الخطاب الثاني والعشرين: التركيز على نقاط القوة وتنميتها

”ايه نقطة قوة عندها ابني عليها؟”

“ده سؤال ممتاز، يستحق التفكير!”

من فترة كان عندي مكالمة تليفون مع اخصائية بتشتغل مع المراهقين اللي محتاجين دعم..

وكنت باسألها عن بنت هي بتابعها بقى لها شهور… علشان اعرف طبيعة البنت اكتر وهل مناسب لها تشترك معايا في برامجي للمراهقين ولا لأ.. 

بعد ما سمعت من الأخصائية، سألتها ايه نقطة قوة عند البنت، علشان اركز عليها وانمي ثقتها بنفسها بيها وابني معاها علاقة من النقطة دي..

والأخصائية ردت انه سؤال ممتاز، عميق… 

وفكرت وقالت ان البنت ناقدة جدًا للي حواليها..

وسؤالي كان هل ناقدة بشكل بناء؟ ناقدة لحاجات فعلًا تستحق النقد؟ ناقدة بعدوانية؟ ناقدة لأنها قوية الملاحظة؟

في المكالمة شرحت للمسؤولة ازاي وقت ما كنت باشتغل في التربية والتعليم كان عندي مراهقين محتاجين دعم، وازاي كنت باسعى اني اكتشف نقاط قوتهم.. واقدم لهم فرص، من خلال مشاريع خدمة المجتمع اللي كنت باقودها، انهم يظهروا نقاط قوتهم، وبالتالي ثقتهم في نفسهم تزيد، ويشوفوا نفسهم ناجحين، ويبدأوا يتصرفوا وفقًا للهوية دي.. واحد كان دمه خفيف جدًا وبينجح ان يضحك أطفال السرطان، وواحد كان قوي الملاحظة ولاحظ الشبابيك المكسرة في مدرسة المكفوفين في عز البرد.. وواحد متميز في الكمبيوتر وصمم لنا خريطة مفصلة لحفلة خيرية كنا بنظمها… حكيت للأخصائية ده…علشان اوضح لها امثلة لنقاط القوة اللي بادور عليها… مش قوة في الحساب ولا النحو.. قوة في الحياة اليومية..

من المكالمة اتفقت مع الأخصائية تبدأ تلاحظ البنت، تلاحظ نقاط قوتها، ولو نقطة واحدة، علشان منها اشتغل مع البنت.. 

وبعد المكالمة فكرت في خطابي لعزيزي الأب وعزيزتي الأم..

يا ترى حبنا لولادنا حب هدام ولا حب بناء؟

لو كل يوم مركز بس على ابني وبنتي مش عارفين يعملوا ايه، ضعاف في ايه، مهملين في ايه.. وكل همي انهم يتحسنوا في ده.. وبانقل لهم طاقة رفض وغضب وعصبية بسبب انهم مش شاطرين.. يا ترى نفسيتهم عاملة ايه؟ متحمسين؟ متعاونين؟ عندهم ثقة في نفسهم؟ علاقتنا دافية؟

ولو العكس؟ 

لو زي خبراء القادة العالميين ما بيقولوا، ركزنا على نقاط القوة اللي عند الإنسان وساعدناه ينميها وزادت ثقتة في نفسه..يا ترى هايحصل ايه؟

هل فعلًا محتاج يبقى قوي ومتميز في كل حاجة؟ هل أنا او حضرتك كده؟

والجملة اللي حافظنها بتاعت عايزين ولادنا يطلعوا احسن مننا ابوس ايديكم بلاش منها..

لأننا لو عايزين ولادنا يطلعوا احسن مننا الحل مش جلدهم وتأنيبهم اكتر مما حصل فينا..

ولا اننا نسيب لهم الحبل على الغارب بدون تربية..

الحل اننا نبقى احنا احسن، يعني نطور نفسنا + نشوف هما شاطرين في ايه ونساعدهم يتميزوا فيه + نتعلم طرق تربوية صحية وحديثة ونربيهم بيها، مش نتعلمها وبس..

خطابي النهاردة عن”التركيز على نقاط القوة وتنميتها”

قوم يا مصري مصر دين واجب عليك..

قوم يا مصري.. مصر هاتقوم بحضورك مع قرة عينيك..

قوم يا مصري ولادك كنز مصر..ولادك كنز مصري.. 

عد حسانات ولادك يا مصري…

كفاية توبيخ وتركيز على نقاط ضعفهم واحراجهم بيها يا مصري..