بيجاما وفانلة وريحة محشي

وفاروق ابني في ثانوي عزم حد من اصحابه يجي له البيت، 

صاحبه رد وقال له ممكن تتفق مع والدتك الأول؟ ففاروق رد بتلقائية وقال له مامتي مش هتمانع

صاحبه قال له عشان بس مامتك تلحق توضب البيت قبل ما اجي لكم،

فاروق ضحك وقال له بس بيتنا متوضب

ورجع من المدرسة حكى لي الحوار وضحكنا..

وانا بفكر في التصرفات المدمرة، لاقيت واحدة من التصرفات المدمرة للعلاقات هي الإهمال

إهمال الجمال داخل جدران البيت..

ست اتجوزت، كانت بتهتم بنفسها وجوزها اتجوزها علي حال،

بعد كام شهر يلاقيها تحولت الى واحدة تانية

لابسة بيجامة في البيت وشعرها منكوش وريحتها طبيخ..

وبيت مبهدل..

يخرج يلاقي ستات مهتمة بنفسها، 

يروح الشغل يلاقي زميلات او عملاء اللي لابسة واللي متزوقة واللي متشيكة..

يرجع يفتح التلفزيون يلاقي ستات على سنجة عشرة..

يبص على مراته يلاقي شئ غريب..

والزوجة.. في البداية تاخد راجل لابس ومتسرح وريحته تمام..

بعد الجواز تلاقي راجل قاعد بالفانلة وكرشه يبدأ يدلدل..

ويبدأ صوته يعلا ويتحول الى واحد تاني..

وتروح الشغل تلاقي زمايل لابسة وريحتها كويسة ومتسرحة..

تفتح التلفزيون تلاقي رجالة بتتكلم برومانسية مع ستات غريبة

وتلاقي المسلسلات بتوري ان الزواج فاشل والأزواج غير سعداء وان الزوج طبيعي يكون مش رومانسي..

تندب حظها على الزواج، وتقول ما يستاهلش اني اتزوق له..

تصرفات مدمرة..

• اهمال الزوجة لنفسها بعد الزواج تصرف مدمر لها نفسيًا 

وبلاش حجة البيت والأولاد في عشر دقايق ممكن ناخد دش ونلبس حاجة نضيفة ونرش رشة ريحة حلوة

• اهمال الزوجة لوزنها بعد الزواج والخلفة تصرف مدمر، 

وبلاش نحط اللوم على الراجل او على الوقت. دي ثقافة للاسف موروثة.. 

وكأن الطبيعي اننا نخلف ونفشول والراجل يلاقي كائن ضخم ملحوس علشان بقت ام 

• اهمال الزوج لنفسه جوا البيت تصرف مدمر، 

لأن الست بتحب الراجل اللي واخد باله من نفسه، اللي جسمه مفتول مش كرشه مدلدل 

• اهمال الزوج لمساعدة الزوجة في البيت تصرف مدمر،

 الرسول عليه الصلاة والسلام كان بيساعد.. بالتالي القاء كل مسؤولية البيت على الست وانتظار انها تبقى سنيورة وغندورة تصرف مدمر للأسرة..

• اهمال الزوج والزوجة لنفسهم تصرف مدمر للعلاقة الزوجية،

 ومدمر للأسرة..لأن الأولاد بيشكلوا معتقداتهم عن الزواج والأسرة من بيتهم الأول، بيت الزوجية بتاع امهم وابوهم

• اهمال الزوجين للبيت، وانهم يسيبوه يتحول لمكان قبيح،

 تصرف مدمر. مين فعلًا يحب يعيش في مكان مكركب ومترب ومش نضيف؟ 

• الطفل اللي بيكبر في بيت بالشكل ده، 

بيعتاد القبح ونفضل في دايرة لا تنتهي، انه يكبر ويقبل القبح في بيته وولاده نفس الشيئ

الزوجة..

 ارجوكي البجاما لبس النوم، وزوجك والأولاد محتاجين يشوفوكي شيك بتلبس مريح في البيت..

والبسي واتزوقي اصلًا عشانك مش عشان حد.. 

وخلي اهل بيتك يلاقوا ام شبه الستات اللي بيشوفوها بره متشيكة، فيشوفوكي بعين تانية، عين فيها اعجاب بيكي.

الزوج..

ارجوك همتك في البيت شوية، يا توفر لها حد يساعدها، يا ايدك معاها، عشان تلحق تهتم بنفسها..

وانت اشفط كرشك والبس حاجة مريحة حلوة، الفانلة لبس داخلي مش لبس بيت..

والأسرة كلها..

 اتعاونوا ان بيتكم يبقى مكان مريح نفسيًا، والنفس بتحب الجمال والبساطة..

اهمال اهل البيت لنفسهم وللبيت تصرف من اكبر التصرفات تدميرًا للعلاقات..

اللهم بلغت، اللهم فاشهد..

البيت، البيت، البيت..

اهم مكان نبدأ بيه علشان حياتنا تستقيم..

انتظروني كل خميس مع مقالة جديدة من 

#تصرفات_مدمرة_١٨