وصفة مضمونة لما تحس بالحزن....

الطوبتين وحكايتهم معايا.. مع ملك وفاروق!

احد الحاجات اللي اتعملتها من روبين شارما، خبير القيادة العالمي، أهمية الإهتمام بالصحة النفسية.. اني اكون ملاحظة نفسيتي والجأ لناس متخصصة تساعدني اطيب، زي كده ما بروح للدكاترة... واني اعمل ده من قبل ما نفسيتي تسوء ولا اوصل لحالة اكتئاب.. 

بعد سفر فاروق ابني نفسيتي اتأثرت.. كنت مرة في معسكر تبع شغلي ووأنا بعمل كولاج قصيت صورة عيلة من أربعة، أب وأم وولد وبنت.. ولصقتها، ولاقتني حاسة بحزن وعينايا بدأت تتملي دموع..وفعلًا وقتها حسيت بسحابة حزن مغلفاني..

الشهر اللي بعده اشتركت في معسكر لمعالج نفسي.. وفيه كان بيتكلم عن المشاعر.. وقلت له اني حاسة بحزن بعد ما فاروق ابني سافر.. رد قال لي انت أم بتحب ابنها فعلًا.. حبك له ما خلاكيش تقفي في طريق مستقبله ولا قدام رغبته في التعلم بره.. حبك له حقيقي وعلشان كده خلتيه يسافر حتى لو ده هيخليكي حزينة.. قلت له طيب واعمل ايه مع الحزن؟ اتعامل مع الشعور ده ازاي؟

قال لي الحزن جاي في المرحلة دي في حياتك علشان يعلمك حاجة.. استخدميه كأداة للدور اللي ليكي على الأرض في المرحلة الجاية..!

كلمته نورت معايا.. في فترة كان الحب رسول أو المرض رسول.. أو العجز رسول.. ودلوقتي الحزن رسول.. ُمعَلِم.. 

كلامه فتح لي طاقة نور.. وراني منظور مختلف..

ورجعت فكرت في روبين شارما تاني.. اعمل ايه؟ لاقيت واحدة من الدروس المحورية اللي اتعملتها منه هي اني ارجع اعيش ذكرى حلوة.. وفكرت في القرآن الكريم.. "وَأَنَّهُ هُوَ أَضْحَكَ وَأَبْكَى".. ففكرت كل ما احس بالحزن استرجع ذكرى حلوة مع فاروق.. اعيشها زي ما شارما قال، اقعد في مكان هادي، اغمض عيني واسترجع الذكرى بكل الحواس، افتكر الأصوات، الريحة، الألوان، الإحساس، الطعم لو كنا بناكل..كلامنا.. كنا لابسين ايه..

واحدة من الذكريات دي بحبها جدًا.. ذكرى في لحظة فرقت في علاقة.. 

يومها كنا في المصيف على البحر، كنت قاعدة مع فاروق وافتكرت ازاي ملك في سنة قبلها نحتت طوبة على شكل قلب وقدمتها لي.. قلت اطلب من فاروق ينحت لي قلب.. نقيت طوبة من الرملة واديتها له وقلت له يعملها قلب.. بعد شوية محاولة قالي: "مامي يا حبيبتي، انسي القلب.. خدي دي.." واداني طوبة ما بين المربع والمستطيل المعووج.. ضحكنا.. واخدتها.. وبقيت هي والقلب بتاع ملك من اغلى ما املك على مكتبي.. 

يومها اللحظة خلتني استوعب الفرق بين الولد والبنت.. زي ما جون جراي مؤلف المريخ والزهرة ما شرح.. لو عايزة حاجة من المريخي اطلب.. هو مش هيبادر.. زي ما طلبت من فاروق القلب.. والحاجة التانية ان ولادي بيحبوني.. وكل واحد منهم عنده قدرات ومواقف (Attitudes).. ملك عندها قدرة على نحت القلب وموقف الإبتكار.. فاروق كان عنده قدرة اجابة الطلب وموقف الصراحة..(خدي دي :) )

يا ترى ايه المشاعر اللي غالبة علي نفسيتك دلوقتي.. وبتتعامل معاها ازاي؟

ويا تري ايه استراتيجيات بتلجأ لها علشان تتعامل مع المشاعر اللي طاقتها سلبية؟

ويا ترى مستوعب ان البكاء رسول والضحك رسول.. وإن كل حد وحاجة حواليك ربنا سخرها علشان انت تقوم بدروك على الأرض.. كعبد.. كخليفة؟

يالا في علاقاتنا نعيش لحظات..

 نرجع لها في اصعب الاوقات..

 وتساعدنا نعيش حياة احسن لحد الممات…

#علاقات_في_لحظات

#مشاعر

#ذكريات

#الخير_موجود

#اروي_غيرك

#تفاءلوا