الحاجتين المحوريين في التعبير عن الحب..

اعزل ولا لأ.. دلوقتي ولا كمان كام سنة..؟

قرار اخد مني وقت عشان اسمح لنفسي اصلًا افكر فيه..وادرسه..

في يوم كنت قاعدة في البلكونة في بيتي القديم وقلت لجوزي بحسم "انا مش عايزة اكمل في البيت ده لما اعَجِز.. أنا عايزة اعزل.. امتى مش متأكدة.. إنما عايزة اعزل ده أنا متأكدة منه.. عايزة اعيش في بيت اصغر ويكون بجنينة.."

اتكلمنا في التوقيت.. امتى نعزل.. ولما لاقيت ملك بنتي هتكون في اليابان لمدة ترم دراسي، اقترحت على جوزي نجرب نعيش في بيت بجنينة.. لفترة…ونقيم التجربة ونشوف النتيجة.. وبدأت اعيش بين البيتين.. نص الأسبوع في بيت على النيل ونص الأسبوع في بيت بجنينة.. نص الأسبوع في بيت شركتي في نفس العمارة.. ونص الأسبوع في بيت بعيد عن شغلي بمسافة طويلة.. 

فضلت كده بين البيتين.. بين استمتاع بالتمشية في الكمبوند الصبح وقاعدة في الجنينة وقت المغرب.. وبين البيت اللي عشت فيه عشرين سنة وفيه ناس بتساعدني وبواب بيجيب طلباتي وشغلي دقيقتين من سكني.. وفضلت محتارة..ومع الحيرة ارهقت.. تعبت من العيشة بين بيتين.. وفكرت اني محتاجة اخد قرار نهائي اعيش فين..

قعدت في يوم في الجنينة في البيت الجديد.. وكراستي في ايدي وبدأت اكتب.. ولاقتني بكتب الحاجات اللي عايزة اجيبها من البيت القديم لما اروح… ولاقيت من ضمن الحاجات طوبة على شكل قلب بحب احطها على مكتبي.. اول ما كتبت اني اجيب الطوبة دي للبيت الجديد لاقتني ببتسم، وفهمت اني خلاص، عايزة اعيش في البيت الجديد مع كل الصعوبات اللي فيه.. 

طوبة منها عرفت انا فعلًا عايزة ايه.. 

ايه حكاية الطوبة..؟

من اكتر من خمس سنين كنت في اجازة الصيف مع عيلتي على البحر.. ملك بنتي كانت بتتكلم معايا.. وبدأت تمسك طوب من على الرملة.. وشوية وفي وسط ما احنا بنتكلم لاقيتها بتقول لي بصي عملت لك قلب.. بصيت لاقيتها نحتت الطوبة وعملت منها قلب.. لحظة وطوبة لمستني جدًا.. لحظة في علاقة.. حسيت بحب لذيذ.. وجسمي قشعر.. ازاي فنانة كده يا ملك.. هي مسكت الطوبة وفي دقايق خلتها حتة فنية وعبرت بيها عن حبها ليا.. رجعت يومها والطوبة معايا.. وكأنها كنز.. ورجعت بيها القاهرة ومن يومها وهي على مكتبي..

ولما بدأت أعيش بين بيتين سبتها في البيت القديم.. واليوم اللي لاقتني عايزة اجيبها معايا بيتي الجديد فهمت انها علامة ان ده بقى بيتي.. 

طوبة ولحظة ممكن تبان تافهة.. انما بالنسبة لي لها قيمة كبيرة جدًا.. لما ملك رجعت من اليابان وجات البيت الجديد قلت لها تبص على مكتبي وتفكر ايه اغلى حاجة عندي عليه… بصت وسألتني كذا؟ قلت لها لأ.. بصي كويس.. بصت وقالت لي القلب؟ قلت لها القلب.. الطوبة..

شئ غالي عندي جدًا ومن أثمن ما املك.. لأنه ذكرى للحظة وصلني فيها حب بشكل مبدع وعفوي من واحدة من احب الناس على قلبي..

يا ترى بتعبر عن حبك لأغلى الناس عندك ازاي؟ 

مش بالكم على فكرة.. بالكيف.. 

مش بالسعر، بالطاقة.. طاقة الحب..

اوعى تكون مش بتعبر.. 

الحب فعل وكلام.. قول لحبايبك انك بتحبهم وخلي تصرفاتك تؤكد لهم انك بتحبهم.. واخلي تصرفاتك تكون بتشع طاقة حب..

#علاقات_في_لحظات

#مشاعر

#ذكريات

#الخير_موجود

#اروي_غيرك

#تفاءلوا