الخطاب العاشر: القانون وروح القانون

من وانا صغيرة اتربيت بالقانون..

مطالبة بالإلتزام الصارم من امي، 

الكلمة بتاعتها بتتنفذ..ومش بترجع فيها…

الحياة بميعاد.. والواجب مقدس..

والشبشب في رجلي ويا ويلي لو مشيت حافية..

فضلت عايشة بالقانون… بدون اي تهاون..

لحد ما جاه يوم وأمي بنفسها خرقت القانون.. 

ومن اليوم ده اتعلمت منها درس عظيم..

باعتبره من اعظم دروس التربية..

درس عن روح القانون..

كنا مسافرين بره مصر.. وكان فيه محل حاجته تحفة.. وامي عملت ميزاينة ليا وميزانية لأختي علشان كل حد يشتري منه.. ومن جمال الحاجات اللي في المحل.. ميكي ماوس وبطوط وكلام من اللي بيخبل الكبار الأطفال الي كنت منهم وانا عندي 16 سنة.. كان لسه نفسي اشتري حاجات والميزانية مش هاتقضي.. ماطلبتش من امي، لأني بمعرفتي بيها هي بتاعت قانون..وكلمتها مش بتنزل الأرض…ولاقتها من نفسها، ولأنها شايفة انا واختي ازاي معجبين بحاجات في المحل، لاقيتها زودت الميزانية.. وسمحت لنا نشتري اللي نفسنا فيه..!!

بالنسبة لكتير من الناس ده عادي..ايه يعني ميزانية ومحل واطفال شبطانة تشتري حاجات..؟

بالنسبة لي ده كان مش عادي..

كان احساسي ان امي حاسة بيا، ونفسها تبسطني، نفسها فعلًا تسعدني..

في الحياة العادية فيه قانون وانضباط…

وفي سفرية بره مصر ومحل ميكي (ديزني ستور) اللي مش عارفين هانزوره تاني ولا لا.. فيه مرونة..

في الحياة العادية فيه انضباط علشان الإنسان يطلع مواطن نافع..

وفي الإستثناءات فيه مرونة علشان يطلع فاهم روح القانون وبيتعامل بيه مع اللي حواليه..

عزيزي الأب، عزيزتي الأم..

خطابي النهاردة مش عن روح القانون..

خطابي عن القانون..

للأسف الزمن اللي احنا فيه، أهل كتير (إلا من رحم ربي) بقى روح القانون هو القاعدة.. حياة عشوائية، همجية عايشينها ولادنا.. 

بدون قواعد ولا حدود ولا علاقة بين اب/ام عندهم فكر وقانون مدروس وهدفه انه يطلع انسان مستقيم..

وبين طفل ومراهق وشاب تايه وتعبان لأنه مفيش قانون..

كتب علم النفس بتشرح ازاي الطفل محتاج نظام، سيستم، علشان يحس بالأمان.. محتاج ولي امر يكون عنده سلطة في حياته لأن ده بيولد عنده شعور بالأمان، ان فيه حد سايق السفينة.. (من كتب جون جراي مؤلف الرجال من المريخ والنساء من الزهرة والأطفال من الجنة)

احنا حال ولاد كتير في مجتمعنا ايه؟

مرونة عالية جدًا.. او قانون غير مدروس..غير مواكب للعصر اللي احنا عايشين فيه..

قانون اباؤنا الأولون.. اللي كانوا عايشين في القرون الوسطى بلا موبايل ولا تابليت ولا انترنت ولا اوبر ولا ماكدونلدز والتيك توك وخلافه..

او مرونة بتاعت اعمل اللي انت عايزه وكده برضه تفشل مع اننا مدلعينك على الأخر وكل طلباتك مجابة..!!

يا اهل المحروسة افيقوا..

مستقبل الدنيا، مش مصر بس، في ايد ربنا ثم كل حد انجب وساهم في زيادة التعداد السكاني..

ابني وبنتي وابنك وبنتك محتاجين قانون + روح القانون..

قانون يحترم القرن الواحد والعشرين ومفرداته..+ مرونة بحدود.. 

اوعى ما مصري تربي ولادك كأنهم في السبعينات من القرن العشرين..

لأنهم يا هايطلعوا سذج ويتضحك عليهم.. يا هايمثلوا عليك البراءة وتطلع انت مخدوع..

ربيهم بقانون ومرونة.. ربيهم ينفعوا مجتمعهم.. اللي محتاج قانون وروح قانون..

قوم يا مصري مصر دين واجب عليك..

قوم يا مصري.. مصر هاتقوم بتربيتك لقرة عينيك..

قوم يا مصري ولادك كنز مصر..ولادك كنز مصري.. 

ربي ولادك يا مصري. بقانون مدروس متحضر ومرن يا مصري……