الخطاب العشرين: احترام الفروق العمرية

شايفة ذكاء عاليا؟ هي الوحيدة في الفصل اللي ما لونتش بالطو الممرضة.. 

موقف اتحفر في ذاكرتي من القرن اللي فات…

كنت باشتغل مساعدة لمدرسة في حضانة..

والمدرسة وزعت على الأطفال ورق، كان مطلوب منهم يلونوا كل الكلام اللي بيبدأ بحرف ال N

عاليا خلصت أول واحدة.. ولونت كل الكلمات صح، الا كلمة الممرضة… 

ولما المدرسة سألتها ليه ما لونتهوش، رد عاليا كان إن الممرضة البالطو بتاعها ابيض، فما لونتهوش..

يومها لما الولاد اخد فسحة للأكل، المدرسة قالت لي تعالي نبص على تاريخ ميلاد عاليا..

فتحت باب الفصل، كان ملزوق عليه قايمة باسماء الطلاب وتاريخ ميلاهم..

باصينا لاقينا عاليا اكبر واحدة سنًا… ولاقينا الفرق بينها وبين اول حد بعدها ست شهور..

سألت المدرسة “وهي تفرق؟”

تلقائيًا ردت وقالت:”طبعًا! في السن الصغير كل شهر بيفرق..”

يومها الموضوع كان زي لمبة كبيرة نورت معايا..

كنت قبلها عندي فكرة عن نفسي اني مش شاطرة..

لأني في الدراسة ما كنتش من الأوائل.. 

كنت دايمًا في وسط الفصل.. احيانًا اشد واتقدم شوية واحيانًا اتأخر عن النص..

إنما ما كنتش من الأوائل..

لحد ما يومها سمعت كلام المدرسة الخبرة لمدة سنين في التعامل مع الأطفال..

يومها اتألمت لحالي..

اني عشت سنين الدراسة باحاول اسابق علشان اوصل لمستوى ناس اكبر مني بسنة…

ويومها برضه اتعلمت درس مهم جدًا عن احترام الفروق العمرية بين الطلبة..

وبقيت بابص لكل انسان بإنه حالة فردية..

محتاجة حب ودعم وتشجيع وصبر علشان تتقدم..

عزيزي الأب، عزيزتي الأم..

النهاردة خطابي عن:”احترام الفروق العمرية”

ابني حاليًا بيدرس في الفيزياء حاجات متقدمة جدًا..

وهو في سن اصغر كانت صعبة جدًا عليه..

وبنتي حاليًا عندها مهارات متقدمة عن مهاراتها من كام سنة..

ابني وبنتي في اعمار مختلفة..

اللي سهل على ابني حتى في المهارات الحياتية والسلوكية،

مش شرط يكون سهل عليها وهي اصغر منه ب٣ سنين..

عزيزي ولي الأمر..

ابنك كيكة بمقادير مختلفة عن اي كيكة تانية..

محتاجة مدة في الفرن مناسبة ليها هي علشان تستوي..

ومحتاجة فرن حرارته دافية.. لا ساقعة فما يستويش،

ولا سخنة فايتحرق..

كيكة محتاجة فرن دافي.. يساعدها تستوي..

وتطلع كيكة ريحتها ترد روح كل اللي يكون في محيطها..

قوم يا مصري مصر دين واجب عليك..

قوم يا مصري.. مصر هاتقوم بحضورك مع قرة عينيك..

قوم يا مصري ولادك كنز مصر..ولادك كنز مصري.. 

احترم الفروق العمرية بين ولادك يا مصري..

ساعدهم يا مصري بحضنك وصبرك ودعمك..