الخطاب الحادي عشر: “التجارب وبناء الثقة بالنفس

مامي.. أنا عايزة اروح معسكر مع شركة….. 

مامي.. أنا عايزة اشترك في تمرين.…

مامي.. أنا عايزة اخد دروس موسيقى..

مامي أنا مش عاجبي البيانو وعايزة اجرب اعزف درامز.. 

مامي أنا عايزة اتعلم اسباني..

مامي أنا عايزة اسيب تمرين الترامبولين.. ومش عايزة اشترك في حاجة تانية…

مامي أنا عايزة اشتري اجيب كلب.. 

مامي أنا عايزة اخد حصص تمثيل...

مامي انا عايزة اروح اتفرج على مسرحيات..

مامي أنا عايزة اروح النادي اتفرج على رياضات مختلفة..بس من غير ما اشترك!

مامي أنا اتفرجت وعاجبني الغطس وعايزة اشترك فيه..

مامي أنا مش عاجبني الغطس خلاص.. مش عايزة اكمل.. 

مامي.. أنا مش عايزة اخد حصص مهارات فنية خلاص.. بقى لي 4 سنين مواظبة عليها وعايزة اتعلم لوحدي..على النت من غير دروس..

مامي أنا عايزة احضر تدريب في شركة المعسكرات..

مامي أنا باحلم اشتغل مع شركة المعسكرات..

مامي.. انا قبضت اول مرتب ليا..

مامي.. !! مش هاتصدقي.. شركة المعسكرات طلباني في انترفيو علشان فيه ترقية.. وأنا واحدة من اللي اسمها ضمن اللي ممكن ياخدوا الترقية..

سنين.. سنين عشتها مع ملك بنتي.. 

من اول ما تمت 3 سنين اشتركت لها في تمرين جمباز في النادي.. علشان تطلع الطاقة وعلشان تتربى علي الرياضة.. 

مرت سنين وبنتي من رياضة لرياضة ومن مهارة فنية لمهارة..

جربت حاجات كتير.. وكانت كل فترة تتكلم معاي وتسرد اسباب اللي علشانها هتسيب حاجة او هتجرب حاجة جديدة..

خلال السنين دي كان عندها مدرسة.. وامتحانات.. وبطولات رياضية.. وحفلات موسيقية.. ومعسكرات شغل.. 

الأسبوع اللي فات كان عندها انترفيو.. للترقية.. ووهي رايحة كانت قلقانة.. قلت لها اني متأكدة انهم هيختاروها.. واني فخورة بيها.. بقيت بتدرس في كلية الهندسة… ولسه بتسعى انها تشتغل.. 

وفعلًا يوم الإنترفيو بالليل طلعت النتيجة وملك اتقبلت..واترقت.. وكانت سعيدة.. 

وطبعًا انا كنت اسعد.. الحمد لله.. لأنها مجتهدة ولكل مجتهد نصيب على رأي أمي..

ومع الخبر.. فكرت فيها وهي في ابتدائي.. وازاي شرحت لي انها اليوم اللي بيبقى عندها واجب بس فيه بعد المدرسة ومفيش اي نشاط رياضي او فني بتحس بالملل وبتضيع وقت وبتتأخر في الواجب.. وازاي اليوم اللي بيبقى عندها اشنطة بتتحمس وتخلص المذاكرة علشان تروح في الميعاد.. 

وازاي سمعتها واتفقنا انها تجرب.. والمقياس رضا المدرسين عنها وعن جهودها والتزامها.. 

وازاي بالتجربة فعلًا بقيت بتطلع طاقة في الرياضة، وبتنمى وظائف عقلها الإبداعية والفص الشمال من مخها خلال الأنشطة الفنية والموسيقية.. وازاي الشغل من اعدادي نمى ثقتها في نفسها وخلاها ارحم واكثر تعاطفًا باللي حواليها..من تعاملها مع ناس من دواير مختلفة وخلفيات وثقافات متعددة..

وفكرت.. وفكرت فينا عزيزي الأب وعزيزتي الأم…

هل بنسمح لولادنا بالتجربة؟ بالتجديد؟ 

لما بيقولوا مش عايزين يكملوا في حاجة هل بنتهمهم بالتخاذل..وبنجبرهم يكملوا..؟

ولما بيقولوا عايزين يجربوا حاجة هل بنتصرف بتسرع أوانانية أو عدم حكمة..وبنتصرف بخوف وقلق..؟

هل بنديهم مساحة يتعرفوا على نفسهم وميولهم وبنشجعهم يجربوا حاجات مختلفة ويقابلوا ناس في دواير مختلفة في مدرسة الحياة..؟

ولا حابسنهم في دايرة صغيرة ما بين المدرسة وتمرين واحد (ان وجد) وممنوع يغيروه؟

ولا كل عطاءنا لهم فسح وأكل بيرجعوا منها ولا اكتسبوا خبرات ولا نموا مهارات ولا زاد وعيهم بنفسهم؟

يا مصري.. 

بنتي وابني وبنتك وابنك محتاجين يجربوا، يكتشفوا، يتعاملوا مع ناس، يحتكوا بالحياة الحقيقية..

الا طبعًا لو مصممين نقدم للدنيا ناس ساذجة وثقتها في نفسها ضعيفة وهيتضحك عليها من القريب والغريب..

خطابي النهاردة عن الحياة.. التجارب والتجديد.. 

بناء إنسان واثق في نفسه.. مش رعاية طالب بالعصا والجزرة..كرعاية الراعي لغنمه..

قوم يا مصري مصر دين واجب عليك..

قوم يا مصري.. مصر هاتقوم بتربيتك لقرة عينيك..

قوم يا مصري ولادك كنز مصر..ولادك كنز مصري.. 

شجع ولادك يا مصري يجربوا ويكتسبوا خبرات وينموا ثقتهم بنفسهم..