سؤال واحد جوهري يساعدنا ننجح بدل ما نسقط

كتير بنقف بسبب الترتيب.. 

عقلنا بيقف احيانًا يسأل اعمل ده ولا ده الأول؟ اتحرك تجاه ايه الأول، ارد على مين الأول..

ونلاقي نفسنا استهلكنا وقت وطاقة واحنا واقفين في مكاننا، تايهين جوا عقلنا..

في السلسلة دي هكتب عن "علاقات في لحظات.."

بدون ترتيب.. بشكل تلقائي.. باللي يجي على قلبي.. ايمانًا مني إن القلب يعرف احسن.. وبيفكر احسن..

علاقة النهاردة كلنا مر بشبهها - كلنا مش تعميم.. إنما كلنا فعلًا..

كل حد فينا كان عنده مدرس.. بيدرس له..

وأنا كان عندي مدرسين كتير..

منهم مُدَرِسة كنت بكره مادتها جدًا.. الأحياء..

وكنت مستنية ثانوية عامة علشان مش هدرس احياء، علشان كنت ناوية ادخل علمي رياضة..

وعلى سنتي الوزير قرر ان فيه ثانوي علمي او ادبي.. بس.. مفيش ولا علمي علوم ولا علمي رياضة!!

ولاقتني بدخل ثانوية عامة وبدرس احياء.. أو بمعنى اصح رافضة ادرس الأحياء… 

قعدت شهر ورا شهر مش بذاكرها.. 

بذاكر الرياضيات والفيزياء والكيمياء.. أما الأحياء فكنت مخصماها.. مش بس كده.. 

أنا كمان كنت متقمصة دور المهملة في الحصة.. والمدرسة شافت مني وش غريب عني أنا نفسي...

وش رفض على استهتار على عِند كده…

مرت الشهور وجاء امتحان التجربة.. قبل امتحان اخر السنة بشهرين..

ولاقيت مدام ليليان بتوقفني في الحصة.. وهي بتديني ورقة الإمتحان.. 

كنت جاية ٢ من ٦٠.. وتخيلت يومها انها هتهزئني أو توبخني قدام الفصل..

وقفت وانا في انتظار اللوم والتعنيف..

وكانت لحظة محورية.. وعلاقة يمكن هي مش مستوعبة تأثير اللي عملته يومها عليا وعلي ناس كتير قوي تعاملت معاهم..

وقفتني وسألتني ايه مشكلتي؟ ليه جايبة الدرجة دي؟

 وقالت لي انها سألت باقي المدرسين وقالوا لها اني كويسة جدًا..فإيه مشكلتي؟ 

صوتها كان فيه حاجة محورية للعلاقات… صوتها كان فيه "اهتمام"

رديت قلت لها اني بكره المادة دي.. بكرهها…. وطبعًا اتكيت لها على الهيه (مش السين :) )

سكتت لحظة وبعدين قالت لي طيب فكري..

علشان بتكرهيها تدوسي على نفسك وتخلصي منها مدى الحياة..

ولا تسقطي فيها وتعيدي السنة وكل اصحابك يروحوا الجامعة وانت لأ…؟؟

حوار اخذ دقايق.. وصلني فيه قبول لمشاعري تجاه المادة..

وصلني فيه استيعاب لكرهي للمادة دي..

وصلني فيه اهتمامها انها تسأل المدرسين عني.. ووصلني فيه صدقها في انها تفهم..

ووصلني اصرارها انها تساعدني اتخطى التحدي ده.. العائق النفسي اللي بيني وبين الأحياء..

بعد اليوم ده، ولأني حسيت بالقبول والاهتمام بدأت اذاكر الأحياء.. وبعد شهرين كان امتحان آخر السنة..

جبت فيه ٣٢ من ٤٠.. ٨٠٪… معجزة طبعًا بعد ال٢ من ٦٠!

بعد سنين من الموقف، وخلال شغلي كمُدَرِسة.. وخلال تربيتي كأم لولادي.. بقيت افكر في مدام ليليان..

وازاي بنت علاقة في لحظة.. علاقة بيني وبين نفسي.. علاقة بيني وبين ولادي… علاقة بيني وبين طلابي..

احيانًا بفكر فيها واتمنى اعرف اوصل لها.. واقول لها قد ايه أنا ممتنة لها.. إنها تعاملت معايا بإهتمام.. وحكمة.. وساعدتني احقق هدفي واجيب مجموع يدخلني كلية الإعلام زي ما كنت عايزة.. مش اعيد السنة بسبب الأحياء..

مش كل مدرس مدرس..

إنما كل "إنسان" مدرس..

سواء كان جوا الفصل او في الدنيا الواسعة..

#علاقات_في_لحظات

#مشاعر

#ذكريات

#الخير_موجود

#اروي_غيرك

#تفاءلوا