الخطاب الرابع عشر: المقارنة وعدم مراعاة الفروق الفردية

comparasion emotions individuality parenting teenagers words

طول عمرك مغلباني.. شقية ومش بتقعدي.. 

مش مريحة زي اخواتك…!

ياخبر عليك.. متعب من يوم ولادتك…

طول الوقت تزن وعامل دوشة..

ليه ما طلعتش هادي زي اختك..!

ياخبتك..شايفة اختك جابت مجموع كام…

مش انت..كسفاني طول الوقت..!!

مش عارف ليه ماطلعتش بطل زي اخوك.. بص جاب كام ميدالية…

وانت فاشل.. ماكملتش حتى في رياضة واحدة..!!

 

يا ترى الرسالة وصلت؟

المقارنة سم قاتل..

احد الآفات المنتشرة في البيوت.. المتغلغلة في قاموس الأسر المصرية..

جمل وتعليقات بتتقال بطريقة عفوية..

لو سجلنا لنفسنا كلامنا وحللناه في الأغلب هنتخض من كم الكلام اللي فيه مقارنة..

روحي اغسلي سنانك زي اختك.. خلصي طبقك زي اخوكي.. سرحي شعرك زي بنت عمتك..

مقارنة بنستعملها غالبًا بحسن نية… انما هل النية الحلوة اخرتها حلوة في الموضوع ده؟

 

عزيزي الأب، عزيزتي الأم..

ابني وبنتي وابنك وبنتك بسبب تغير الهرمونات في مرحلة المراهقة

ثقته في نفسه بتبقى مهزوزة.. حتى لو بين غير كده..

بيبقى قلقان.. تغيرات في جسمه وشكله وصوته..

بيتنقل من اعدادي لثانوي.. 

بيطول فجأة او مش بيطول..

بيخس او بيتخن.. 

وبالتالي بيبقى حساس جدًا في المرحلة دي.. 

بيبدأ يحتاس في تسريحة شعره وستايل لبسه..

لأنه بيتنقل من طفل لمرحلة متوسطة كشاب او شابة..

وبالتالي المقارنة حتى لو بحسن نية بتهز ثقته في نفسه اللي هي اصلًا مهزوزة

يعني بالبلدي كده.. بحسن نية بنزود الطين بلة..

بس؟

لا طبعًا.. 

ربنا سبحانه وتعالى علمنا ازاي الغيرة نار مؤذية.. 

وقصة قابيل وهابيل درس لنا.. عن ازاي ممكن الغيرة تخلي اخ مش بس يؤذي اخوه.. 

لأ توصل انه يقتله.. 

محتاجين ايه درس اوضح من كده؟

يعني المقارنة بتكهرب العلاقة بين الطرفين اللي بينهم مقارنة..

واحد ممكن يحسد ويحقد..وواحد ممكن يتغر ويحتقر غيره..

 

عزيزي الأب، عزيزتي الأم..

عمرك شفت سمكة بتتسلق شجرة؟

أو قطة بتغوص في المحيط؟

أو كلب طاير في السما..؟

صوابع ايدينا مش زي بعضها..

وولادنا كمان كده.. 

منهم السمكة ومنهم القطة ومنهم الطير..

(مش هاقول منهم الكلب مع اني من محبي الكلاب :) )

كل واحد منهم عنده امكانيات وملكات ومواهب وقدرات.. 

كل واحد عنده طباع واساليب تعلم..

كل واحد عنده شخصية ومهارات..

كل واحد.. واحد.. مش زي التاني..

 

طيب بلاش.. انت بتحب المقارنة؟

يعني مثلًا لو رجعت بالذاكرة وفكرت في واحدة معايا في الفصل

 كانت واحدة من المدرسات بتقارني بيها

هل احنا اصحاب؟

هل باحبها؟

طيب هل باحب المدرسة اللي كانت بتقارني بيها؟ 

هل عندي تجاهها مشاعر ايجابية صحية…؟

للأسف.. كانت مشاعر طعمها مر…

 

اعزائي اولياء الأمور..

ياللا نراقب نفسنا… لكام يوم.. ونشوف اخبار قاموسنا ايه..

الوعي اول الحل..

وبعدها.. ؟

وبعدها نفكر احنا بنقول اللي بنقوله ليه..؟

ونراجع توقعاتنا من ولادنا.. ونفكر هل بنطلب من السمكة تغرد..؟

ولو بنطلب حاجة فيها تعجيز نبطل..

ونفكر ونتكلم مع ولادنا في امكانياتهم واحلامهم 

وايه محتاجينه منا علشان نساندهم في احلامهم.. 

 

قوم يا مصري مصر دين واجب عليك..

قوم يا مصري.. مصر هاتقوم بتربيتك لقرة عينيك..

قوم يا مصري ولادك كنز مصر..ولادك كنز مصري.. 

وقف المقارنة بين ولادك يا مصري واسمح لكل واحد يكون ه. بقدراته وطباعه هو… 

بعاداتي باصمم حياتي

سلسلة بعاداتي باصمم حياتي - ١٧ حلقة هدية للتعرف على كيفية تبني العادات والإلتزام بها