٧ خطوات يساعدوك تتخلص من الجُبن

وأنا في الجامعة كنت في كلية اعلام، قسم اذاعة وتلفزيون. كان عندنا مادة عن الدراما. والدكتورة طلبت مننا نحلل فيلم الإرهابي. وقتها عملت تحليل إن الفيلم حلو جدًا، كان تحليلي سطحي جدًا.  قدمت التحليل للدكتورة وأنا فاكرة إنه كله تمام و١٠٠/١٠٠ وفي المحاضرة لما الدكتوراة بدأت تقف علي مشاهد في الفيلم وكلمات وملابس وصوت وديكور واضاءة و… اكتشفت اني مُغيبة.. اكتشفت إن التلفزيون عمل لي غسيل مخ وأنا صغيرة. ومن يومها وأنا بركز جدًا اتفرج على ايه ولو اتفرجت اركز بيحاول يرسخ عندي مفاهيم ايه. 

أحد المفاهيم اللي اترسخت عندي من الطفولة وبسبب الأفلام، مفهوم ان الجري للجدعان. وإن لما تيجي الريح طاطي لها، وإن الجري نص الجدعنة. بمرور السنين والمواقف اكتشفت اني كائن جبان. ايوه… زي ما بقولك كده. إنسان يفتقر للشجاعة على اصعدة كتير قوي. خايفة اقول اللي بيضايقني لاحسن الناس تتضايق. خايفة اعتذر عن زيارة لاحسن فلان يقول اني… خايفة اقول اني عايزة.. لاحسن.. خايفة اعيط لاحسن يقولوا عليا زنانة.. خايفة استقيل من شغلي لاحسن يطلع عليا سمعة اني مش وفية، خايفة اسيب شغلي لاحسن اعاني من الوحدة. خايفة اعمل حاجة مش ممتازة لاحسن الناس تتهمني بالتقصير. لاقيت اني تحولت الى كائن غير شجاع. كائن متخاذل، جبان. 

لحد ما وصلت للقشة اللي قسمت ضهر البعير. وبمساعدة معالجة نفسية بدأت واحدة واحدة اتواصل مع نفسي تاني. بدأت من حد مش قادر يبص لنفسه في المرايا، لإنسان زعلان من نفسه انها جبانة كده. وبدأت واحدة واحدة اقول أنا عايزة ايه؟ انا خايفة من ايه؟ ايه فعلًا اوحش حاجة ممكن تحصل. وقتها بدأت اتفرج على فيديوهات لايف لروبين شارما، واسمه بودكاست له. وفيهم اتكلم عن الخوف والشجاعة. واتكلم انهم مش عكس بعض. اتكلم إن الشجاعة مش انعدام الخوف، الشجاعة هي الحركة والإقدام مع وجود الخوف. وشرح ازاي على الإنسان انه يجري تجاه خوفه، ويصاحبه، يسمع الخوف بينبهه لإيه ويتحضر لو الخوف فعلًا مبرر. ولو مش مبرر يخوف الخوف، يهشه. 

موقف/Attitude الشجاعة وقيادة الذات

حياتي مرت بمحطات محورية، زي ما بنسميها Turning Points، كل واحدة فيهم احتاجت مني شجاعة. احتاجت مني اني اجري تجاه الخوف، واني اصم وداني عن كل كلام الناس اللي بيضخموا صوت الخوف لحد ما يعملوا صدى صوت يحاوطني من كل اتجاه. وقت ما سبت الشغل في الحضانة واتنقلت للإعدادي احتاجت موقف الشجاعة. وقت ما قررت اني اخرج بطلابي من بين الأربع حيطان بتوع الفصل علشان مشروع خدمة مجتمع احتاجت الشجاعة. وقت ما استقلت ووقت ما بدأت الشركة بتاعتي احتاجت الشجاعة. مع كل مرة بقف واقول للناس اني معتذرة عن حاجة او ان الحاجة دي مش مناسبة ليا بحتاج الشجاعة. وقت ما تبنيت الصحيان الساعة ٥ صباحًا من ٥ سنين احتاجت شجاعة. 

ليه اتحركت من الجبن للشجاعة؟ ليه قررت اصادق خوفي؟

 لأن طول ما كنت جبانة كنت عايشة زي الغنم اللي ماشي مع القطيع. مسلوب الإرادة. بيقول حاضر زي الأطفال وهو بالغ. بيتصرف وفقًا لما يحبه المستمعون والمشاهدون والمارة والراقدون والنائمون واي كلب معدي في الشارع الا ما يحبه حد واحد بس، هو نفسه. ليه؟ لأن جبان. الكائن ده كان أنا. 

ازاي اتغيرت؟ بقيت اقل جُبنًا واكثر شجاعة؟

٧ خطوات يساعدوك تتبنى موقف الشجاعة:

١- تواصل مع نفسك. اسألها عايزة ايه ومش بتعمله؟ ومش عايزة ايه وبتعمله؟ وليه فيه ثغرة بين الاتنين؟ وأبدآ مرن نفسك انك تعمل اكتر اللي عايزه وتتخلص اكتر من اللي مش عايزه. خلي عندك شجاعة إنك تكون أنت نفسك مش حد تاني. 

٢- اسمع لخوفك. اوعى تخرسه. اسمعه وعبر عنه بينك وبين نفسك. اكتب عنه. خليك حقيقي واعترف بالجبن في مواقف او مجالات معينة. وصنف اللي بيقوله لك الخوف ما بين حقائق، توقعات غير مضمونة، اكاذيب، خرافات. 

مثلًا لو نزلت اجري على البحر الساعة ٥ صباحًا الدنيا هتبقى برد (حقائق)، هيجي برد (توقعات)، هتخطف (اكاذيب)، عروسة البحر هتطلع وتاكلني (خرافات) 

٣- شارك الخوف ده مع حد شجاع. حد يكون تغلب على خوف شبه اللي عندك. 

وقت ما استقلت، شاركت قبلها خوفي مع صديقة عزيزة ليا كانت استقالت قبلي. سمعتني وادتني شحنة شجاعة.

٤- حدد خطوات عملية/احتياطات ممكن تعملها في حالة حدوث ما لا يحمد عواقبه. 

مثلًا أنا بركب عجل في المصيف داخل القرية اللي بنصيف فيها. كنت مفتقرة الشجاعة اني اسوق في القاهرة. اخدت درس مع مدربة وطلبت منها نصايح لو لاقيت مياه وانا سائقة او زيت، لو كلاب طلعت تجري ورايا. وقتها ادتني نصايح اعملها. 

٥- نفذ الخطوات دي عند اللزوم. كابتن ايمان سليمان اللي علمتني اسوق عجلة في الشارع، فهمتني ازاي اهش الكلاب لو طلعت تجري ورايا وانا على العجلة. وفعلًا، بعد الحصة في اوائل المرات اللي سوقت فيها العجلة طلعت كلاب تجري ورايا. وقفت وهشتهم وانا مليانة ثبات انفعالي، مليانة شجاعة، مش جُبن.

٦- احتفل بنفسك مع كل تصرف شجاع. صقف لها. بص لها في المرايا وقول لها شكرًا. جيب لها ورد او هدية رمزية.

٧- اثبت علي موقفك لما تتعرض للهجوم. لما تتعرض له بدل ما تزعل احتفل، انك بعدت عن الجُبن ومتجه ناحية الشجاعة. الناس لما تهاجمك وتقول انك اتغيرت. اعتبر ده من افضل الإطراءات اللي ممكن تسمعها في حياتك. انت اتغيرت يعني انت بقيت انت، انسان حقيقي، شجاع، بيقود نفسه تجاه اللي عايزه، انت مش جبان. انت بقيت اشجع من الأول. 

ليه اتحلى بالشجاعة؟

الشجاعة هي موقف ملازم لكل من صنع تغيير حقيقي للإنسانية او تطور كوكبنا. الأخوان رايت مثلًا كان عندهم شجاعة الابتكار والناس كانت بتسخر منهم. غاندي كان عنده شجاعة، روزا باركس كان عندها شجاعة انها ترفض تقوم من على الكرسي في الاتوبيس علشان واحدة بيضاء تقعد، مارتن لوثر كينج كان عنده شجاعة… 

هتقول انا مش عايز اكون من صناع التاريخ. تمام. المهم تكون حقيقي. مفيش حد جبان حقيقي، ومفيش حد حقيقي جبان. الحقيقية والجُبن دونت مكس. 

فيديو ملهم لجيم رون عن الشجاعة في الفيديو ده، بيوضح الفرق بين الشجاعة والرعونة/التهور/الغباء

https://bit.ly/3rrpiv9

فيديو قصير عن روزا باركس موجود في اللينك ده

https://bit.ly/3xHA2qp

لينك صفحة كابتن ايمان سليمان كوتش سواقة العجل هنا

https://www.facebook.com/captinemansoliman

#الموقف_الثالث ـوـالعشرين_الشجاعة

#كتابة

#قراءة

#تعليم

#تطبيق

#مجتمع

#كن_إنسانًا

#سيب_اثر