٨ مفاهيم عظيمة أثر لما تعشيها مع عيلتك
"هاتي الكتاب وورق وأقلام معاكي يا إيمان"
الجملة دي كانت ولا زالت أحلى طلب زوجي العزيز طلبه مني من يوم ما عرفته سنة ٩٧ لحد يومنا هذا. طلب عمل طفرة جوهرية في حياة اسرتنا الصغيرة.
اليوم ده، في ابريل ٢٠٠٨، كنا بنحضر شنط السفر لتمضية اجازة شم النسيم في شرم الشيخ. وقبل اليوم باكتر من سنة كنت خلصت قراءة احب الكتب الى قلبي، كتاب "العادات السبعة للعائلات الأكثر فاعلية" للمؤلف العالمي ستيفن كوفي.
في الكتاب المؤلف عرض ٧ عادات اساسية علشان الأسرة تبقى مترابطة والعلاقة بينهم قوية ويعيشوا حياة سعيدة. العادة التانية فيهم كانت واكلة دماغي وخاطفة قلبي. فضلت ازن على جوزي العزيز زي أي ست مصرية أصيلة إننا نقعد كعيلة ونعمل المطلوب في الفصل ده في الكتاب. ومرت الشهور بدون استجابة فبطلت زن. قررت اكون مبادرة زي العادة الأولى ما شرحت وبدأت احكي لعيلتي عن العادات الستة الباقية ونحاول نطبقهم مع بعض. أما العادة التانية فبقيت ابص لها بحنين وبس. لحد ما وصل اليوم المنشود ومن غير تذكير او الحاح جوزي طلب مني اجيب الكتاب والورق والأقلام معانا في السفر.
في شرم الشيخ جوزي قرأ العادة التانية بعنوان "Begin with the end in mind" واللي فيها كوفي شرح فكرة الرسالة العائلية ودورها كبوصلة تساعدنا نتحرك فين وازاي وليه. واللي عرض امثلة منها في الكتاب ووضح تأثيرها الجوهري على العلاقة الأسرية. بعد ما شريك عمري قرأ العادة عزمنا في يوم بالليل في Cilantro وبدأ يتكلم ويشرح للولاد العادة ومعنى الرسالة وطلب منهم كل واحد يفكر عايز عيلتنا تكون اخلاقها ازاي؟ بتعمل ايه؟ بينهم ايه..؟ واسئلة تانية.. وكل حد فينا اخد ورقة وقلم وبدأنا نكتب في كلمات اجاباتنا على الأسئلة، وبعد كده بدأ يخلينا نقرأ بالدور وبعدها بدأنا نكَوُّن جمل من الكلمات ونحولها لفقرات وبعد وقت، ما حسيناش بيه، كان معانا ورقة مكتوبة بخط اليد فيها الرسالة العائلية.
يومها كان قلبي بيرقص من الفرحة. رجعنا من السفر وكتبتها على الكمبيوتر وطبعتها وعلقتها في أماكن مختلفة في البيت. وتحولت الى مرجع بنرجع لنا، زي ما كوفي وضح، البوصلة بتاعت عيلتنا.
الناس بتسألني ارشح لها كتب.. وبيكون ردي انت فين وعايز تروح فين؟ عايز تقرأ كتاب ليه؟ ايه هدفك؟
لما بسمع طلب "رشحي لي كتاب" أول كتاب بفكر فيه على طول هو كتاب كوفي، اللي منه كتبنا رسالة عيلتنا. انما ليه قريت الكتاب ده؟ لأني قبل قراءته بشهور كنت بشتغل كتير جدًا.. وقصرت مع ولادي. وعملت واقفة مع نفسي اني مش عايزة ده. مش عايزة اكون أم ولادها يحسوا إنها ميتة وهي عايشة. عايزة نكون عيلة قريبة، دافية. عايزة البيت يكون جنتنا. نرجع واحنا نفسنا نرجع نقابل فيه أحب الناس لنا. نقعد فيه واحنا حاسين بأنس وسكن ودفء وقبول وحب ومودة وراحة، كل ده بدون تسيب او أهمال أو عيال مدللة وبيت عشوائي وولاد مش متربية. لا، بيت فيه نظام وفيه حب. فيه قواعد وفيه تفاهم.
هل كتابة الرسالة كافي؟
لأ طبعًا. من بعد ما كتبنا الرسالة بقينا كل سنة، في الذكرى السنوية لكتابتها، بنقراها ونفكر عيشنا منها ايه؟ ايه محتاجين نعيشه اكتر؟ هل في حاجة عايزين نعدلها؟ او نضيفها.. في سنة مثلًا الولاد طلبوا إننا نضيف اللعب مع بعض… إننا نخصص وقت نلعب فيه مع بعض..
كتاب كوفي بالنسبة لي كان نقلة محورية في حياتنا.. حجر الأساس فيها هي البوصلة.. انما مش الحجر الوحيد..
في الكتاب كوفي عرض ٨ مفاهيم تانية عظيمة الأثر لما العيلة تعيشها..مفاهيم زي
١- الرصيد، زي رصيد البنك كده. إن كل واحد له رصيد نودع فيه حب والمهم إننا نفضل نودع وإلا الرصيد يتصفر والعلاقة تفلس.. المهم إن نحط حب بعملة يستقبلها الأخر كحب. يعني لو طفل بيحب نلعب معاه، نحط في الرصيد لعب معاه، لو زوجة بيفرق معاها إن عيلتها تساعدها في شغل البيت، يحطوا في الرصيد مساعدة ب"حب"
٢- احترام الغائب، إن ماحدش يتكلم على حد في ضهره لأن ده بيهز الثقة وإن اللي عنده مشكلة مع فرد في العيلة يروح يقول له على طول مش يغتابه مع فرد تاني من العيلة.
٣- الأولويات.. وازاي العيلة نفسها أولوية.. الإهتمام والمشاركة، أولوية إننا نحضر حفلات ولادنا في المدرسة وأولوية إننا نحضر اجتماعات اولياء الأمور، أولوية إن زوجي ياخدني جلسات التخاطب علشان صوتي يطيب، أولوية إني اهتم بنفسي علشان أكون أم قدوة لولادي… وأولوية إن زوجي وأنا يكون لنا وقت خاص بينا بدون الأولاد، نسافر أو نتفسح أو نعمل نشاط مشترك علشان ده أصل الأسرة، الزوجين وتغذية علاقتهم مهمة جدًا…
٤- الاستماع بإنصات للي افراد العيلة بيقولوه، مش بس بالكلام، لأ الإنتباه كمان للي بيتقال من خلال بنبرة الصوت ولغة الجسد والعيون.. الإستماع من أجل الفهم والإحتواء والدعم والتفاهم، الإستماع بحب، مش بأحكام ولا بترقب ولا بالتفكير في تحضير الرد وقت مع الشخص بيتكلم.. الإستماع له للفهم Listening to understand, not to reply
٥- التفكير بمبدأ إن كلنا نكسب.. ما نعملش اختيار يطلع حد فينا بيه متضايق او مضغوط او مكبوس.. لأ.. نفكر بشكل مبدع ومبتكر ونتواصل ونتشارك لحد ما نلاقي اختيارات ممتعة ومناسبة لنا كلنا.
٦- التكامل… وازاي كل حد فينا متميز وموهوب في جزء..وكل حد فينا يخدم ويساعد عيلتنا في الجزء اللي شاطر فيه وشغوف بيه.. وبالتالي مش بس بنتعاون، لأ بنتكامل…
٧- سن المنشار، وهي الأجازات الدورية والوقت الخاص اللي نقضيه مع بعض كعيلة، ووقت خاص لكل فرد مع فرد تاني لوحدهم، علشان يقربوا من بعض ويفهموا بعض، وقت فيه نلعب ونضحك، ونسمع ونتسمع.. بدون تأنيب أو لوم أو عتاب… وقت دافي لعيلتنا…
٨- أهمية إن العيلة يكون لها تأثير إيجابي على المجتمع وتنشئة الأولاد على العطاء والاحترام وقبول الآخر.
بعد الكتاب ده وبعد ما كتبنا الرسالة، بقيت من اشد المعجبين بكتب كوفي. قرأت له كتب تانية وأثرت في حياتي وفي شغلي بشكل محوري…
ستيفن كوفي ايه بالنسبة لي؟
هو أكتر شخص ملهم بالنسبة لي في الدنيا..
حقق نجاح عالمي، الكتب بتاعته لسه بتلهم وتفرق في حياة الناس بعد وفاته..
حضرت له مؤتمر عن القيادة في مصر سنة ٢٠١٠، كان سنه ٧٨ سنة وابهرني بطاقته وحضوره وشرحه وإدارته للقاعة والحاضرين وهو في سن كبير كده…
واللي أبهرني أكثر مع نجاحه العالمي ده هو علاقته بعيلته واولاده واحفاده..
كوفي اتمنى إنه لما يتوفى يكون محاط بعيلته.. أحب الناس له واكبر نجاح حققه في الحياة..
رسالة نشرها وعاشها بكل كيانه، إن العيلة أولًا.. وإن العيلة مش شيء مهم، العيلة أهم شيء.
وفاته كان فيها ولاده التسعة، ٥٢ حفيد بالإضافة الى ٦ احفاد لأولاده..
إنسان عاش يدعو إلى القيم والأخلاق..
لما حد طلب منه نصيحة في البيزتس كانت نصيحة Let God be the centre of your heart
خلي ربنا في قلبك… واتحرك بيه وله… في شغلك وبيتك وحياتك اليومية.. خلي ربنا بوصلتك…
الكتاب والكاتب معاهم بعيش حالة من التفاؤل والأمل.. بتشحن إني اكون احسن في اخلاقي وفي اولوياتي وفي علاقتي بعيلتي وفي اهتمامي بصحتى، أملا إني اكون لحد أخر يوم في عمري لسه بالهم الناس تتعلم وتهتم بعيلتها..لأني مؤمنة إن العيلة مش حاجة مهمة.. العيلة أهم حاجة..
وايوه الموضوع مش سهل.. إنما مستاهل..
لو كان الفلاح استصعب الزراعة كان زمانا موتنا من الجوع..
نتعب ونصبر زي الفلاح حبيتين.. ونجني احلى واطيب ثمار في الدنيا.. اسرة مترابطة وأطفال سعداء…
اللينك ده فيه فيديو ملهم جدًا لكوفي عن العادة التانية.. اللي فرقت في حياتنا كعيلة..
فيديو كمان بيشرح الكتاب والعادات موجود في اللينك ده
واحد من الكتب اللي في سلسلة العادات السبعة كتاب موجه للأطفال، كتبه ابن ستيفن كوفي، بعنوان "العادات السبعة للأطفال السعيدة". كتاب مصور وجميل.. استمتعنا كأسرة بقراءته مرات عديدة..
#كتب_غيرت_حياتي_٢
#اكتر_ناس_الهمتني
#كتابة
#قراءة
#تعليم
#تطبيق
#مجتمع
#كن_إنسانًا
#سيب_اثر
بعاداتي باصمم حياتي
سلسلة بعاداتي باصمم حياتي - ١٧ حلقة هدية للتعرف على كيفية تبني العادات والإلتزام بها
