الخطاب التاسع: ابدأ بنفسك

خدي بالك السنة الدراسية قربت.. ابدأي بقى ظبطي نومك.. ووضبي مكتبك.. وروقي دولابك.. واعملي لستة باللي محتاجة له من المكتبة.. بعد ما تشوفي ايه اللي عندك اصلًا.. مش هانشتري على الفاضي..

جمل بتتكرر في بيوت كتير.. أوامر بيتلقاها الكائن اللي اتحصر دوره في الحياة من دور الإنسان لدور الطالب.. لأنه - ولحظه التعس - جيه الدنيا في زمن فيه اسلوب التعليم وثقافة البيوت بتحصره في الدور ده (الإ من رحم ربي)…

والجمل بتتكرر بصوت عالي وبنبرات مختلفة واستراتيجيات مختلفة..

استراتيجيات خلال اجازة الصيف بقيت مزهزهة في عقلي بسبب الشاليه اللي تحتنا في المصيف.. كل اسبوع كان بيتأجر لعيلة شكل..وكل عيلة لها استراتيجيات.. والمشترك بينهم انهم عندهم اولاد وانهم وولادهم ما شاء الله صوتهم عالي لدرجة اني سامعة كل التفاصيل اللي بتحصل..وكل الإستراتيجيات العبقرية اللي بيستخدموها..

استراتيجية الشبشب (هاحطه على الترابيزة)..استراتيجية القرص (هاقرصك انت عارف فين) ويسبوك انت مع تخيلك لمكان القرص.. استراتيجية التهديد (مش هاتخرج لو..)..استراتيجية الحرمان (مش هاجيب لك الشيبسي).. استراتيجية البوز (هاتشوف الوش التاني).. استراتيجية الخصام (هاخصمك لحد عيد تحرير سيناء).. استراتيجية الزعيق (كلامي اللي هيتسمع..ومش هاوطي صوتي).. استراتيجية المسكنة (انا قايدة صوابعي العشرة شمع علشانكم)… واستراتيجية تأنيب الضمير (كده تزعلني..ما طمرش فيك قرطاس الزلابيا والأيس كريم..)…

واخبار الإستراتيجيات ايه؟

من وجهة نظري المتواضعة انها استراتيجيات “فاشلة”.. 

لا بتؤدي الي استقامة الإنسان..ولا بتؤدي الي تبنيه فكرة ايجابية عن نفسه ولا بتؤدي الى علاقة دافية مع القائم على تربيته…

الموضوع ببساطة محتاج استراتيجية القرد..

ايوه.. القرد.. Monkey see, monkey do

عايزين ولادنا ينظموا مكتبهم.. ننظم احنا مكتبنا.. باستمرارية..

عايزين ولادنا يناموا بدري، ننام احنا بدري..

عايزين ولادنا ينزلوا المدارس والجامعة في الميعاد.. ننزل احنا في الميعاد..

لأن الإنسان كائن بطبعه التقليد.. اللي انت هاتعمله هو هايقلدك فيه…

نعمل ده امتى.. وولادنا صغيرين..

ليه؟ لأن على رأي امي الله يصبحها بالخير “التعليم في الصغر كالنقش على الحجر”

وولادنا صغيرين نعلمهم كل اللي نفسنا وهما كبار يعملوه…

طيب والحال ايه لو ولادنا وصلوا لسن المراهقة؟ فات الميعاد؟

لا.. نعمل اننا نستشير خبراء التربية والمتخصيين في سن المراهقة..

بعد ما نحدد ما نفسنا بمنتهى الصدق والشفافية 

ايه اللي نفسنا ولادنا يعملوه، والأهم “ليه” عايزينهم يعملوه..

عزيزي القائم على تربية جيل المستقبل..

مستقبل مصر والدنيا في ايد ربنا ثم القائمين على التربية..

على تربية جيل المستقبل..

من فضلك راجع استراتيجياتك..

وبص في المرايا.. شوف ابنك وبنتك شايفين ايه قدامهم..

 وبدل ما تقول له صلي.. جرب تقول له تعالى نصلي.. وندعي مع بعض ولبعض..

تعالي نوضب مع بعض.. تعالى اساعدك.. واراضيك عن سنين طلبت منك تعمل اللي انا مش باعمله..

قوم يا مصري مصر دين واجب عليك..

قوم يا مصري.. مصر هاتقوم بتربيتك لقرة عينيك..

قوم يا مصري ولادك كنز مصر..ولادك كنز مصري.. 

كن قدوة لولادك يا مصري. بتصرفاتك وسلوكك وكلامك وعاداتك.…