الحاجة اللي لو مش عندك مستحيل تنجح في اي حاجة في حياتك
مفيش غداء الا بعد ما تغيري لبس المدرسة. ومفيش تلفزيون الا لما تخلصي كل الواجبات المدرسية، وساعتها تتفرجي علي مسلسل، مسلسل واحد بس. ومفيش اتاري ولا لعبة Pacman غير في الاجازات الصيفية. ومفيش مشي حافية والا هتتعقبي، وممنوع تقومي من على السفرة من غير ما تخلصي طبقك…الخ الخ الخ..
كبرت وأنا مخنوقة. ليه كل يوم أمي بتكرر الكلام ده؟ ليه كل القيود والاشتراطات دي؟ ليه كل يوم؟ مفيش اجازة؟!
واللي زود الطين بلة إني كنت في مدرسة فرنساوي، يعني كبرت وسط راهبات. وقائمة الممنوع والاوامر كانت كبيرة جدًا. ممنوع لون شراب غير الأبيض. ممنوع توكة شعر غير سودا.. الخ الخ الخ..
فضلت في دايرة التهذيب والإصلاح لحد ما اتجوزت. وقبل ما اخلف ابني بدأت اقرأ عن التربية علشان كنت باتمنى اربيه كويس. لاقيت كتب التربية بتؤكد على أهمية خلق روتين للطفل، وتنظيم أكله ونومه ومواعيد الدش. ولاقتني باعمل شبه أمي. مفيش لعب غير بعد الدش ومفيش حلويات غير بعد الأكل.. و ايه كمان؟ فيه كل يوم واجبات في الاجازة الصيفية، قبل اللعب والبحر واي ترفيه. اجازة الجمعة بس، وكل يوم في الاجازة فيه شغل، مدة قصيرة، إنما كل يوم الا الجمعة.
من كام اسبوع كنت باسمع كتاب سمعي لجيم رون عن الانضباط Self-discipline، ولاقتني بافتكر كل الذكريات اللي في السطور اللي فوق دي. ذكرياتي مع أمي. وذكرياتي مع اولادي. كام مرة فضلت افكر بنتي انها ترجع بالكتب من المدرسة كل يوم. وكام مرة فكرتها تغسل اسنانها اول ما تصحى. كام مرة؟ ١٠٠؟ ١٠٠٠؟ مليون؟ ما تعدش يا جيمي. المهم إني ما استسلمتش لحد ما اتحول المطلوب الى روتين وعادة ولادي بيعملوها وهما صغيرين. ووانا في مرحلة تربية أولادي نور معايا لمبتين. اللمبة الأولى إن أمي صعبت عليا وحسيت تجاها بالتقدير والإمتنان، إني مهما نسيت او تناسيت او كسلت كانت بتصر. عمرها ما استسلمت وفضلت مثابرة انها تغرس فيا الإنضباط من وأنا صغيرة.
اللمبة التانية كانت إني لما كبرت واتجوزت وخلفت، وبقى عندي حرية الاختيار في اني اعيش بشكل عشوائي او اربي ولادي بطريقة بوهيمية، انما اخترت برضه اني اعيش منضبطة. داخليًا، مش بضغط او قهر من حد.
قيادة الذات وال Self-discipline
ستيفن كوفي، مؤلف كتاب العادات السبعة للأشخاص الأكثر فاعلية، شرح أهمية إن الإنسان يكون منضبط Disciplined، وإنه يتصرف وفقًا للمبادئ بتاعته، مش وفقًا لمزاجه. جملة في وسط كتاب من مئات الصفحات، كتاب دسم جدًا. إنما جملة محورية بتصف واحد من اهم واعظم المواقف/Attitudes الأساسية المطلوبة عند الإنسان اللي عايز يقود ذاته، إنه يكون عنده Self-discipline. إنه يعرف يهذب نفسه ويخليها تعمل الصح، حتى لو تعبان، حتى لو مجهد، حتى لو صعب، حتى لو اغلب الناس مش بتعمله، حتى لو الناس بتنتقده، حتى لو الناس بتستعجب.
الألم وال Self-discipline
من كام سنة عانيت من الم شديد جدًا في القولون. روحت اكشف، الدكتور كتب لي روشتة وش وضهر وطلب مني التزم بالعلاج لمدة شهر. تاني يوم امي سألتني لو بدأت ادوية وكان ردي لا.. طلبت مني اجيب الأدوية على طول وأبدآ في العلاج. اليوم اللي بعدها اتكرر نفس السؤال وبنفس الإجابة. يومها قلت لأمي إني قررت ما اخدش العلاج لأن الأدوية كتير جدًا وكل دواء له أثار جانبية وبالتالي أنا هعالج حاجة واتعب من حاجة تانية. سألتني هعمل ايه؟ قلت لها هاكل صحي. كانت فكرتي وقتها إني اقعد اسبوعين بأكل أكل طازة بس. خضار وفاكهة وسلاطة. أكل طازة مش مطبوخ. بس. أمتنع عن اي حاجة تانية علشان ارتاح من الآلم.
مر الأسبوعين وأنا ملتزمة بقراري. وبعد الأسبوعين لاقتني احسن جدًا. قررت اكمل. ومر علي الأسبوعين شهرين، وتحولوا في الأخر لست شهور متتاليين من الامتناع عن اي أكل الا الآكل الطازج، حتى الشاي واللبن والقهوة وقفتهم. حتى الشيكولاتة؟ حتى الشيكولاتة، تخيل؟!
خلال الشهور الستة مديرتي في الشغل وقتها سافرت بره مصر، ورجعت بعلب شيكولاتة، عزمت علينا في المكتب، وانا اعتذرت علشان بأكل طازة بس. رجعت تاني بعدها بكام اسبوع تعزم علينا واعتذرت. يومها قالت:“إيمان أنت فعلًا عندك
Self-discipline عالي جدًا.“
التربية وال Self-discipline
من شب علي شئ شاب عليه. مقولة كانت بتتقال لينا زمان. أنا مختلفة معاها. فعلًا بيكون اسهل لما الإنسان يتربى علي حاجة إنه يلتزم بيها. إنما الإنسان عنده قدرة إنه يتغير لو عايز.
يعني الإنسان اللي زي حالاتي، اتربى في بيت الأم فيه في حالة تفاني انها تربي ولادها يطلعوا ملتزمين ومنضبطين. وهي نفسها بتصرفاتها قدوة قدامهم في ال Self-discipline، ونشأ في مدرسة بتربي الطالبات على الإنضباط، بيكون اسهل عليه إنه يكون منضبط. طيب و الإنسان اللي ما كانش عنده الظروف دي؟
عضلة ال Self-discipline
الإنسان اللي ما كانش عنده الظروف دي محتاج يتعلم عن الإنضباط. ويعرف إنها زي العضلة اللي بتكبر بالممارسة. وانه يفكر نفسه ان مفيش نجاح فعلًا ممكن يعمله في اي مجال من مجالات الحياة الا والانضباط ركن ركين فيه. النجاح في تربية الأبناء محتاج انضباط، النجاح في الشغل محتاج انضباط. النجاح في العلاقات، النجاح في الحياة الصحية، تأسيس مشروع. وبالتالي محتاج Mindset إن الإنضباط والنجاح وجهين لعملة واحدة، محتاج ممارسة ولو انه يهذب نفسه انه يوضب سريره الصبح او يأكل تفاحة في اليوم او يمشي عشر دقايق يوميًا. يبدأ بحاجات بسيطة خالص. انضباط يؤدي الى عادات وروتين ويتحول الى موقف/Attitude يأثر معاه في جوانب الحياة المختلفة.
انت عايز ايه؟
أحد المقولات اللي بحبها جدًا بتقول:
".Discipline is just choosing between what you want now and what you want most"
يعني الانضباط ما هو الا الاختيار بين ما تريده الآن وما تريده أكثر/فعلًا/من اعماقك.
أنا باتمنى اعيش الحياة بصحة ونشاط وفاعلية، زي ستيفن كوفي ما كان لأخر ايامه قبل وفاته، بيعلم، بيلهم، بيستمتع بعيلته واحفاده. الأمنية دي بتحتاج مني كإنسان كم كبير من ال Self-discipline، إني احترم مواعيد النوم والعب رياضة واجاهد نفسي في الأكل الصحي، اني اتحرك يوميًا واعمل جلسات تأمل واعمل الكشوفات الدورية في ميعادها، اني اخد الفيتامينات. كل الروتين والطقوس والعادات اللي تبنيتها المشترك فيها حاجة محورية اسمها ال Self-discipline. موقف/Attitude امي بمنتهى الإخلاص Disciplined نفسها انها تغرسه فيا. ولما كبرت، اخترت افضل امارس الموقف ده وانمي عضلة ال Self-discipline لأن زي ما المقولة بتقول :
".Without Self-Discipline, success is impossible. Period”
يعني بدون انضباط داخلي، النجاح مستحيل. خلص الكلام.
كتاب جيم رون اللي كنت باسمعه بعنوان The Power of Ambition، خصص فيه فصل كامل عن موضوع الSelf-discipline، الفصل الخامس. والكتاب موجود علي امازون.
* طيب ازاي نتبنى موقف التوازن وموقف الانضباط في نفس الوقت؟ ده موضوع فيديو ملهم جدًا لليزا نيكولز في اللينك ده
* طيب ولو لاقيت نفسك زهقان، حاسس بالملل، عايز تستسلم، اتفرج على الفيديو ده، يشجعك تكمل وتفضل Self-disciplined
#الموقف_الخامس_الانضباط
#كتابة
#قراءة
#تعليم
#تطبيق
#مجتمع
#كن_إنسانًا
#سيب_اثر
بعاداتي باصمم حياتي
سلسلة بعاداتي باصمم حياتي - ١٧ حلقة هدية للتعرف على كيفية تبني العادات والإلتزام بها
