الخطاب الثالث عشر: الدوافع ما بين الخوف والحب

لا مش موافقة..

ليه يا ماما، نفسي قوي اروح..!

خايفة عليكي..

بس دي رحلة مع المدرسة.. والمدرسات اللي معانا كلهم انت عارفاهم.. ودي خلال اليوم المدرسي..!

باقول لك خايفة عليكي.. بعدين تتوهي.. او حد يعاكسك في جنينة الحيوانات.. او تتخطفي…

مفيش رحلة… لأني خايفة عليكي..

لا.. انسى.. 

يابابا انا ماصدقت حد طلب مني انزل اشتغل.. ونفسي اجرب احساس الشغل.. وكمان يوم واحد وبمكافأة لطيفة وفي مجال التصوير اللي باحبه جدًا وشاط فيه.. وده مشروع خدمة مجتمع، يعني كمان نشاط هادف..

قلت لا..

ليه يا بابا.. ممكن بعد اذنك اعرف؟

خايف عليك..

خايف عليا؟ يا بابا أنا هاروح مع الفريق بالإتوبيس وهارجع معاهم.. ومعانا مشرفين كتير.. 

لا لا.. خايف تسقط..

اسقط؟

ايوه.. يوم هايضيع من المذاكرة.. اولى تقعد تذاكر..

يابابا ده احنا لسه بنقول يا هادي في المنهج.. وبعدين اذاكر يوم الخميس والسبت.. واروح اشتغل الجمعة..

قلت لا.. انا خايف عليك وده من حقي..بدل ما تتبسط ان ابوك خايف على مصلحتك؟!

عزيزي الأب، عزيزتي الأم..

يا ترى لو حضرتَك وحضرتِك وحضرتي جربنا نسجل لنفسنا كلامنا مع ولادنا، هنلاقي كلمة الخوف بتكرر كام مرة؟ ولو سجلنا كمان افكارنا، هنلاقي فكرة الخوف او الأفكار اللي بتتقلب في عقلنا بسبب الخوف نسبتها قد ايه من أفكارنا؟؟

كتاب قريته من سنين.. سمعت عنه من اوبرا وينفري، اشهر متحدثة اميريكية افريقية الأصل.. كتاب قدم فكرة محورية.. فكرة الدافع.. وقدم الكاتب مقارنة بين حال الإنسان اللي بيتحرك في حياته بدافع الخوف.. وحال الإنسان اللي بيتحرك في حياته بدافع الحب.. وفي الكتاب شرح الفرق المحوري بين الإتنين..

يا ترى في حوارنا وتفكيرنا وتصرفاتنا مع ولادنا بنتصرف بدافع الحب ولا الخوف؟ 

طبعًا غالبًا هايدور في عقل القراء سؤال وجودي فحواه “ايه الفرق، ما أنا علشان باحب على ولادي باخاف عليهم..يعني خوفي ده حب..!”

عذرًا… لو ده مستوى تفكيرنا، احنا كده زي القطة اللي بتاكل ولادها علشان خايفة عليهم.. أو الدبة اللي قتلت صاحبها.. 

الحب شعور والخوف شعور تاني خالص.. 

الإتنين مشاعر بتؤدي إلى سلوك.. 

باحب ولادي، فبتخيل نفسي مكانهم، بمشاعرهم واحتياجاتهم وسنهم وظروفهم وميولهم وزمنهم.. وباختار اوافق على ايه وارفض ايه واتفاوض في ايه وارسم خط احمر على ايه..

باخاف على ولادي، باتصرف بقلق، بتوتر، بعصبية، بفرض رأي وتعصب، واتباع الأهل اللي زمنهم كان زمن مختلف، وباتبع برفض للنقاش وخناقة لو ابني او بنتي سألت ليه وانفعال ولوم وعتاب وتهزيق انه بيحاول يفهم.. لأني خايف.. خايف مايطلعش عندي حجة قوية.. خايف الاقي نفسي باغير رأيي.. خايف كلمتي تنزل الأرض قدامه، خايف يشوفني ولي أمر مهزوز.. خايف يطلع بره المصيدة اللي حابسه فيها لأحسن يصيع او يضيع… خايف الناس تقول اني ماربتش.. خايف..خ - ا - ييييييي - ف..

عزيزي الأب وعزيزتي الأم.. 

احنا - إنت وأنا - علينا السعي وابتغاء الأسباب.. والنتيجة على ربنا سبحانه وتعالي..

سيدنا نوح ابنه كان كافر.. وسيدنا ابراهيم ابوهكان صانع الأصنام..

يعني احنا بنجتهد.. والنتيجة على ربنا..

اخرة الخوف ايه؟

اقولك.. 

كائن خايف، مهزوز، ماعنوش ثقة في نفسه، 

واقول لك كمان.. 

هيكبر وخوفه وانعدام الثقة هيكبر معاه.. لأنه اتربي في تربة خايفة.. واتروى بمياه خوف..

فهايكبر يخاف من خياله.. 

يخاف يجرب ليفشل، يخاف يقدم في شغل لبترفض.. يخاف يتجوز ليفشل.. يخاف يحلم.. يخاف.. وكمل براحتك..

طيب واللي اتربى بحب..؟

باحبك فافكر واسأل واستشير واستخير..

باحبك وتعالى نفكر في حل يرضيك ويرضيني..

باحبك وباتمنى لك كل الخير.. وهادعي لك واستحفظ ربنا عليك..

باحب وهاساعدك تحقق حلمك..

باحبك وهاتصل اطمن انك وصلت..

باحبك وهاوصلك بنفسي علشان اطمن عليك..

باحبك ومن فضلك تطمني بنفسك لما توصل.. 

ب - ح - ب - ك = عايزة مصلحتك = باساعدك وفي ضهرك علشان تجرب = بادعي لك = باجاهد افكاري ونفسي علشان اواكب الزمن بتاعك ونفضل قريبين = باحترم احلامك = أنا سندك فيما لا يغضب الله عز وجل..

عزيزي الأب، عزيزتي الأم..خطابي النهاردة عن الدافع..

فرق كبير بين الشجرة الطيبة اللي اصلها ثابت وفرعها في السماء.. وفرق بين الشجرة الخبيثة..

فرق كبير بين الطفل والمراهق اللي بيتروي حب والطفل والمراهق اللي بيتغرق خوف.. 

ياللا نراقب نفسنا ونشوف دوافعنا مع فلذات اكبادنا ايه..

يللا نسمح لنفسنا نجرب نتحرك بالحب - غير المدلل ولا المؤذي ولا المفسد - بدل الخوف المرضي..

ياللا نفتكر الست اللي حبست القطة والقطة ماتت من نقص الإحتياجات…

ياللا نراجع نفسنا ونفتكر ان فيه موت نفسي وفيه موت بطئ.. مش بس موت الجسد..

ياللا نفتكر إن مفيش خوف هايمنع قضاء.. 

ياللا نحب ولادنا بدل ما نخاف عليهم.. نحبهم فنربيهم يحافظوا ويهتموا بنفسهم.. 

قوم يا مصري مصر دين واجب عليك..

قوم يا مصري.. مصر هاتقوم بتربيتك لقرة عينيك..

قوم يا مصري ولادك كنز مصر..ولادك كنز مصري.. 

حب ولادك يا مصري واديهم مساحة يجربوا ويكتسبوا خبرات في الحياة..