الخطاب السادس عشر: عرض المساعدة على ولادنا المضغوطين

responsibility strategies stress support teenagers

”لو عايزة تساعديني فعلًا حضري لي الفطار كل يوم اتنين واربع… 

تحضير الأكل لHoney مش مشكلة..”

من كام يوم لاحظت ان بنتي مضغوطة.. 

الجامعة بدأت والتعلم اسبوع في الجامعة واسبوع اونلاين من البيت ملغبطتها..

جدولها وفكرة إن يوم تبدأ الساعة ٨ ويوم ٩ 

وأيام تخلص الساعة اربعة ويوم تخلص واحدة..

الدراسة بالكمامة لمدة ٨ ساعات في الأيام الطويلة..

الموضوع كله مسبب لها ضغط..

 

في الأول اتكلمت معاها.. فكرتها إن الstress مرض العصر وانه بيسبب امراض عضوية…

وطلبت منها تراجع استراتيجيات كانت اتعلمتها معايا قبل كده عن التعامل مع الضغط..

مر يوم وهي لسه مضغوطة.. فكرت مع نفسي اعمل ايه؟

ممكن اعلمها ايه خلال الفترة دي؟

فكرت في درس من دروس الحياة اسمه عرض المساعدة

إن الإنسان لما يلاقي الناس اللي بيحبهم مضغوطين 

يعرض عليهم مساعدة من غير ما يستنى إنهم يطلبوا منه..

بالليل قلت لها اني مستعدة يومين في الأسبوع اتولى تأكيل كلبتها بدلها..

وإن وقت الإمتحانات هاحميها بدلها..

سمعتني.. وشكرتني.. وبعدين قالت لي اني لو عايزة فعلًا اساعدها، احضر لها الفطار في ايام المحاضرات البدري..

لأنها في العادي بتحضر الفطار لنفسها.. 

انما في الأيام اللي بتبدأ الساعة ٨، هي دي اللي فيها محتاجة مساعدة..

خلال الأسبوع اللي فات ساعدت بنتي زي ما طلبت.. 

وحسيت بالسعادة..

اني بدل ما اطلب منها بس تتعامل مع الضغط بشكل ايجابي..

وصل لها اني حاسة بيها، وعايزة اخفف عنها 

من غير ما اضغطني ولا اشيل عنها “كل” مسؤولياتها..

وحسيت بالسعادة إني “أم” مش راعي غنم..

دورها مع ولادها مش بس اكلة وهدمة وفرشة وكمامة ووصلة نت..

دورها تعلم بالقدوة ازاي الواحد يساعد اللي حواليه..لما يلاقيهم مضغوطين..

والمهم من غير ما يطلبوا..يبادر هو بعرض المساعدة..

عزيزي الأب، عزيزتي الأم..

خطابي النهاردة عن “عرض المساعدة على ولادنا المضغوطين”

الحمد لله إن احنا - حضرتك وأنا - نفدنا من التعلم بنجاح وسقوط وشهادات في زمن الكورونا..

وما ادراكم كم الضغط اللي فيه كل الشركاء في المنظومة التعليمية من اداريين ومدرسيين وطلاب واكيد احنا أولياء الأمور..

فياللا بينا نخفف عن ولادنا الضغط بإننا نوصل لهم الدعم والحب…

من خلال عرض المساعدة بدون تدليعهم ولا ضغط نفسنا لحد ما نطق وننفجر في وشهم..

 

قوم يا مصري مصر دين واجب عليك..

قوم يا مصري.. مصر هاتقوم بتربيتك لقرة عينيك..

قوم يا مصري ولادك كنز مصر..ولادك كنز مصري.. 

حس بولادك المضغوطين يا مصري.. واعرض عليهم مساعدة..

وساعدهم بحب يا مصري من غير تدليع ولا تقطيم ولا مَنّ..

بعاداتي باصمم حياتي

سلسلة بعاداتي باصمم حياتي - ١٧ حلقة هدية للتعرف على كيفية تبني العادات والإلتزام بها