عشر دروس من الكتاب اللي تحب تقراه مرتين تلاتة..

اقرأ نفس الكتاب مرتين؟ ايه يا عم.. دي تضييع وقت… !

وبعدين ده أنا عندي قايمة كتب طويلة جدًا عايزة اقراها..

بخلص كتاب وادخل في اللي بعده.. تقوم تقول لي ارجع اقرأ كتاب من اللي خلصتهم تاني؟!

ده كان رد فعلي لما روبين شارما، خبير القيادة العالمي، اقترح في كورس له ان الإنسان يقرأ نفس الكتاب أكتر من مرة على فترات متفاوتة.. وانه كل مرة فهمه واستيعابه والفايدة اللي هيطلع بيها من الكتاب هتختلف وفقًا لسنه وقت القراءة، أو الظروف المحيطة بيه، أو التحديات اللي كانت بتواجهه في وقت كل قراءة.. 

أنا اخدت الجملة دي وفكرت ايه كتب ممكن احب اقراها تاني، وحضرتها في رف في مكتبتي واتفقت مع نفسي ان يومًا ما هقراها تاني تنفيذًا لوصية شارما.. لحد ما وصلت لكتاب مش زي اي كتاب.. كتاب خلصته وبدأت اقراه من تاني أول ما خصلته.. ولما خلصته تاني مرة، بدأت اقراه تالت مرة أول ما خصلته تاني مرة..

كتاب مش بتطلع منه بمعلومة.. ولا بمهارة ولا باستراتيجية..

كتاب بتطلع منه بأسلوب حياة.. بفلسفة للحياة..

ايه الكتاب؟

الكتاب بتاع مؤلف عالمي اسمع Dr. Wayne Dyer. كنت قرأت له كذا كتاب قبل كده وكانوا مفيدين جدًا وممتعين وثريين، انما جيت على ده ومش ممكن.. ايه ده؟! كلام يريح الروح وينور العقل ويروي القلب.. كلام سهل ممتنع.. تحس انك فاهم ومش فاهم.. تحس انك عايش في حالة مش في الدنيا… وبعد القراءة تحس ان الكائن الطيب اللي جواك بدأ ينور، يلمع، يزدهر.. تحس إنك إنسان فعلًا وإنك عايز تضيف للإنسانية.. كتاب بعنوان "Change Your Thoughts, Change your life". يعني بالعربي "غيَّر، افكارك تغير حياتك".

الكتاب عرض حاجات متفقة مع عقيدتي كمسلمة… وعرض حاجات محدودة اختلفت معاها، المهم انه من اللي اتفقت معاه عرض حياة فيها…

١- انت وكل كائن حي فريق في الدنيا.. تشوف نفسك جزء من كائنات اخرى، تحس إن الطيور والحيوانات، الشمس والأقمار، النجوم والرمال.. وكل مفردات الكون عيلتك الكبيرة.. وتبدأ تشوف نفسك جزء منها.. وتلاقي نفسك بدأت تستشعر جمال باقي الكائنات، تتعاطف معاها، تتأمل جمالها… وكأنك أول مرة بجد تشوفها..

٢- إنت وكل إنسان حاجة واحدة.. هو إنت وإنت هو.. هو مرايا تشوف فيها نفسك، الآمك، افراحك، مميزاتك، مواطن ضعفك.. تشوف.. مش إنت وهو شركاء في الإنسانية أو في الأرض.. لا، إنت هو وهو إنت، من منطقة قبول، احتواء، تعاطف، حب..

٣- انت مش مستسلم بس للي بيحصل لك من باب اليقين بإن أمرك كله خير.. حياة انت فيها بترحب بكل الأحداث اللي بتمر بيها، بتستقبل كل قضاء بخيره وشره، بحلوه ومره، بحب، بسلام.. مش بتستسلم، بترحب وتستقبل.. وإنت هادي زي النهر اللي شايف عاصفة جاية وهو هادي.. بيجري زي ما هو بدون تغيير في مساره او سرعته بسبب العاصفة..

٤- إنت بسيط.. مش بتجري ورا مقتنيات تثبت بيها للناس انك شاطر او كويس او تستحق أو لك قيمة.. إنت فيها مش في لهث لإقتناء حاجات أكتر أو اغلى ولا في لهث لإستعراض المقتنيات دي..

٥- إنت مُعَلِم للناس… بوجودك، بحياتك، بتصرفك اللي نابعة من الحب مش الخوف.. بحبك غير المشروط للناس… بحكمتك اللي كونتها بسبب صمتك اللي اكتر من كلامك… بسبب تأملك وهدوئك اللي اكتر من حركتك وانشغالك..

٦- إنت قادر تشوف بودانك وتسمع بعينيك، بتشم ببوقك وبتدوق بايديك.. حواسك بتشتغل بشكل مختلف عن باقي الناس، لأنك متبني ايقاع هادي للحياة.. فبقيت فعلًا عايش، حاضر، منتبه، واعي، مستشعر (وحط تحت مستشعر ١٠٠ خط)..

٧- إنت فيها متواصل مع قلبك.. سامعه كويس جدًا، بوضوح.. ومش محتاج الناس تفتيك.. لأنك بتستفتي قلبك والتواصل بينكم فعَّال جدًا.. وبالتالي صوته واصل وانت مدركه، ومستوعبه وبتتصرف وقفًا له.. (ده ما يمنعش برضه انك تستشير أهل العلم أو/و الخبرة)...

٨- إنت بتتمنى وبتحلم.. وبتاخد خطوة.. بدون عصبية أو عنف، بدون ضغط او توتر… وربنا بيسخر لك الكون كله علشان يحقق لك اللي بتحلم بيه.. لأنك اتمنيت.. واخدت خطوة.. اتمنيت كإنسان محقق السبع نقط اللي فوق.. مش حد بيسعى لشهرة ولا سلطة ولا حد بيفكر بأنانية.. لأ.. كإنسان في سعي.. مش بيفكر اخد ازاي وأنا اكسب ايه، بيفكر اساهم ازاي واخدم مين وازاي بطريقة صالحة مُصلحة..

٩- إنت مش قاعد مشدود وعمال تتسأل ايه مراد ربنا منك.. وعمال تقول بس لو اعرف ربنا عايزني اكون خليفة ازاي.. اعمل ايه، ادرس ايه.. ايه الغاية من حياتي..؟ لأ.. حياة إنت فيها بتتحرك وبتسعى بالمتاح وربنا بسبب حركتك وسعيك هينور لك الطريق ويعرفك ايه مراده من وجودك..

١٠- إنت متعلق بربنا، وربنا بس.. وإنت واعي إنه مصدر كل حاجة في الدنيا.. إنه هو الحب، وهو الرزق، وهو السند، وهو الأمان، هو السعادة وهو البهجة.. هو كل ما تتمنى تلاقيه في الدنيا.. وبدل ما تتعلق بما هو فاني وزائل وتقعد في خوف وقلق طول ما هو معاك لأحسن تقفده.. تتعلق بالحي القيوم الذي يبقى وجهه ذو الجلال والإكرام..

الكتاب فيه ٨١ عبرة.. قدمت منهم عشرة علشان ماطولش اكتر من كده.. كتاب تحس معاه إن الدنيا بخير.. تحس ان المياه والكهرباء دخلت جواك.. تحس انك اتنورت واترويت..

يا ترى من العشر عبر دول ايه أكتر واحد صعب عليك؟

وايه أكتر واحد ممكن يفرق في حياتك لو طبقته؟

اصعب واحد عليا كان عدم التعلق الا بالله.. واخد مني اكتر من سنتين.. 

ولسه بجاهد نفسي فيه..

واكتر واحد حاليًا فارق معايا هو رقم ٤.. البساطة.. وعدم اللهث ورا دنيا فانية..

لو بتحب تسمع كتب سمعية، اللينك ده فيه الكتاب سمعي باللغة الإنجليزية..

https://bit.ly/3NXpWZu

لو بتحب الملخصات المصورة، الينك ده فيه فيديو بالرسوم بيلخص الكتاب باللغة الإنجليزية..

https://bit.ly/3H4G6Ok

وبالنسبة للبساطة، اللينك ده فيه كلمتي في مؤتمر سنوي كنت فيها Guest speaker، كان موضوعها "حياتك يوم، عشها ببساطة.."

https://bit.ly/390sQhd

لو عايز تقرأ المقالات اللي نزلت خلال الأسابيع اللي فاتت هتلاقيها هنا..

https://www.paradigmshiftegypt.com/blog

ومتنساش تعمل لايك وشير لو المقال كان بالنسبة ليك  مفيد عشان كل شخص فى دوايرك يستفيد 

 #كتب_غيرت_حياتي_٢٠

#اكتر_ناس_الهمتني

#كتابة

#قراءة

#تعليم

#تطبيق

#مجتمع

#كن_إنسانًا

#سيب_اثر