الزواج بعد سن الأربعين

والدي الله يرحمه اتجوز بعد ما عدى سن الأربعين..

لما كبرت بدأت أتساءل ليه والدي كبير كده؟ اكبر من آباء اصحابي..

وكمان الفرق في السن بينه وبين امي كبير جدًا..

امي حكت لي ازاي جدي لوالدي اتوفى ووالدي في ثانوية عامة،

وازاي والدي اتخرج من كلية طب واختار يجوز كل اخواته الأول

 قبل ما هو يتجوز، بالرغم من انه اكبرهم سنًا..

كبرت وشفت ازاي والدي كان بيحب اخواته، واولاد اخواته..

ازاي بيقف معاهم في احلامهم، وازاي بيساندهم وقت الشدة..

وأمي؟

أمي شفتها بتحب اخواتها جدًا،

وكمان بتهتم بيهم وأولادهم، وكمان باحفادهم..

مرة كانت رافضة تنزل معانا، ولما خالي طلب منها تخرج نزلت، 

هزرت معاها وقلت لها بقى كده؟ بتحبي اخوك اكتر من بناتك؟

قالت لي ايوه طبعًا..

ده اخويا.. معايا من قبل ما انتم تتولدوا..

امي وابويا الاتنين كانوا نموذج صحي للترابط بين الأخوات..

تصرف مدمر لما ام او اب يقعدوا يشتكوا من اخواتهم قدام ولادهم..

او يقاطعوهم او ياكلوا حقهم في الميراث، او او..

طيب اللي بيعملوا كده، متخيلين اولادهم لما يكبروا يعملوا ايه في بعض؟

ما هو ولد كبر شاف ابوه بيعادي اخواته..

او شاف امه مقاطعة اخواتها..

مهم جدًا اننا نستوعب ان اولادنا بيتعلموا من تصرفاتنا اكتر بكتير من كلامنا او مواعظنا..

خلينا نستعيذ بالله من الشيطان اللي بيوقع بين الأخوات..

ونفتكر قصة سيدنا يوسف عليه السلام..

وازاي اخواته رموه في البير..

وازاي عليه السلام قال لهم "قلَ لَا تَثْرِيبَ عَلَيْكُمُ الْيَوْمَ ۖ يَغْفِرُ اللَّهُ لَكُمْ ۖ وَهُوَ أَرْحَمُ الرَّاحِمِينَ " سورة يوسف

وانا بدرس إرشاد ودعم نفسي، قرأت كتاب كان مقرر علينا، اسمه معنى الحياة.

الكتاب في فصل من الفصول اتكلم على ترتيب الأبناء، وتأثير ولادة طفل جديد على الأطفال الموجودة ونفسيتهم،

وازاي ممكن الطفل الأكبر يفضل في حالة تنافس وصراع نفسي لما يجي له اخوات..

الكتاب كمان اتكلم على الطفل الأخير والمدلل..

واللي ممكن الأهل يدلعوه لحد ما يبوظ..

الطبيب النفسي استفاض في الحديث عن علاقة الأخوات ببعض وبالأهل،

وتأثيرها على نمو الإنسان ونضجه النفسي..

قرأت الفصل وانا بفكر في علاقة أمي باخواتها وعلاقة والدي الله يرحمه باخواته..

وحسيت بتقدير وامتنان انهم ضربوا لنا انا واخواتي مثل عظيم في حب الأخوات..

وربونا بالقدوة مش بالوعظ على حب بعض اخواتي وانا..

وغرسوا فينا معنى حديث رسولنا الكريم عليه الصلاة والسلام: "مثل المؤمنين في توادهم وتراحمهم وتعاطفهم مثل الجسد إذا اشتكى منه عضو تداعى له سائر الجسد بالسهر والحمى[1]"

الأم اللي بتشتكي من اخواتها لولادها او قدام ولادها..

الأب اللي بيشتكي من اخواته لولاده او قدامهم

الأهل اللي بيؤذوا ويعتدوا ويكلوا حق اخواتهم..

ولادنا بيتعلموا مننا..

هل فعلًا عايزين نعلمهم يؤذوا بعض ويكلوا حق بعض؟

ولا عايزين نسيبهم زي البنيان المرصوص؟

محتاجين نفوق يا مجتمع..

ولو فيه مشاكل بينا وبين اخواتنا، نفتكر ان الأخير فينا هو اللي بيبدأ بالصلح..

ونسعى للم الشمل وحل المشاكل، حتى لو احتجنا نلجأ لمتخصصين..

اخواتنا دول لحمنا ودمنا..

واهم ثروة نسيبها لولادنا هي الأخوة اللي بينهم وبين بعض..

انتظروني كل خميس مع مقالة جديدة من 

#تصرفات_مدمرة_١٦