أساس العلاقات الناجحة في ست حروف

من كام سنة سمعت مصطلح "الطفل الداخلي"،

وازاي كل حد فينا جواه طفل داخلي محتاج يتواصل معاه، 

يسمعه، يفهم احتياجاته ويوفيها،

جبت كتاب عن الطفل الداخلي،

والكتاب كان فيه تمرين عملي، تمرين رسم،

نرسم الطفل الداخلي، في مشهد.

مسكت القلم وبدأت ارسم،

لاقتني برسم نفسي وانا بلعب في الرملة وامي قاعدة على كرسي قدامي،

خلصت التمرين ولاقتني سامعة نفسي وانا صغيرة،

وانا نفسي امي تلعب معايا..

افتكرت مواقف مختلفة كنت فيها بطلب من امي تلعب معايا وهي بترفض،

كان عندها مسؤوليات كتير، بيني وبين ابويا واخواتي الكبار..

ووالدي كان مشغول جدًا في شغله، 

وهي الحمل كله عليها..

عقلي كان مقدر ومستوعب ان امي كانت متفانية معانا.

وقلبي، قلب طفلي الداخلي، حاسس بالوحدة. 

اخواتي الكبار كان سنهم قريب من بعض، بالتالي كانوا بيلعبوا مع بعض.

أما أنا، ومع فرق السن الكبير بيني وبينهم، كنت بحس بوحدة..

مع التمرين والرسم، افتكرت موقف قبلها بسنين انفعلت فيه جدًا..

كان زوجي بيلعب مع ابني..

وانا اتعصبت وانفعلت.. واتكلمت بصوت عالي،

وبعد الموقف قعدت مع نفسي علشان افهم ايه اللي زعلني كده.

لاقتني حاسة بالغيرة..

كنت حاسة بالغيرة، ان ابني والده بيلعب معاه،

مشهد عمري ما جربته..طعم عمري ما دوقته..

قعدت اراجع ذكرياتي مع والدي، لاقتني مش لاقية ولا مشهد والدي بيلعب معايا فيه..

ومرت سنين، وكبرت..

وفضلت دي حاجة مأثرة فيا،

كل ما اعدي في جاردن سيتي، بيت جدتي،

افتكر اقاربي اللي سنهم من سني ولعبنا مع بعض.

وارجع الاقيني كل ما اشوف طفل بيلعب مع وابوه،

احس بحنين.. بشوق اني كنت اجرب ده..

تصرف مدمر، 

اننا نحرم ولادنا من حقوقهم،

الطفل من حقه اللعب..

والعلاقة بين الناس أساسها المشاركة

م-ش-ا-ر-ك-ة

مس بس اننا نسمح لولادنا انهم يلعبوا..

لا، اننا نلعب معاهم.

اننا نشاركهم، نشاركهم اللعب، نشاركهم اهتمامتهم.. 

بنكبر وبتفضل جوانا ثقوب نفسية..

وبنحاول نملا الثقوب دي..

اللي بيحاول يملاها بنجاح مادي،

او بتفوق دراسي،

او بأكل او بشراء..

ايًا كانت الوسيلة، بتفضل الثقوب النفسية دي موجودة..

وبتحتاج رحلة علاج نفسي طويلة ومكلفة ومؤلمة،

رحلة محتاجة شجاعة وصدق في رغبة الشفاء النفسي..

طفلي الداخلي، بعد الوعي بيه بدأت علاجي نفسي،

وعلاج من صدمات طفولة..

وادركت قد ايه الأطفال محتاجة اهل واعيين..

اهل يتعلموا عن نفسية الأطفال..

ويحطوا تربية الأطفال اولوية، بالذات في السنين الأولى لهم في الحياة..

فرق كبير بين طفل بيلعب وجواه حزن..

انه نفسه حد يلعب معاه..

وطفل بيلعب ومليان فرح وسعادة لأن امه او ابوه او حد من اخواته بيلعب معاه..

المشاركة..

٦ حروف يعملوا فرق محوري في العلاقة..

يا ترى بنشارك ولادنا؟ ازواجنا؟ اخواتنا؟ 

ولا تصرفاتنا مدمرة؟

ياللا نشارك احب الناس لنا..

في احب الحاجات لقلبهم..

ونحمي قلوبهم من الثقوب النفسية..

انتظروني كل خميس مع مقالة جديدة من 

#تصرفات_مدمرة_١٧