الخطاب الواحد و العشرين: احتواء المشاعر وتغيير الطاقة

”طيب بس احكي بسرعة علشان محتاجة اذاكر!!”

الأسبوع اللي فات ملك بنتي كان عندها امتحانات في الجامعة..

ايام مشحونة مذاكرة واكتر من امتحان في اليوم..

في يوم منهم جات طلبت مني اعمل لها شعرها بال babyliss 

لاحظت ان روحها في مناخيرها من حركاتها.. 

بتقعد بعصبية، بتقلب الورق اللي بتذاكر منه بنرفزة..

بدأت اقسم شعرها لخصلات.. وقلت لها عايزة احكي لك حاجة عجبتني قوي من السفرية اللي كنت فيها الأسبوع اللي فات…

ردت بسرعة وبحدة وقالت:”طيب بس احكي بسرعة علشان محتاجة اذاكر!!”

قلت لها بهدوء:”عارفة يا ملك..الواحد صعب يذاكر وهو متعصب.. محتاج يكون في حالة مختلفة.. انا عايزة احكي لك علشان باحاول اساعدك تهدي علشان تعرفي تذاكري..”

بلعت ريقها كده وقالت لي:”طيب.. احكي..”

حكيت، وهي سمعت وبدأت تهدا.. باعرف من انتظام نفسها ولغة جسمها… 

وبعدين بدأت تذاكر من الورق وأنا لسه باكمل في خصلات شعرها..

وبدأت استدعي طاقة حب.. اني اكون زي الشاحن.. يشحنها حب من خلال لمسي لشعرها..

وبدأت ادعي ربنا.. يبارك في وقتها.. وفي عقلها..

خلصت شعرها وطبطبت عليها وبوستها وقلت لها اني باحبها وان ربنا معاها في امتحان تاني يوم..

بعدها بشوية وقت جات لي المطبخ.. بصت لي نظرة عميقة وحضنتني وقالت لي بصوت دافي :”بحبك”

الموقف ده فكرني بالسفنجة بتاعت المواعين…

عزيزي الأب، عزيزتي الأم.. خلينا الصابون والمياه للسفنجة الناشفة المحجرة..

السفنجة طول ما هي ناشفة لا هتغسل طبق ولا هتنضف كوبايا..

خلينا مع ولادنا المتشنجيين وقت الإمتحانات من الضغط والمذاكرة

خلينا بكلامنا لهم زي المياه اللي بتروي.. اللي بتطري.. 

نقول كلام طيب، دافي.. يستوعب العصبية مش يشعللها.. 

وخلينا زي الصابون بلمستنا.. زي ما الصابونة بترغي السفنجة وبيها تنضف وتفيد…

خلي لمستنا ترغي مشاعر ولادنا.. وبيها يحسوا بالحب وتحول كل واحد فيهم لإنسان افضل.. لنفسه.. ولعيلته.. ولمجتمعه..

مرة قريت عن قانون الكارما.. What you give, you shall receive 

يعني اللي بنديه بيرجع لنا..

لما اديت لملك بنتي حب.. أول حد رجعت له الحب كان أنا.. بحضن دافي وكلمة بحبك من قلبها..بصدق..

يا ترى لو كنت اتعصبت او اتشجنت لما ردت عليا بحدة كان هايرجع لي ايه؟

هل معنى كده ان ولادنا يكلمونا بقلة ادب ونسكت؟

اكيد لأ.. 

فيه فرق بين قلة الأدب او تعدي الحدود وبين إن الإنسان يكون في حالة مع نفسه متعصب..

وقتها بيحتاج حد بيحبه حقيقي يكون معاه زي المياه والصابون مع السفنجة..

عزيزي الأب، عزيزتي الأم، خطابي النهاردة عن “احتواء المشاعر وتغيير الطاقة”

كل حد فينا ممكن يعمل فرق كبير..

لو بس بقى محطة طاقة حب في بيته.. لأهم واغلى ما في الدنيا.. فلذات كبده..

قوم يا مصري مصر دين واجب عليك..

قوم يا مصري.. مصر هاتقوم بحضورك مع قرة عينيك..

قوم يا مصري ولادك كنز مصر..ولادك كنز مصري.. 

احتوي مشاعر ولادك يا مصري…

اديهم طاقة حب.. املاهم حب يا مصري..