١٣ سلوك نتبناهم علشان نكون محل ثقة. عندك كام منهم؟

أنا:“وعد يا فاروق؟“

فاروق ابني: ”لا مش وعد. إن شاء الله هافتكر.“

أنا:”طيب اوعدني.“

فاروق: لأ مش هاوعدك. كلمة وعد دي كبيرة قوي.“

حوار اتكرر كتير بيني وبين ابني فاروق. مش لأنه مش بيوفي بوعده.لأ، بالعكس. لأن كلمة وعد بالنسبة له كلمة فعلًا كبيرة قوي. 

بعد ولادة فاروق ابني بسنين قليلة دار حوار بيني وبين جوزي عن موضوع الوعود. يومها شرح لي ازاي اتعود من والده انه يكون قد كلمته وانه لو وعد، الوعد بيكون شئ مقدس. وازاي انه في تربيته لفاروق مهتم إنه يكون قد وعوده معاه، وبالتالي يفكر كويس قبل ما يوعد مهما كانت الحاجة تبان تافهة، مثلًا: هجيب ده وأنا راجع او هاخدك اليوم الفلاني المكان العلاني او هحضر حفلتك في المدرسة وهكون موجود في الميعاد. وعد يعني وعد ومهما كان بسيط. 

كلام جوزي خلاني اراجع السنين اللي قضتها معاه قبلها. ولاقيت ان ده مش كلام افلام، ده معتقد ادى لسلوك هو متبنيه بثبات. الوعد يعني وفاء بالوعد، مع كل شخص وفي كل وقت وتحت اي ظروف. والتفكير كويس قبل ما يوعد علشان فعلًا يوفي بالوعد. 

مرت سنين بعد ولادة فاروق وبدأت اقرأ بنهم للمؤلف العالمي ستيفن كوفي علشان اكون انسان احسن وأم وزوجة أحسن. وأحد الكتب اللي قرأتها له كانت ””The Speed of Trust. اتكلم في الكتاب عن حجر اساس العلاقات وشرح فيه إن الثقة هي حجر الأساس في اي وكل علاقة. وطبعًا تطرق لسلوكيات مختلفة لبناء الثقة، ومنها سلوك مهم ومحوري وهو الوفاء بالوعد. 

مع الكتاب ده كانت أول مرة اتعرف على مفهوم "علاقة الإنسان بنفسه“. قبله كان دايمًا مرتبط عندي علاقة ب“طرف أخر“، زوج، اخت، صديقة، ابن، اب.. انما مع الكتاب كوفي خصص صفحات طويلة وعميقة عن اهمية بناء الإنسان ثقة بنفسه الأول، قبل اي علاقة تانية. 

موقف/Attitude ال Trust وقيادة الذات

في سلسلة المقالات دي باتكلم عن المواقف المحورية لقيادة الذات. طبعًا من كتاب كوفي اللي قريته في ٢٠١٠ استوعبت اهمية بناء علاقة مع نفسي اساسها الثقة. واللي بتبدأ من اصغر الأشياء. مثلًا باقول لنفسي يوم كذا هناخده اجازة أو بعد ما نلعب رياضة هنشرب العصير اللي بتحبيه أو لما نقبض هجيب لك ورد أو مش هسمح لفلانة تضغط عليكي أو مش هاسكت لو فلان تعدى الحدود اللي احنا حاطينها. وبعدين..؟ وبعدين تيجي نفسي تشوف، هل فعلًا وفيت بالوعد؟ أخدت الأجازة؟ جبت الورد؟..الخ الخ..

ليه ده مهم؟ وبالذات لقيادة الذات؟ 

لأن القائد، زي ما شاركت في مقالات قبل كده، مطلوب منه صبر وانضباط ومثابرة وصمود، وكلام كتير.. وبعدين؟ وبعدين يحصل إن القائد يزودها حبتين تلاتة عشرة ويحرق الموتور، لا ياخد اجازة ولا يرتاح ولا يحتفل بانجازاته الصغيرة ولا يحط حدود مع غيره، لأنه عايز ينجح ويتفوق ومستعجل النتايج.. وبعدين؟ وبعدين نفسه تبطل تثق فيه.. بعد ما لعبت رياضة قال لها مفيش وقت نشرب العصير، بكرة نشرب ياللا دلوقتي نشتغل، ويجي اخر الشهر ويقول لها ايه ده ما خستيش خمسة كيلو؟! خسيتي تلاتة بس؟ بدل ما يحتفل بسعيها ويقف يسألها هل الهدف كان منطقي ولا لأ ويستوعبها.. فالنفس تتمرد.. تعلن العصيان وتقرر اني مش لاعبة، لأني مش واثقة في القائد ده.. ده قائد بيضغطني ومش مقدرني ومش محل ثقة.

موقف/Attitude ال Trust والعلاقة بالآخرين

سمعت قبل كده عن السحلية اللي بتغير لونها؟ تمام كده الشخص اللي بيغير مواقفه. يعني ايه؟ يعني مع الأخرين تمام ومية مية، بيوفي بالوعد ومحل ثقة. ومع نفسه؟ ومع نفسه ولا ثقة ولا يحزنون. هل ده قائد؟ في مقالة قبل كده اتكلمت عن ”الثبات“، موقف محوري للقائد، يعني له لون واحد، محل ثقة، سواء مع نفسه، مع عيلته، مع زمايله، مع المدير والغفير والكبير والصغير.. لأنه هو محل ثقة، بيتصرف وفقًا لقيمه الأخلاقية، مش وفقًا للمواقف والظروف.. 

تخيل كده شخص سمعت من غيرك انه محل ثقة، ولما تعاملت معاه خلف الوعد معاك، اتأخر في ميعاد تسليم، أو غش في الخامات، أو رفع السعر عليك، هل هتثق فيه تاني؟ طيب هل هتثق في الشخص اللي رشحه لك؟ علشان كده الموضوع عميق.. متشعب.. لأ كمان غالبًا بنَرجَع الموضوع للتربية.. إن الأهل ما ربوش ولادهم إنهم يكونوا أهل ثقة.

طيب والعمل؟

ستيفن كوفي في كتابه العظيم، شرح ١٣ سلوك الإنسان محتاج يتبناهم علشان يكون شخص محل ثقة..علشان يكون انسان Trustworthy، وهما:

١- الصدق في القول 

٢- احترام الآخرين والتصرف بطريقة تدل على الاهتمام بيهم من القلب

٣- الشفافية وعدم اللف والدوران وحجب معلومات من حق الآخرين معرفتها 

٤- تصحيح الأخطاء ورد الحقوق 

٥- الوفاء للآخرين والاعتراف بفضلهم 

٦- اتمام المهام المكلف بها وعدم التحجج أو اللجوء لأعذار 

٧- وضع آراء الآخرين في الاعتبار والسعي للتحسن كالأهل والمديرين والقادة ممن يريدون مصلحته

٨- التعامل مع الواقع مهما كانت صعوبته على الفور بدون تسويف

٩- توضيح التوقعات ما بين الأطراف المختلفة ومناقشتها والإتفاق عليها 

١٠- أنه يكون يعتمد عليه، ويتحمل مسؤولية نتايج افعاله 

١١- إنه يستمع للآخرين بإنصات ولا يتصرف وفقًا لتوقعاته وتخيلاته بدون اتفاق واستماع للغير 

١٢- الوفاء بالوعد وتوضيح النية مع الوعد أو الفعل المقبل عليه 

١٣- أنه يثق في الآخرين وما يفضلش يشكك في اللي حواليه بسبب تجارب سلبية سابقة 

 يا سلام لو راجعنا نفسنا وشفنا احنا بنعمل كام سلوك من ال١٣ دول وقررنا إننا نبدأ نتحسن واحدة واحدة لحد ما نتحول لإنسان جدير بالثقة. الأول زي ما كوفي قال مع نفسنا، وبعدين مع دوايرنا… وعلى رأسها وأهمها بدون منازع اقرب دايرة وهي أهل بيتنا. 

هل الثقة تُمنح أم تُكتسب؟ 

في كتابه ستيفن كوفي اتكلم عن مفهوم الثقة العمياء والثقة الذكية. ووضح الفرق بين شخص بيثق في كل الناس، بدون سابق معرفة أو تعامل، وبالتالي بعد شوية تعاملات بيتحول من الثقة العمياء لعدم الثقة في اي شخص. لأنه أتألم او اتقرص من بعض الأشخاص، تخيل إن مفيش حد محل ثقة. 

طيب والثقة الذكية؟ ثقة فيها حرص، فيها الناس هتتعامل معانا في حاجة صغيرة الأول، ولو لاقيت إننا محل ثقة هتتعامل معانا في حاجة أكبر، لو كان عندنا أمانة ووفينا بوعدنا وصدقنا في كلامنا واحترمنا الميعاد وخلافه، هيزودوا مساحة الثقة.. ولو لاقوا إننا اعتذرنا لما اخطأنا او بلغناهم قبل ميعاد التسليم إن فيه ظروف حصلت لنا فهنتأخر برضه هيفضل رصيد الثقة يزيد.. لحد مع تكرار المواقف وثبات سلوكنا يوصل بينا إننا نكون ناس أهل للثقة..

طيب لو علاقتنا بالآخرين مسوسة وخربانة وعمود الثقة مشقق أو متهالك؟

لسه فيه فرصة. كوفي اتكلم عنها في كتابه وفرد لها جزء ملهم جدًا بعنوان ”اعادة بتاء الثقة“ أو Restoring Trust 

وشرح قد ايه ده مهم ما بين الإنسان ونفسه، وعلاقته الشخصية، وعلاقاته العملية، وفي المجتمع وفي تعاملاته المادية و الاقتصادية. 

لو غمضت عينيك وتخيلت حياتك وانت فيها إنسان قادر تثق في اللي حواليك، اللي اتفق معاك على حاجة بيعملها، واللي عمل حاجة غاط بيصلحها، واللي بيتعامل معاك بيسمعك ويتكلم معاك في توقعاته و كل ال١٣ نقطة اللي شرحتهم فوق وفقهًا لكتاب كوفي، يا ترى حياتك هتبقي عاملة ازاي؟ هتحس بإيه؟ جودة علاقاتك هتكون درجتها ايه؟

خد نفس عميق كده، حلوة الحياة والناس محل للثقة، صح؟

طيب، ياللا ابدأ بنفسك، ايوه إنت. كن أنت التغيير اللي نفسك تشوفه في الدنيا حواليك زي ما غاندي قال. 

“Be the change you want to see in the world.” Mahatma Gandhi 

ملخص لكتاب كوفي عن بناء الثقة هنا باللغة العربية في فيديو في اللينك ده

shorturl.at/fmuTX

ملخص سريع لكتاب كوفي عن بناء الثقة في مقالة باللغة الإنجليزية موجود في اللينك ده

shorturl.at/dtAIO

وأحد الأفلام اللي بتوضح ازاي القائد يكون محل ثقة بثبات افعاله وسلوكه فيلم بعنوان Saving Private Ryan

#الموقف_الحادي_عشر_بناء_الثقة

#كتابة

#قراءة

#تعليم

#تطبيق

#مجتمع

#كن_إنسانًا

#سيب_اثر