السر اللي يحقق تحقق المستحيل!

attitudes daily determination goals habits leadership learning maxwell persistence resources team work

من سنتين تقريبًا قرأت كتاب لجون ماكسويل، رائد خطير في القيادة، مؤلف لاكثر من خمسين كتاب، عدد لا بأس بيه منهم عن القيادة، وصاحب مدرسة كوتشينج باسمه. في الكتاب اتكلم عن الحاجات اللي بيعملها كل يوم. ومنها كان انه كل يوم بيقرا، كل يوم بيكتب وحاجات تانية كمان. خلال قراءة الكتاب وقفت مع نفسي وسألتني ايه الحاجات اللي باعملها كل يوم؟ وايه منهم مشترك مع جون ماكسويل؟

لاقيت حاجة منهم إني كل يوم باقرأ، وكل يوم باكتب. إنما مش باكتب زيه. هو بيكتب بهدف التأليف كل يوم، تأليف كتب. وأنا باكتب كل يوم بهدف تثبيت المعلومة. في ايام باكتب مقالات او بوستات علي السوشيال ميديا او لو بألف كتاب بكتب. إنما اللي كل يوم باكتبه بقى لي سنين هو ”اتعلمت ايه امبارح.“

اللذيذ إني مصادر التعلم متنوعة. احيانا بكون اتعلمت من كتاب، او فيديو، واحيانا بيكون من طير او نخلة. واحيانًا بيكون من انسان اعرفه واحيانًا من انسان ما معرفهوش. كل يوم باكتب اتعلمت ايه.

من كام سنة كتبت اتعلمت ايه من فريدة. طالبة كانت عندي في اعدادي. كنا بنشتغل في مشروع خدمة مجتمع. وكان هي قائد لفريقها. كان المشروع لخدمة ايتام. وفريق فريدة كان هدفه انه يوفر ٣ اجهزة كمبيوتر للأيتام. بدأ الشغل على المشروع وفريق فريدة بيتقدم ببطء. وخلال مدة المشروع فريدة اتكلمت معايا ان فريقها مش شغال بفاعلية. اتكلمت مع الفريق وقالوا انهم وراهم حاجات تانية، وبيشتغلوا انما مش زي ما فريدة طلبت منهم. هي عايزاهم يشتغلوا اكتر وهما وراهم حاجات تانية. 

مرت الأسابيع وكان فاضل يوم واحد على ميعاد تسليم التبرعات ليا، اللي بيكون قبل زيارة الأيتام بالتبرعات بكام يوم. يومها فريدة عدت عليا في المكتب وطلبت مني اني اديها مهلة علشان تسلم ال٣ أجهزة. وقتها سألتها جمعت ايه؟ قالت انها جمعت تقريبًا تمن جهازين. قلت لها ان اتنين تمام مفيش مشكلة وطلبت منها تسلمهم في اليوم اللي بعده زي ما كان مطلوب. وفريدة وقفت تلح اني اديها فرصة. شرحت لها ان مرت اسابيع واتجمع قيمة اتنين بس، والأيام الفاضلة قليلة.. وهي اصرت اني اديها فرصة ووعدتني وعد شرف انها تسلم الأجهزة قبل يوم الزيارة. 

مرت الأيام وانا شايفة فريدة كل فسحة، كل فسحة صغيرة وكبيرة، بتفرش ترابيزة في الطرقة قدام الفصول، وتحط حاجات تتباع. عصاير، مولتو، بسكويت.. وخلافه…

كل يوم امر واسألها ايه الأخبار؟ تقول لي لسه. فريدة لوحدها، باقي الفريق استسلم إنهم جمعوا تمن جهازين. أما فريدة فمصممة. تلاتة يعني تلاتة. مرت الايام لحد ما وصلنا لأخر يوم.. وفريدة عدت عليا وقالت لي :“خلاص يا مس، جمعت تمن الجهاز التالت!“ صوتها يومها خلى جسمي يقشعر، زي ما مجرد اني افتكرت الموقف ما جسمي قشعر دلوقتي. 

سألتها ازاي يا فريدة؟ قالت لي عيلتي كلها ساكنة في عمارة واحدة. عديت بعت لهم الحاجات اللي فاضلة وجمعت منهم تبرعات لحد ما كملت تمن الجهاز التالت. يومها، من فريدة اللي كانت في بداية سن المراهقة اتعلمت درس عملي حي عن موقف/Attitude من أعظم وانبل واندر المواقف اللي مطلوب توفرها عند القائد. 

قيادة الذات والDetermination

عمرك تأملت نملة؟ اهي فريدة فكرتني بالنمل. في اصراره وصموده وتصميمه على تحقيق هدفه. مهما حصل بيصمم. لو وقفت قدامه هيغير مساره. لو اتقلب بيعدل نفسه ويكمل، بيفضل يتحرك ويجتهد علشان يحقق هدفه. زي ما فريدة عملت. صممت توصل للهدف. وده موقف محوري للقائد. مش كفاية يعرف الهدف. ولا يركز عليه. ولا يتحرك تجاه. لو قائد حقيقي، زي فريدة، هيكمل لحد ما يحقق الهدف. زي النملة اللي السبيل الوحيد انك توقفها انك تموتها. طول ما فيها روح، مكملة بثبات واصرار. وهكذا القائد. 

العناد والDetermination

سمة كانت مهمة عند فريدة، وعند النمل، انهم مش بيتصرفوا بعند. لأ. عندهم ثبات علي الهدف، وعندهم ذكاء في انهم يغيروا المسار لما يلاقوا طريق مسدود. فريق كانت في فريق من ٤ طالبات. لما لاقت ان ال٣ التانيين مش بنفس اصرارها، اختارت توفر طاقتها. وبدل ما تلعب دور الضحية او تشتكي او تتحجج بإن فريقها مش شغال زي ما هي طلبت منهم كقائد لتحقيق الهدف. اختارت تغير التكتيك. تشتغل هي وتجمع مش بس من المدرسة، لا من العيلة وتشتغل كل يوم في كل فسحة علشان تحقق الهدف. وبدل ما تعاند بغباء، عاندت بذكاء. عاندت في انها تتمسك بالهدف وتغير المسار.

 

الإحباط والDetermination

احد الجمل اللي الهمتني جدًا كانت لمتحدثة امريكية شهيرة اسمها ليزا نيكولز، كانت بتقول فيها 

Don’t expect from people to believe in your dream, cause God gave it to you, not them. It’s yours, not theirs. 

يعني ايه؟

يعني ما تتوقعش من الناس تصدق في حلمك او رؤيتك او هدفك او تشجعك على تحقيقه. لأنه حلمك انت مش حلمهم. بالعكس. كتير هتلاقي الناس بتضحك عليك او بتسخر منك او بتتريق عليك. زي ما زمايل فريدة كانوا بيسخروا منها في اخر ايام. وهي كل فسحة قاعدة تبيع علشان تجمع فلوس للكمبيوتر، طلاب كانوا بيعدوا ويقولوا لها انت لسه هنا؟ لسه بتبيعي؟ مش بتزهقي؟

فريدة عملت ايه؟ كان ممكن تحبط، تسمع كلامهم وتياس، إنما ابدًا. خلت كلامهم يزيدها حماس، يزيدها اصرار على انها تحقق هدفها. وفعلًا حققته.

بالتالي ما تتوقعش وانت مثابر على هدفك إن الناس هتصقف لك. لو لاقيت ناس تشجعك يبقى خير وبركة ونعمة وفضل من ربنا. لو مالاقيتش خليك انك اكبر مشجع لك. شجع نفسك لأن حلمك بتاعك انت وانت، لأنه حلمك، اللي بايدك توصل له بالصمود والإصرار لأخر لحظة. 

   

 

ازاي اتبنى موقف/Attitude ال Determination؟

فيلم Men of Honor هو فيلمي المفضل. فيه البطل اللي بيمثل قصة حقيقية بيضرب مثال عظيم للصمود. مر بتحديات كتير. مر باستهزاء وسخرية واهانة واحباط ، ومشكلة صحية كبيرة جدًا إنما كمل وثابر. 

من القصة الحقيقية اللي عرضها الفيلم استخرجت بعض الدروس اللي تساعد الإنسان يتبنى موقف ال Determination، منها:

١- إن الواحد يكون عنده هدف واضح وكبير، هدف ممكن الناس تقول انه صعب او اشبه بالمستحيل 

٢- ان الخطوات اللي هياخدها علشن يحقق الهدف تكون ممتعة بالنسبة له 

٣- إنه يتعلم ازاي يوصل للهدف من خلال القراءة عنه او الدراسة 

٤- إنه يطلب مساعدة من غيره 

٥- إنه يسد ودانه عن الناس المحبطة، مش بس كده، يخلي كلامها يزيده تحدي انه يحقق الهدف 

٦- إنه يكون عنده سبب راقي او رسالة نبيلة من ورا هدفه اللي عايز يحققه 

٧- إنه يصرخ، يشتكي، يبكي وقت الوقوع او الفشل، ويقوم يكمل، من غير ما يكتم مشاعره ولا يغرق في مشاعره 

٨- إنه يفكر في حلول بديلة كل ما يوصل لطريق مسدود 

٩- إنه يشوف ده نضج و صناعة من ربنا علشان يبقى إنسان احسن 

١٠- إنه يفكر في أثر اللي بيعمله وازاي الناس من بعده وبسبب صموده واصراره ممكن تبدأ وتسعى وتكمل وتحقق حاجات كانت تبدو مستحيلة

 

 

الرواد والDetermination

لو راجعت كل حد عمل تغيير كبير في الدنيا هتلاقي إنه كان عنده Determination. اديسون، ديزني، مانديلا، ستيف جوبز، غاندي، مايكل جوردان، كوبي براين، محمد علي كلاي، محمد صلاح.. 

كلهم بلا استثناء عندهم موقف/Attitude واحد مشترك، وهو الصمود: Either I win, or I die.  

 

 

 

احد الفيديوهات الملهمة جدا في موقف الصمود لكوبي براين في اللينك ده: 

shorturl.at/gnMQX

 

واحسن كتاب قريته عن موضوع الصمود كان بعنوان   Can’t Hurt Me by David Goggins - قصة حقيقية ملهمة جدًا بطلها في الفيديو ده 

shorturl.at/aiwyC

 

واكتر فيلم اتعلمت منه عن الصمود فيلم Men of Honor, صورته هنا:

shorturl.at/xKQW2

بعاداتي باصمم حياتي

سلسلة بعاداتي باصمم حياتي - ١٧ حلقة هدية للتعرف على كيفية تبني العادات والإلتزام بها