الخطاب التاسع عشر: تهيئة المناخ الخارجي

أنا لزقت حاجات على الحيطة.. بس ما تقلقيش جربت الأول ولاقيت اللزق مش بيسيب علامة…

بنتي وهي في اخر سنة في المدرسة.. والحطة اللي لسه متبيضة من كام يوم!!

رجعت يوم من بره لاقيتها ملزقة على الحيطة اللي فوق المكتب ورق..

ورق كنت بابعته معاها في ال Lunch box 

كنت باكتب لها فيها رسايل تشجيعية علشان لما تفتح تاكل تقرأ وتتحمس وتتفائل وتثابر..

علشان تفتكر هي ببتعلم ليه ويزيد حماسها واصرارها..

لما اخدت اجازة قبل الإمتحانات فكرت ازاي تحمس نفسها..

قامت جابت الملف اللي مجمعة فيه الورق واختارت اكتر مقولات اثرت فيها وحمستها والهمتها..

ولزقتهم على الحيطة فوق المكتب…

شفت الحيطة وانتابني احساسين عكس بعض..

كنت سعيدة ان الورق فرق معاها وانها اختارته مش اي موقلات تانية علشان تحمسها..

وكنت متعفرطة بسبب اللزق اللي مع التراب المصري الوفير هيسيب علامة!

اختارت ابين الشعور الإيجابي.. وقلت لها اني فخورة بيها…

وبعدها بكام يوم قلت لها اننا ممكن كنا نركب لوحة فوم نعلق عليها الورق..

من كام يوم كنت في الأوضة وشفت الحيطة… وشفت العلامات اللي سابها الورق بعد ما بنتي خلصت امتحانات وشالته.. وفكرت في مكتبي ومكتبها…

ولاقيت اني في مكتبي معلقة مقولات تلهمني.. واهدافي ادام عيني متعلقة برضه… 

لاقيت اني مهتمة بالمناخ بتاعي الخارجي.. اني لما اشتغل في مكتبي يكون مكان شغلي مبهج ومحمس وايجابي..

ولاقيت ان مكتبها مافيهوش حاليًا حاجة محمسة…

وفكرت اني احط هدف اني اشجعها كأم بإني اجمل المكان اللي هي بتذاكر فيه.. 

واني اعلق لوحة وكلام ملهم محفز لها…

خصوصًا في زمن التعلم اونلاين واللي فيه هي مفتقدة التعلم وسط اصحابها والخروج والتغيير..

واللي فيه بقيت بتقضي وقت اطول بكتير على نفس المكتب.. علشان تتعلم وعلشان تذاكر وعلشان تمتحن…

عزيزي الأب، عزيزتي الأم..

النهاردة خطابي عن “تهيئة المناخ الخارجي”

إننا نساعد ولادنا بإننا نهيأ لهم مناخ مناسب، مناخ ايجابي يتعلموا فيه…

بالمتاح.. مش محتاجين نشتري مكاتب جديدة ولا حاجات مكلفة..

ورقة مكتوب عليها أنا مؤمن بيك..

أو صورة مع بعض لذكرى حلوة..

أو كوبايا اقلام بلونه المفضل..

تتقدم لهم بحب ومعاها كلمة طيبة..

مضمونها انها فترة غير عادية وانا حاسس بيك..

ومعاك وفي ضهرك..

وياللا نعمل منها فترة غير عادية إننا نجمل المكان اللي احنا فيه…

علشان نتحمس ونثابر ونكمل..

علشان اكيد الفترة دي هتخلص يومًا ما..

وتبقى ذكرى.. فياللا نخليها ذكرى حلوة..

عزيزي ولي الأمر..

لو قريت كلامي من فضلك ما تقفش عند القراية..

اتنقل للفعل… ولو حاجة بسيطة في المكان اللي ابنك بيذاكر فيه..

تفكره بحبك له واحساسك بيه.. 

وتفكره انه انسان.. وانه متعلم.. 

وانه بإيده يخلي الواقع بتاعه احلى..

قوم يا مصري مصر دين واجب عليك..

قوم يا مصري.. مصر هاتقوم بحضورك مع قرة عينيك..

قوم يا مصري ولادك كنز مصر..ولادك كنز مصري.. 

لفتة حلوة يا مصري منك لولادك..

ساعدهم يا مصري مكان تعلمهم يساعدهم فعلًا يتعلموا