موضوعين مكملين لبعض علشان ترفع جودة حياتك

في شهر يونيو  سنة ٢٠٢١  نزلت بوست على الفيس بوك سألت فيه الناس نفسهم إني اكتب عن ايه؟ ايه في دايرة اهتماماتهم..علشان اكتب عنه في مقالتي الأسبوعية كل يوم الخميس.. 

بما إني باحب القراءة والكتابة جدًا، والاتنين من وجهة نظري مكملين لبعض. الكاتب محتاج يكون قارئ علشان يلهم ويثري القراء. والقارئ يا ريت لو يفيد غيره بالكتابة ومشاركة تأثير الي اتعلمه من قراءاته ايه وازاي بيطبق اللي اتعلمه… وبما إني قارئة نهمة من ٢٠٠٥، بدأت بعد عشر سنين، من ٢٠١٥، اكتب علشان اشارك اللي اتعلمته وانفع بيه غيري.

الموضوعات اللي الناس اقترحتها كانت متعددة، جمعتها تحت ٨ عنواين:

١- الذات: الوعي بالذات، قيادة الذات، إدارة الذات، التعامل مع المشاعر، التعايش مع التغيرات القوية الي بتحصل في حياتنا، تنمية الذات، ازاي المشاعر ممكن تكون اضافة في الحياة (حتى المؤلمة) 

٢- الAttitudes: الفاعلية، الانضباط، الدافعية الداخلية، المثابرة، الاستمرارية، التعامل مع الإخفاقات، مقاومة الملل، التركيز وعدم التشتت، المحافظة على الطاقة، التوازن بين الحياة الشخصية والعملية

٣- العلاقات: الأسرة والترابط بين افرادها وازاي يكون بينهم تعاون وتقدير، التربية وتأثيرها على الطفل ونفسيته، 

٤-الشغف: اكتشافه 

٥- تجربتي الشخصية: الإستراتيجيات اللي طبقتها في حياتي، اشد الناس الملهمة ليا واثروا في حياتي وعملت ايه بالتأثير ده، الإسهامات من جلسات التأمل، ازاي نتدرب على التأمل، يومياتي والرفلكشن بعدها 

٦- الثروات الحقيقية: الوقت والصحة

٧- الكتب: اكتر حاجة استفدتها وطبقتها من كل كتاب، ازاي نكتب رواية وازاي نكتب كتاب، ازاي نطبق اللي بنتعلم 

٨- النجاح: ازاي ناخد قرارات، ازاي نحدد أهداف ونوقن إنها فعلًا اهدافنا وازاي ناخد خطوات جدية في تنفيذها

جمعت المقترحات ولاقيت الموضوعات ممتعة وشيقة.. فكرت في الموضوعات ولاقيت فيه موضوعات هي مجال شغلي ودراستي وتطبيقي وشغفي ورسالتي وسعيي.. موضوعات هي منطقتي.. اللي باحب اقرأ عنها واتعلم عنها واكتب عنها واعلم الناس عنها..

ولاقيت موضوعات تانية مريت بيها بشكل شخصي، انما مش مجالي، يعني فيه ناس متخصصة عني الأفضل هي تكتب عنها.. زي مجال التربية والترابط الأسري.. 

ومن هنا و بعد ما راجعت الموضوعات اكتر من مرة، قررت ابدأ الكلام عن موضوعين باشوفهم مكملين لبعض.. الذات والattitudes .. وفعلًا من اول يوليو ٢٠٢١ بدأت اكتب عنهم كل اسبوع، وبفضل ربنا كملت كتابة ٢٥ اسبوع ورا بعض وفي اخر ديسمبر جمعت المقالات في كتاب الكتروني بعنوان ”موقفك إيه“. 

ورجعت تانية النهاردة للموضوعات اللي الناس مهتمة تقرأ عنها، واخترت زي المرة اللي فاتت إني اكتب عن موضوعين مكلمين لبعض من وجهة نظري الموضوع الأول هو رقم ٧ وهو ”الكتب“ ايه اكتر حاجة استفدتها من كل كتاب، بإذن الله اختار كتب متنوعة وموضوعات مختلفة علشان تساعدنا نوسع مداركنا في مجالات مختلفة. أما الموضوع التاني فهو رقم ٥ وهو عن الإستراتيجيات اللي طبقتها في حياتي واشد الناس الملهمة ليا واثروا في حياتي ازاي وعملت ايه بالتأثير ده. 

يعني الكتب واللي طبقتهم منهم وازاي طبقته والكُتاب دول اثروا في حياتي ازاي.

انتظروني بإذن الله كل خميس مع مقالة جديدة وكتاب وكاتب وتجربة شخصية..

#قيادة_ذات

#كتابة

#قراءة

#تعليم

#تطبيق

#مجتمع

#كن_إنسانًا

#سيب_اثر