الخطاب السابع عشر: الدلع والإبتسامة

إيمااااان…!

حاسس بمصيبة جاية لي.. يا لطيف يا لطيف…

ده احساسي كل مرة اسمع اسمي من أمي!

في عيلتنا كلنا لينا اسم دلع..

في بيت اهلي كنت باتنادى بإسم الدلع..

استخدام اسمي معناه ان فيه مشكلة.. 

فيه تأنيب أو لوم أو عقاب..

وارتبط عندي اسمي بالعقاب..

واسم الدلع بالدنيا الربيع..

في بيت اهلي كمان كان لينا كناية..

يعني اوبيا كان مسميني الوزة

علشان كنت باحب اعوم كتير..

وبالتالي اما اشوف الوز افتكر السباحة وذكريات ليا من الطفولة.. وأنا باعوم..

حاجات بسيطة جدًا اهلي عملوها… إنما فرقت..

انك في البيت تكون ببتنادى بإسم دلع… 

لما كبرت واتجوزت مرة لاقيت امي بتقول لي إيمان.. من غير ما اكون عملت مصيبة :)

سألتها ليه بتقول لي إيمان؟

قالت لي عادي..

طلبت منها تفضل تناديني بإسم الدلع…

ومن كام سنة بنتي بدأت تشتغل معايا في برنامج باقدمه للمراهقين..

كان فيه اكتر من حد في الفريق اسمه ملك.. فاول يوم اختارت اسم ميكا.. الناس تناديها بيه..

لما رجعنا البيت ناديت عليها بميكا..

قالت لا.. ميكا ده اسمي مع فريق الشغل..

أنا هنا في البيت، ناديني بإسم الدلع اللي انتي بتناديني بيه..

فكرتني بيا مع أمي..

وفكرت قد ايه ممكن تفصيله صغيرة انما بتفرق..

من جيل لجيل..

يا ترى بندلع ولادنا؟

لو الكلمة الطيبة صدقة والإبتسامة صدقة وخيركم خيركم لأهله..

احنا فين من ده؟

عزيزي الأب عزيزتي الأم..

بتنادي على ولادك بإيه؟

يا جحش ويا حمار ويا رخم؟

وبتعتبر ده هزار؟

بتنادي عليه كل قد ايه؟

كل يوم؟

ولو كل يوم بدل ما تنادي عليه بإسمه أو بلفظ فيه تعدي،

استبدلت ده بإنك تنادي عليه بإسم محبب لقلبه..

وحبشت ده بإبتسامة..

يا ترى هيحصل ايه في علاقتكم؟

ويا ترى هيحصل ايه في علاقته بنفسه؟

قوم يا مصري مصر دين واجب عليك..

قوم يا مصري.. مصر هاتقوم بتربيتك لقرة عينيك..

قوم يا مصري ولادك كنز مصر..ولادك كنز مصري.. 

املأ ولادك حب يا مصري بلفتات بسيطة..

ووطد علاقتك بيهم يا مصري…علشان نفسيتهم يا مصري..