ازاي تعتمد على نفسك في ٣ خطوات
في يناير ٢٠١٦ قعدت على كرسي الطالب مرة تانية. وكانت مرة عميقة وطويلة. وقتها كنت اخدت قرار بتغيير الكاريير، وفكرت ادرس حاجة جديدة. واختارت ادرس كوتشينج. خلال الدراسة سمعت مصطلح عجبني جدًا. اسمه Self-reliance. مرت الأسابيع وفي اخر الكورس اكتشفت ان الشهادة اللي هناخدها شهادة مؤقتة. وإن الشهادة المعتمدة محتاجة اعدي امتحان الأول علشان اخدها. معلومة صغيرة ماكنتش عارفاها قبل ما اشترك.
خلصت واستلمت الشهادة المؤقتة وفكرت اعمل ايه؟ ازاي ممكن احصل على الشهادة المعتمدة؟ وامتى؟
مع كراسة التخطيط بتاعتي وبأقلام الوان بدأت افكر واكتب واخطط.. الأول افتكرت ان د. مايكل هول اللي درست معاه كوتشينج نصحنا بعد الدراسة إننا نراجع كل الملاحظات اللي اخدناها و كل الورق اللي معانا. وافتكرت كمان انه نصحنا نبدأ ممارسة على طول. وبدأت اخطط اني اذاكر وامارس.
تواصلت مع ناس في دوايري وعرض عليهم اقدم لهم جلسات مجانية. وجدولت جلسة يوميًا الا يوم الجمعة كنت باخده اجازة. وطلبت من مديرتي وقتها اغيب يوم اسبوعيا من شغلي بالخصم علشان اذاكر لحد ما اخد الشهادة. وبقيت كل يوم اتنين اقعد اذاكر في البيت، الورق اللي معايا والملاحظات.. وانقل كل حاجة في كراسة بخط منظم والوان علشان افتكر احسن. وبقيت كل يوم مساءًا اعمل جلسة كوتشينج مجانية بالتليفون.
بعد مرور كام اسبوع نورت معايا لمبة. أنا باذاكر وبمارس. انما ايه يضمن اني ماشية صح؟ محتاجة حد يمتحني ويديني Feedback، نقد بناء علشان فعلًا اتحسن واخد الشهادة المعتمدة.
فكرت في الكوتشز اللي متخرجين من نفس مدرستي وطلبت من واحدة شاطرة جدًا منهم إنها تساعدني. واتفقنا إني اروح لها كل اسبوعين اعمل جلسة كوتشينج قدامها وهي تنتقدني نقد بناء وتوجهني محتاجة اتحسن في ايه.
مرت الأسابيع وأنا مواظبة على الخطة اللي حددتها. وكان اتفاقي مع نفسي ان أول مايو اروح امتحن علشان الشهادة. ورجعت فكرت اني اعمل امتحان تجربة الأول علشان أتأهل للموقف. حجزت ميعاد أول ابريل وروحت امتحن. وهوب لاقتني بانجح وباخد الشهادة في نفس اليوم! المفاجئة اذهلتني. كنت رايحة ولا في بالي اني هانجح يومها واخد الشهادة وقد كان. حققت الهدف قبل شهر من الميعاد اللي كنت متفقة مع نفسي عليه.
الموقف ده تجربة عملية ليا مع نفسي في الSelf-reliance. في اول دراستي للكوتشينج سمعت المصطلح ده وعجبني جدًا. الإعتماد على الذات. إن الإنسان يقدر يعتمد على نفسه. بينه وبين نفسه ثقة وتصديق واستيعاب إنه كائن محدود ومش عارف كل حاجة. إنما واثق إنه يقدر يتعلم ويتطور وينمو بالإعتماد على نفسه.
لما سمعت المصطلح ده من المدرب/الكوتش، اعجبت بيه جدًا. وفكرت ان يكون ده موقفي مع تغيير الكاريير. إني اتبنى موقف ال Self-reliance. اني اعتمد على نفسي و“اصدق اني اقدر“. اقدر استقيل بعد ١٩ سنة شغل في نفس المؤسسة. اقدر اتعلم عن الكوتشينج والبيزنس. اقدر اتعلم عن التسويق والدعاية. اقدر اتعلم عن الاستثمار وتأسيس شركة. وقتها كنت في سن الواحد والأربعين، ووعدتني اني هاعتمد على نفسي واعمل الCareer Shift.
الفرق بين الثقة بالنفس والإعتماد على النفس..
وقت ما اتعرض عليا المفهوم ده، الكوتش وضح الفرق بين الاتنين. شرح إن الثقة بالنفس بيكون مصدرها حاجات احنا شاطرين فيها. مثلًا باعرف اكتب او اسجل فيديوهات او اقدم ورش عمل، او باعرف اطبخ حلو او انظم عزايم. أو باعرف اتعلم لغات بسهولة أو ارسم او اعزف. بيكون عندي ثقة في نفسي في المجال ده. في جزء متخصص أو محدد لأني مارسته كتير وبقى عندي خبرة فيه/بقى سهل بالنسبة لي. أما الإعتماد على النفس او ال Self-reliance فالمقصود بيه فكرة الإنسان عن نفسه.. إني اقدر اتعلم او اجرب الجديد او اتبني المختلف او اعمل تغيير. معتقد عن نفسي اني اقدر. وقتها انا اخترت اني اتبنى الموقف ده علشان اعمل تغيير في مجال شغلي.
فخ ممكن تقع فيه، خد بالك..
من تجربتي اللي شاركتها معاكم، أنا لجأت لناس تساعدني. طلبت من كوتش اقدم مني توجهني وتنتقدني. ال Self-reliance مش معناها اني اعيش عشر رجالة في بعض واقول مش عايزة حاجة من حد ومش هاطلب مساعدة من حد. الSelf-reliance بذكاء، معناه اني هاعتمد على نفسي اني اوصل لهدفي، وخلال السكة/الرحلة/الطريق، اطلب مساعدة من غيري، مش علشان انا ماعرفش ولا ماقدرش. لأ، علشان أنا ذكية وممكن اعتمد على نفسي في اني اطلب مساعدة من اللي يقدر يساعدني احقق نتايج احسن، طلبي للمساعدة نفسه نوع من الإعتماد على النفس. إني اعتمدت على نفسي توضح لي محتاجة مساعدة في ايه ومين ممكن يساعدني وتتواصل معاه لطلب المساعدة.
الجريمة اللي كتير مننا بيرتكبها..
بنربي ولادنا ازاي؟ كتير مننا للأسف بنقع في فخ إننا نعامل ولادنا انهم صغيرين. يعني نروح النادي ويبقى عايز يشتري ازازة مياه. نقول له اجيب لك أنا مش هتعرف. يكون عايز يأكل نفسه او يلبس لوحده أو ياخد دش، نقول له مش هتعرف. او مش هتتليف كويس. والنتيجة مع تكرار المواقف، ولأن التعليم في الصغر كالنقش على الحجر، النتيجة إن الكائن الصغير ده بيكبر على الاتكالية، وبتتكون عنده عقيدة إنه ما يقدرش يعتمد على نفسه.
ومش بس كده. لأ ولادنا بيكبروا ونفضل نعاملهم بنفس الطريقة.. أنت لسه صغير، اوعى تولع النار، مش هتعرف تشغل الغسالة.. ويطلع جيل اتكالي مهاراته محدودة ماعندوش موقف/Attitude ال Self-reliance.
ايه الحل؟
الحل في ٣ خطوات:
١- استرجع كل المرات اللي عملت فيها حاجة لأول مرة.. وقدرت.. اعتمدت فيها على نفسك ونجحت، حتى لو ما كانتش النتيجة ١٠٠٪.. المهم إنك قدرت. خد بالك مخك ممكن يضحك عليك ويقول لك ماحصلش. لا حصل. وكتير. بس أحنا بنفلتر وبطبيعتنا بنركز على السلبي بس.
٢- راقب كلامك لنفسك. صوتك الداخلي بيقول لك ايه؟ بيقول لك you can، إنت تقدر ولا بيجلد فيك ويشككك في نفسك طول الوقت
٣- كل فترة - كل كام اسبوع او كام شهر - جرب حاجة جديدة من باب التجربة بغض النظر عن النتيجة. وقول لنفسك انت بتعمل الحاجة دي مش علشان الحاجة، انما علشان تتبنى موقف ال Self-reliance. يعنى مثلًا جرب تغسل هدومك لنفسك لو دي حاجة حد بيعملها لك. أو جرب تسوق لمحافظة تانية انت ما سوقتش لها قبل كده.. افضل جرب.. ومع كل تجربة احتفل بنفسك، وقول لنفسك I can، ومرة في مرة هتلاقي نفسك بقيت اجرأ من الأول في حاجات ماكنتش متخيلها. ليه؟ لأن بقى عندك موقف/Attitude اسمه Self-reliance.
موقف/Attitude ال Self-reliance وقيادة الذات
وقت ما اخدت قرار اني اغير شغلي كنت مش راضية عن شغلي كموظفة. كنت حاسة إن الأيام بقت شبه بعضها. بقيت حاسة إني عاوزة اوصل لناس اكتر، اصحيهم من الغيبوبة واساعدهم يعيشوا فعلًا بحضور، واستخدم مهاراتي وقدراتي بشكل فعلا اكتر. وقتها كقائد لنفسي، كنت عارفة إني متضايقة من وضعي الحالي. وعارفة اني عايزة اغير. ازاي عرفت اغير؟ بتبني موقف ال Self-reliance. إني اتفقت مع نفسي اني اعتمد عليها. إني وعدتني اننا نتعلم ونفضل نتعلم كل اللي هنحتاج نتعلمه علشان افتح شركتي الخاصة. ومن يوم ما اخدت قرار اني اغير شغلي لحد النهاردة الموقف ده معايا كل يوم. معتمدة على نفسي اني اتعلم المطلوب واعمل اللي محتاجة له علشان اعيش كقائد، حر، مسؤول، عايش، حاضر.
أحد المقولات اللي بحبها جدًا وبلتهمني وقت ما باكون محتاجة زقة، مقولة هيلين كيلر (ولدت كفيفة
وصماء) بتقول فيها: “?If I am not for myself, who will be for me”
هيلين كيلر الفت مجموعة من الكتب، معتمدة على نفسها وبمساعدة مدرستها. قائمة بالكتب بتاعتها في اللينك ده
https://www.thriftbooks.com/a/helen-keller/246838/
أحد كتبها المتوفرة على الإنترنت بشكل مجاني بعنوان ”قصة حياتي“ هنا
https://www.fulltextarchive.com/page/Story-of-My-Life/
من اكتر الناس الملهمة ليا جدًا في موضوع ال Self-reliance هي ليزا نيكولز، فيديو ملهم ليها هنا في اللينك ده:
#الموقف_الحادي_عشر_الإعتماد_على_الذات
#كتابة
#قراءة
#تعليم
#تطبيق
#مجتمع
#كن_إنسانًا
#سيب_اثر
بعاداتي باصمم حياتي
سلسلة بعاداتي باصمم حياتي - ١٧ حلقة هدية للتعرف على كيفية تبني العادات والإلتزام بها
