف من الأبجدية.

احد المقولات اللي بحبها جدًا اللي بتفكرني دايمًا بالنقطة الخامس مقولة بتقول: 

“Stupid People Don’t Learn. Average People Learn from Their Own Mistakes. 

Brilliant People Learn from The Mistakes of Others.”

 

فيديو ملهم بصوت جيم رون عن المرونة والحكمة في المرونة.. والعبرة من الشجر والنخل في اللينك ده:

shorturl.at/hnKQW

 

احد الفيديوهات الملهمة في ثمار المرونة موجودة في الفيديو ده عن النخل وثمار المرونة وقت الشدة والمحن..

shorturl.at/floJK

 

مقطع عادل إمام في مسرحية شاهد ما شاف حاجة عن قانون الأبيض والأسود موجود في الفيديو ده :)

shorturl.at/gpwNY

 

#الموقف_الثالث_عشر_المرونة

#كتابة

#قراءة

#تعليم

#تطبيق

#مجتمع

#كن_إنسانًا

#سيب_اثر

بعاداتي باصمم حياتي

سلسلة بعاداتي باصمم حياتي - ١٧ حلقة هدية للتعرف على كيفية تبني العادات والإلتزام بها