٧ مفاتيح يساعدوك يكون عندك شغف
كلمة من ٣ حروف سمعتها أول مرة في شهر نوفمبر ٢٠١٥. كلمة غيرت مجرى حياتي وحياة ناس تانية كتير بشكل ما كنتش اتخيله او اتوقعه.
كلمة من ٣ حروف يوم ما سمعتها سمعتها في مؤتمر في فندق كبير. وصاحب المؤتمر طلب من الحضور يومها يخدوا كل يوم صورة سلفي لمدة ١٠٠ يوم متواصل وهما في الحالة اللي بتوصفها الكلمة دي. يا ترى عرفت الكلمة؟
كلمة، حالة، موقف مهم جدًا يكون عند الإنسان اللي في سعي انه يقود نفسه. كلمة بيحس معاها إنه عايش. زي الفرق بين البركة الراكدة وفيها طحالب والبحر اللي أمواجه مليانة حياة. من غير الكلمة دي بيكون الإنسان بِركة وبيها بيكون بحر ازرق مليان حياة!
موقف/Attitude الشغف وقيادة الذات
كلمة من ٣ حروف اسمها ”شغف“. سمعتها من محمد تهامي مؤسس باشون تو بروفيت في مؤتمره السنوي في نوفمبر من سنين. اتكلم يومها وقال ”خلي شغفك شغلك“. ”خلي عندك حلم مش خطة“. و“التوهة طريق“.
٣ حروف و ٣ جمل، حياتي اخدت بيهم منحنى تاني.
بعد المؤتمر سألت عن ورشة محمد تهامي. واشتركت فيها. وقتها طلعت برضه مش متأكدة ايه هو شغفي. كنت بكتب روايتي وقت ما روحت الورشة. وناس من الحضور قالوا لي شغفك الكتابة. وردي كان لأ. الكتابة وسيلة. إنما ايه هو شغفي؟ وافتكرت إن ”التوهة طريق“. وبدأت طريق التوهة بكل حماس. كل يوم باخد صورة سلفي، ويوم ورا يوم عدى ال١٠٠ يوم وتحولوا لفوق ٣٥٠ يوم شغف ولاقتني في المؤتمر السنة اللي بعدها متحدثة علي خشبة المسرح.. لاقتني بتكلم عن الشغف والمثابرة والرسالة وروايتي.
لاقيتني عايشة. حياة من مستوى تاني ماكنتش عارفاها قبل ماحضر المؤتمر. لاقتني بجرب اعمل حاجات لأول مرة بمنتهى الحماس. اسجل فيديوهات واعملها مونتاج وانزلها علي اليوتيوب. اشارك بكلمة في حدث ل TEDX بجامعة القاهرة. اعمل فيديوهات لايف. اعمل مدونة وانزل مقالات. مين دي؟ دي أنا؟!
ايون. نعم. هي أنا بس أنا بشغف. شغف واقبال على الحياة وأنا بحلم ومفيش حدود لاحلامي. أونا بحلم وباخد خطوات وبقول لنفسي معندناش حاجة نخسرها. ياللا نجرب ونتعلم من التجربة ومن التوهة لمرات عديدة أكيد هنلاقي الطريق.
وبعد مرور ٦٠٠ يوم كنت لاقيت الطريق. وكنت قدمت استقالتي. وكنت عرفت ايه هو شغفي. و اليوم ٦٠١ سلفي كان اول يوم ليا وشغفي هو شغلي!
ايه اللي ساعدني الاقيه؟ إني كان عندي شغف إني اكتشف شغفي. إني تبنيت موقف الشغف: عمل الحاجة بحب وفضول ومثابرة وحماس وبجرأة وبدون تردد أو خوف من النتايج ولا تمسك بتوقعات مثالية ولا سعي للكمال. سعي للتجربة والتعلم واكتشاف الذات والاستمتاع. وحط تحت استمتاع ١٠٠ خط!
ايه علاقة ده بالقيادة؟؟ ده لب القيادة. القائد محتاج يكون عنده شغف، حماس، فضول، سعي للتجديد، اقبال على التجربة، روح المخاطرة.. علشان يقدر يتحرك من نقطة الف لنقطة باء، علشان يكون بحر مش بِركة.
ازاي نتبنى موقف/Attitude الشغف
٧ مفاتيح ساعدوني اتبنى موقف الشغف.. هشاركهم معاكم:
١- نقول نعم للتجارب الجديدة. وقت ما دخلت عالم الباشون/الشغف قررت اقول نعم. نعم اني اعمل مدونة. نعم اني اعمل قناة يوتيوب. نعم اني اقف اتكلم على مسرح قدام جمهور…نعم اني انشر روايتي، نعم ، نعم…
٢- نفجر التوقعات غير المنطقية ونرمي السعي للكمال من الشباك. ونستقبل بداله عقلية المبتدىء اللي عارف انه لسه زي الطفل الوليد. هيتعلم ويجرب ويختبر لحد ما يلاقي الحاجة اللي تلمس قبله وفعلًا يشعر معاها انه عايش. انه في دنيا تانية. انه في حالة اسمها Flow. انه مستعد يعمل اللي بيعمله ده بدون اجر مادي. لأن احساس السعادة اللي ماليه اعلى من كنوز الدنيا. وقتها هيعرف ان ده شغفه ويلاقي نفسه مستعد يفضل يتعلم يحسن ويجود.
٣- ننضم لناس شغوفة. بتتكلم عن الأحلام والتوهة وازاي هي طريق. ونختار مين نكلمه عن شغفنا، ونكون اذكياء اننا نتجنب إننا نتكلم عن شغفنا قدام الناس القاتلة للأحلام. وقت ما دخلت عالم الباشون، المجتمع بتاع باشون تو بروفيت كان داعم جدًا بالنسبة لي. وجودي وسطهم كان دفعة كبيرة ليا للأمام.
٤- نتابع ناس عايشة، ناجحة، باين عليها انها بحر مش بِركة. نقرأ عنهم، نسمع لهم، نخلي قلبنا وعقلنا متعرض لهم وبالتالي يدخل لنا هواء نضيف ينعش مخنا ويوقظ روحنا من حالة الركود.
٥- نخصص وقت للشغف. وقت يومي ولو ربع ساعة نعمل فيه حاجة مرتبطة بالشغف بتاعنا. لو كتابة نكتب لو نجارة ندقدق. المهم إننا ناخد خطوات بسيطة الأول ودورية وبعد ما الخطوات تبقي ثابتة نكبر الخطوة/نطول المدى. مفتاح مهم جدًا. تهامي قال ١٠٠ يوم شغف. بعد ال١٠٠ يوم فعلًا لاقتني تحول الموضوع لعادة وكملت السنة والسنين وخلالهم تحول شغفي لشغلي! استقلت ولاقيت الطريق بعد توهة سنة ونص.
٦- التعلم المستمر عن مجال الشغف. لو بتحب حاجة هتبقى عايز تتعلم عنها، عندك فضول. والفضول هيجيب فضول، وتلاقي نفسك عايز تفضل تتعلم علشان دي حاجة انت بتحبها. دي شغفك!
٧- الصبر مع الاستمتاع وعدم استعجال النتايج. وقت ما بدأت رحلة اكتشاف الشغف وبعد ما لاقيت الطريق لاقتني كأني ببدأ من جديد، واخترت اني استمتع، اني اعيش، اني اخوض التجربة بقلب شجاع، اخترت اني استعين بربنا سبحانه وتعالى واتخلص من الخوف اللي كان واقف حاجز بيني وبين اني اخلي شغفي شغلي. وفكرت اني استمتع واثابر وفكرتني اني دي المعادلة الأساسية للنجاح: استعانة + سعي بشغف + صبر ومثابرة + استمتاع بالتجربة + تعلم مستمر = نجاح
ليه نتبنى موقف/Attitude الشغف
سؤال ال ”ليه“ ده أهم سؤال بسأله لنفسي في مواقف كتير قوي. تقريبًا بشكل يومي. ليه اكتب المقالة دي؟ ليه اعمل فيديو لايف؟ ليه العب مع بنتي طاولة؟ ليه اتمرن الصبح بدري قبل الشغل؟ ليه؟
وبالتالي، مهم تسأل ليه تتبنى موقف الشغف؟ والإجابة ببساطة علشان تعيش. بجد. بدون شغف، بدون حياة انت فيها بتعمل حاجة انت بتحبها ومستمتع وعايش في حالة Flow انت مش عايش. هل فعلًا عايز تيجي الدنيا وتمشي من غير ما تعيش؟ هل عايز تسيب الدنيا وكأنك ما كنتش؟ وكأنك ما جتش؟ ده اللي انت عايزه؟
علشان تسيب اثر، علشان تسيب بصمتك في الدنيا، علشان تحس انك عايش وانت عايش وما تعيشش ميت وتيجي في النهاية تقول ماعشتش، محتاج تتبنى موقف الشغف. وافتكر ٣ جمل:
التوهة طريق، خلي عندك حلم مش خطة، وبعدها خلي شغفك شغلك.
امتنان كبير لأهل باشون تو بروفيت اللي ساعدوني اتنقل من التوهة الي إن شغفي يكون شغلي.
ايه هو شغفي؟ شغفي هو القيادة. شغفي هو اني اوقظ كل إنسان عايش ومش عايش، اساعده يخرج من تحت التراب ويتعلم ازاي يقود نفسه وحياته بشكل يمكنه انه يسيب اثر في الدنيا، يخليه كائن ملهم لدوايره، يعيش بحر مش بركة. يعيش شمس مش شمعة، يتحول لطاقة نور في الدنيا. لنبراس. بكتب واعمل فيديوهات وباتكلم واعمل مشاريع خدمة مجتمع وبقدم ورش عمل لايف واون لايف وبقدم بودكسات، كل الحاجات دي وسائل علشان اوقظ المارد اللي مدفون داخل كل انسان عايش ومش عايش. بيجري في الدنيا ومش عارف ليه بيجري ولا رايح فين انما من كتر ما مستعجل مش بيقف ويسأل ليه بعمل ده؟ ليه عايش كده؟ او بمعنى ادق ليه مش عايش كده!
الكلمة اللي طلعت ادتها على المسرح في مؤتمر نوفمبر ٢٠١٦ هنا في اللينك ده
الكلمة اللي طلعت ادتها على المسرح في TEDX بجامعة القاهرة هنا
فيديو ملهم فيه خطوات عملية واسئلة عميقة عن ازاي تكتشف شغفك هنا في اللينك ده
#الموقف_الثامن_عشر_الشغف
#كتابة
#قراءة
#تعليم
#تطبيق
#مجتمع
#كن_إنسانًا
#سيب_اثر
بعاداتي باصمم حياتي
سلسلة بعاداتي باصمم حياتي - ١٧ حلقة هدية للتعرف على كيفية تبني العادات والإلتزام بها
