الحل الجذري لتحدي التوازن بين الحياة العملية والحياة الشخصية

في بداية العشرينات واحدة قريبتي اتصلت بوالدتي وبلغتها انها جايبة لي عريس.. وإنه دكتور. من قبل ما اروح الميعاد المتفق عليه كنت واخدة قرار إن الموضوع مش هايتم. أول سبب كان إني مش عايزة اتجوز جواز صالونات. وتاني سبب، والأهم، إني مش عايزة اتجوز دكتور (طبيب). 

مرت سنتين، اتجوزت خلالهم جواز صالونات صحيح، إنما مش من طبيب، اتجوزت مهندس. 

والدي الله يرحمه كان طبيب جراح. عاشق لشغله ومتفاني مع مرضاه، حريص على التدريس في القصر العيني وتأليف الكتب ومتابعة اخر التطورات العلمية في مجال الطب بصفة عامة، مش في الجراحة بس. وطبعًا ده كان له تأثير عليا. الصبح والدي في الجامعة، مع استراحة وقت الغذاء مع الأسرة، وبعد كده قيلولة وعيادة بيرجع منهم بعد ما اكون في سابع نومة. والنتيجة إني قررت اني ارفض اي عريس طبيب يتقدم لي لأني عايزة زوج يكون متواجد معايا، يشاركني تأسيس الأسرة وتربية الأبناء. 

بعد ما اتجوزت بدأ جوزي يشتغل بعد الضهر كمهندس بالإضافة الي شغله الصبح، مع فارق جوهري إنه كان بيشتغل من البيت، وكان بيخصص وقت للشغل ووقت للأسرة. وخلال السنين عمل ماجستير في التعليم، وقتها كان في قمة الانشغال، إنما برضه كان بيوجد وقت للأسرة، سواء وقت قليل خلال أيام الأسبوع أو وقت أطول خلال الويك اند. 

ومرت اكتر من عشرين سنة علي جوازي وأنا فكرتي عن الأطباء انهم ناس طبيعة شغلهم بتأثر علي تواجدهم مع اسرهم. وفي مرة كنت باحجز ميعاد عند طبيب كبير ومشهور، لاقيت إن مواعيده صباحية بس. استعجبت وسألت عن الموضوع، الرد كان إن الطبيب ده بيقدس الحياة الأسرية وبالتالي بيشتغل الصبح بس علشان يكون موجود مع اسرته وولاده مساءًا. يومها ضحكت ضحك.. علي عقلي وازاي تخيلت إنه قانون لا يتغير وإن الطبيب "لازم“ يشتغل مساءًا علشان يكون ناجح. ما اهو، طبيب مشهور وناجح و“متوازن“. 

ايه علاقة ده بقيادة الذات؟

علاقة محورية.. القائد سمة من سماته انه يكون عارف هو عايز يوصل لفين.. اللي بنسميها ”وجهة“… ومهم جدًا يعرف عايز يوصل ازاي؟ يعني عايز يوصل الوجهة دي لوحده؟ مع اصحابه؟ مع عيلته؟ يوصل بسرعة وممكن ياخد مخلفات في السكة/ياخد طرق غير مشروعة؟ ولا يوصل بشويش ويستمتع بالطريق ويرتاح كل شوية ويشحن قبل ما يكمل؟ قيادة الذات محتاجة حاجة مهمة اسمها التوازن بين الحاجات المختلفة اللي عايزها في حياتي.. توازن بين عمل وتعلم؟ بين حياة شخصية وحياة عملية وحياة اجتماعية؟ توازن بين سفر واستمتاع وخدمة وتطوع.. القائد محتاج يعرف هو عايز ايه يكون في المعادلة بتاعته. 

ابويا اختار يكون له اسهام مجتمعي عالي بجمعية أنشأها لخدمة المرضى. واختار يكون له مؤلفات وكتب، ويكون له حياة اجتماعية ثرية واصدقاء وسفر ولف حوالين العالم..ويكون له تواجد معانا اثناء الاجازات.. اختار اختيارات من وجهة نظره تحقق مفهوم التوازن بتاعه هو.. هل هو توازن بميزان كل حاجة واخدة وقت/اهتمام/تركيز/قلب/استثمار/متابعة زي الحاجات التانية؟ لأ.. 

قيادة الذات محتاجة كده.. اني اعرف أنا عايز ايه في المعادلة.. وايه مستعد يكون موجود بنسبة قليلة، وايه مستعد يكون مش موجود احياًنا وايه ممكن يكون موجود في المستقبل.. فاعمل توازن مناسب لكل مرحلة أنا فيها. وقت ما كان ولادي صغيرين كنت باشتغل وقت قليل جدًا.. ومحور اهتمامي الأول والأساسي كان عيلتي.. لما كبروا شوية بقيت اخد وقت لنفسي اكتر واهتم بالقراءة وبعد شوية بقيت مهتمة بشغلي اكتر.. كل مرحلة كان لها التوازن الخاص بيها..

علشان كده موقف/Attitude مهم جدًا ومحوري لقيادة الذات هو التوازن/Balance

ما بين التوازن والانسجام.. 

احد المفاهيم اللي بقت متداولة حاليًا هي مفهوم “الانسجام” Harmony.. وليس التوازن.. يعني كُتَاب ومؤلفين اتكلموا إن التوازن ده هدف مستحيل المنال، وإن الهدف اللي الإنسان يسعى له هو الانسجام… بمعنى الانسجام بين الأدوار اللي بيلعبها في الحياة والمهام اللي وراه والأنشطة اللي على اجندته.. انسجام انه بيوزع وقته بشكل مش متساوي، إنما كل حاجة عنده واخدة اهتمام قد ما هو عايز يديها اهتمام. وبالتالي المؤلفين اصحاب دعوة الانسجام بيدعوا الي استبدال كلمة توازن بانسجام.

ستيفن كوفي والأشياء الأولى أولًا..

مؤلف كتاب العادات السبعة للأشخاص الأكثر فاعلية، ستيفن كوفي، أكبر وأول Role Model ليا من المؤلفين الغربيين. منه ومن كتابه اتعلمت مفهوم التوازن، ومن تاني كتاب قرأته له بعنوان First things first فهمت بعمق اكبر مفهوم الأولويات.. وازاي التوازن (او بالإسم الشائع الجديد له الانسجام) مش مقصود بيه ادي وقت متساوي للحاجات اللي في حياتي.. إنما احدد اولوياتي ايه، واستثمر وقتي - اللي هو أهم رأسمال عندي - في أهم أولويات في حياتي.

وبالتالي احقق التوازن ازاي؟ وقود ذاتي ازاي؟

علشان اقود ذاتي محتاج اعرف اولوياتي، كويس جدًا.. ايه مهم عندي؟ 

ايه مهم عندي لأنه مرتبط بقيمي؟

ولما اعرف ايه مهم عندي، ابدأ ارتب المهم بمنظور الأولوية، واستثمر وقت في كل أولوية منهم وفقًا لأنا عايز رحلة حياتي - قيادة لذاتي - تكون مذاقها ايه. وبالتالي مش كل حاجة على طبق حياتي قد التانية.. ولا كل يوم الطبق شبه التاني. إنما لو بصيت للأسبوع الاقي إن خلال الأسبوع وفيت مع الأولويات كلها.. بنسب مختلفة لأني أنا مختار ومدرك عايز المذاق الغالب على وجبتي ايه.

مثلًا في وقت ما كان ولادي صغيرين كانت اسرتي أهم اولوياتي وكنت عايزة يكون عندي سلام داخلي.. وقتها كنت بتعلم تجويد واحفظ قرآن.. وكنت عايزة ولادي يكون عندهم اصدقاء من عائلات اثق فيها، فكان عندي اصدقاء لهم اولاد من سن ولادي، بنخرج ونسافر مع بعض علشان ولادي يكون عندهم محيط من الأصدقاء سلوكهم وقيمهم وافكارهم متناسبة مع اسرتي وقيمنا..  

لما ولادي كبروا بقى من ضمن اولوياتي صحتي.. وبقيت عايزة استمتع بولادي برضه.. وبقيت عايزة اخدم مجتمعي.. وبقيت عايزة اتعلم واعلم وبالتالي طبقي بقى في المرحلة دي عليه عمل اكتر.. وممتع.. في حين في مرحلة قبلها كان عليه عمل برضه (تربية ولادي) وممتع، إنما بشكل مختلف… متعة وجود اصدقاء في فترة.. ومتعة وجود رفقاء في خدمة المجتمع في فترة..

قيادة الذات بين التوازن والانسجام..

نقطة البداية إني:

١-  افكر أنا عايز ايه.. لو عايز اقود ذاتي محتاج اكون متوازن… واحدد لنفسي بوضوح خلطة التوازن الخاصة بيا مقاديرها ايه (أو سميها الانسجام لو الاسم الجديد ده مريحك اكتر، كلها مسميات في الأخر :) ). 

وبعد كده:

٢- احول المقادير دي لأولويات في اسبوعي، مش يومي، زي ما ستيفن كوفي شرح في كتابه عن العادات السبعة وقدم مفهوم الأسبوع بدل اليوم علشان يكون فيه مساحة للاهتمام بجوانب مختلفة في الحياة (أولويات مختلفة).

وبعد كده، وهي نقطة محورية اتعلمتها من كوفي برضه من العادة السبعة في كتابه بعنوان Sharpen your saw اني:

٣- يكون عندي وقت بشكل اسبوعي ارتاح فيه واغذي جوانبي الأربعة كإنسان (الروح، والعقل، والبدن والقلب) علشان اشحن وارجع الأسبوع الجديد مليان طاقة واكمل بحيوية ودافعية وحماس.

موقف محوري لكل إنسان عايز يقود ذاته إنه يكون متوازن بين جوانبه الأربعة كإنسان ومتوازن في أولوياته في الحياة. 

#لو عايز تتعرف على قيمك علشان تحدد اولوياتك اعمل اختبار القيم اللي في اللينك ده 

https://bit.ly/3x8LLNv

#لو بتسعى إن حياتك تكون افضل كإنسان اقرأ كتاب ستيفن كوفي بعنوان العادات السبعة للأشخاص الأكثر فاعلية

#لو بتسعى إن حياتك تكون افضل كرب اسرة اقرأ كتاب ستيفن كوفي بعنوان العادات السبعة للعائلات الأكثر فاعلية

#ولو  عايز تتعرف اكتر على الجوانب الأربعة لك كإنسان اتفرج على فيديو روبين شارما في اللينك ده

https://www.youtube.com/watch?v=986RpUg8FCc

#الموقف_الأول_التوازن

#كتابة

#قراءة

#تعليم

#تطبيق

#مجتمع

#كن_إنسانًا

#سيب_اثر