اسرع طريق يساعدك تزود ثقتك في نفسك وثقة الناس فيك
في ٢٠١٩ بدأت نظام غذائي مع متخصصة تغذية. في البداية قابلتني وسألتني عن هدفي في اول جلسة. شرحت لها ازاي باتمنى اعيش حياة صحية وازاي عايزة اعرف ايه الأكلات اللي ممكن تكون بتسبب لي اعراض عارضة وايه الأكل او المكونات اللي ممكن تسبب لي اعراض/أمراض مزمنة علي المدى الطويل. كلام يبان صعب، كان بالنسبة لي الأول صعب زي الهيروغليفي كده، لحد ما فهمت تأثير الأكل اللي بناكله علينا وعلى صحتنا، مش بس في المدى القريب لا في المدى البعيد ومش بس علي المستوى بتاع وزني كام كيلو، لا على المستوي العميق بتاع صحتي اخبارها ايه. باتكلم على امراض زي الزهايمر او الامراض المناعية او أمراض الأعصاب او السكر غير الوراثي وغيرها من اللي بتصيب الإنسان بسبب التأثير التراكمي للأكل غير الصديق اللي بياكله وهو شايفه، من حبه لطعمه، انه حبيب وروح الروح مش بس صديق.
مع الخبيرة بدأت نظام معين كانت تقريبًا كل حاجة فيه ممنوعة الا القليل جدًا لمدة، وبعد كده نبدأ ندخل اصناف واحدة واحدة ونختبر تأثيرها عليا. فضلت تقريبًا شهرين بدون قهوة، بدون قرش الكابوتشينو. لما خلاص.. كنت بدأت اعد الأيام اللي هروح فيها بينوس واقعد قعدتي المفضلة مع الكابوتشينو وكتاب ممتع.
المهم الأيام عدت والكوتش زفت ليا الخبر السعيد، القهوة دلوقتي تمام. قلت لها يعني تمام الكابوتشينو؟! قالت لي اللبن مش مسموح لسه. قلت لها امال اشرب القهوة ازاي؟! قالت لي سادة أو بلبن لوز او لبن جوز الهند. وكملت وقالت لي ان بينوس عنده لبن اللوز.
وعنها وأخذتني، عزمتني على كابوتشينو بلبن اللوز، الطعم كان مختلف شويتين عن اللي متعودة عليه، انما تمام، يتشرب، واستمتعت بالقعدة الحلوة اللي كنت في انتظارها على احر من الجمر.
مرت الأسابيع وأنا لسه على الحال ده، اللبن البقري ممنوع، ولبن اللوز مسموح. وخلال الفترة دي روحت فرع تاني لبينوس غير اللي باروحه في العادي، طلبت بثقة كابوتشينو بلبن اللوز. وجالي مشروب ”لا يشرب". اتقدم لي لوز بالكابوتشينو مش قهوة بلبن اللوز! ناديت الجرسون وقلت له ان الطعم مش زي الفرع التاني، قال لي:“ماهو الشيف مختلف“.
يا ترى عرفت باتكلم عن اي موقفAttiutde/ المرة دي؟
علشان اي طالب يتعلم كويس محتاج ايه؟ محتاج البيت والمدرسة والطالب يتعاونوا مع بعض. المثلث ده اساسي علشان الطالب يطلع كويس. مهما المدرسة او البيت تعاونوا من غير ما الطالب يتعاون مفيش نتيجة، ونفس الحاجة لو اي حد من التلاتة ما تعاونش. المنظومة محتاجة التلاتة.
نفس الحياة في موضوعنا النهاردة. موضوع ال Consistency. الترجمة الحرفية له هي الاتساق أو الثبات. يعني ايه؟
يعني تروح اي فرع لبينوس تلاقي الكابوتشينو بلبن اللوز نفس الطعم بالضبط مع اختلاف الشيف. تلاقي في مكتبة الديوان نفس روح العاملين اللي هناك ومستوى درايتهم بالكتب، بغض النظر عن الفرع.
الثبات علشان يحصل، زي الطالب علشان يتعلم كويس، محتاج تعاون من موقفين تانيين. زي مثلث التعليم كده. الثبات محتاج مثابرة وانضباط. يعني مثلث من ٣ اضلاع: انضباط، ثبات، مثابرة.
اتكلمت في مقالة قبل كده عن أمي وازاي غرست فيا المثابرة من خلال قصتها معايا وصيام شهر رمضان. في الموقف ده امي كان عنها ثبات. كل مرة باسال على اللعبة بترد نفس الرد. بدون عصبية، بدون غضب، بدون ملل. وكان عندها انضباط، انها تاخدني اول ما رمضان خلص نجيب اللعبة. علشان كده الموقف بقى موقف محوري بالنسبة لي واثر جدًا في شخصيتي وتصرفاتي بعد كده. وممتنة لها جدًا انها غرست فيا المثابرة.
العادات وال Consistency
ايه اللي يخلي بينوس يقدم الكابوتشينو اللي بلبن اللوز بنفس الطعم بالضبط في اي فرع بغض النظر عن اختلاف الشيف؟ حاجة بسيطة اسمها العادة. الشيف في فرع اكس بيضرب اللوز في الخلاط علشان يتحول للبن لمدة عشرين ثانية مثلًا. ومعتاد على كده، بقى يطلع بطعم معين. كل مرة هتروح هتلاقي الطعم هو هو. طيب والشيف التاني؟ مرة بيضرب عشرين ومرة ١٧ ومرة عشرة.. ماعندوش ثبات. ماعندوش عادة بالضبط وبالتالي النتيجة مش واحدة كل مرة.
علشان كده اللي عايز يكون عنده ثبات، عنده Consistency، محتاج يخلق عادات تساعده يكون Consistent.
في البداية بيكون الموضوع صعب، ومحتاج طاقة ذهنية عالية جدًا. وبعد كده بيتحول لعادة، متسجلة في المخ ومترجم عليها وبيعملها بطريقة عفوية تلقائية، بطريقة لاوعية. لأنها تحولت لعادة.
قيادة الذات وال Consistency
تخيل لو في حياتك ماعندكش ثبات، يوم بتروح الشغل في الميعاد، ويوم بتروح متأخر. يوم بتعمل احسن ما عندك، ويوم بتطلع شغل اي كلام. أو تخيلي إنك يوم بتعملي الأكل لولادك مالح جدًا، ويوم عادب جدًا، ويوم مضبوط.. هيحصل ايه؟
هندخل المتاهة.. أول حاجة ثقة الإنسان في نفسه هتتأثر. الناس اللي حواليه مش راضيين، بيشتكوا، ممكن يفقدوا الثقة فيه وهو نفسه هيفقد الثقة في نفسه، ويدخل المتاهة. متاهة أنا مش أنا يا استاذ لمبي. وطبعًا انسى بقى قيادة الذات. قيادة الذات مين مع واحد بيمشي على سطر ويسيب سطر؟!
ال Consistency وبناء الثقة
أول ما استقلت من شغلي قريت كتاب علشان يساعدني يكون عندي شغل خاص. الكتاب كان لأحد الكتاب المفضلين بالنسبة لي. اسم الكاتب مايكل هايت. في الكتاب المؤلف شرح والح علي فكرة ال Consistency علشان الإنسان ينجح في شغله. بأمثلة بسيطة زي مثلًا إن الواحد ينزل بوست كل اسبوع في نفس الميعاد على السوشيال ميديا أو يحافظ على مقالة شهرية بيكتبها. وإنه يعرف الجمهور بتاعه او زملاؤه على المواعيد دي. يعني يقول مثلًا كل يوم اتنين اقدم فيديو لايف في العاشرة صباحًا. ويقدمه. كل اسبوع وبالتالي يحصل ايه مع الناس. يحصل بناء للثقة. لأنه عنده حاجة اسمها Consistency.
ال Consistency والعلاقات
من أهم المحاور اللي نتبني فيها موقف/Attiutde ال Consistency محور العلاقات. تخيل كده جدتك ويوم العيد. كل يوم عيد بتديك عيدية. او اهلك بيجيبوا لبس العيد. أو اخوك الكبير بيجيب لك بالونة. كل عيد. كل عيد. يا ترى هتحس بإيه؟ ايوه.. صح.. هتحس بالأمان. بالإطمئنان. لأنه/لأنها كان/كانت Consistent.
اسهل طريقة إنك تتبنى موقف/Attiutde ال Consistency
إنك تحوله لعادات يومية وروتين منظم. عادات يومية زي: كل يوم باشرب باتمرن عشر دقايق أول ما اصحى. كل يوم بادعي ربنا وانا خارج من بيتي. كل يوم قبل ما أنام باشكر ربنا على نعمه التي لا تعد ولا تحصى. كل يوم باجدد نيتي قبل ما ابدأ شغل. كل يوم باطمن على ولادي بمكالمة تليفون.روتين منظم زي: كل اسبوع باقرأ سورة الكهف يوم الجمعة، كل اسبوع باقابل اخواتي. كل شهر بتصدق او باعمل اطعام. كل عيد باجيب لولادي لبس جديد. كل سنة بحتفل بعيد جوازي مع جوزي بسفرية أو خروجة حلوة. كل“….“ ب“…..“.
ده هيعمل ايه؟
هيزود ثقتي في نفسي، هيزود ثقة الناس فيا، هتحول لإنسان عارف يقود نفسه، حياتي هتبقى منظمة ومخي هيكون مرتاح لأنه عارف بيعمل ايه امتى/كل قد ايه/ازاي وبالتالي عنده عادات وروتين وطاقتي الذهنية مش مهدرة.
* اتفرج على فيديو جميل جدأ وقصير عن ال Consistency لمؤلف كتاب Start With Why في اللينك ده
* كتاب مايكل هايت اللي اتكلمت عليه اسمه Platform - Michael Hyatt وصورة الغلاف هنا
* صفحة خبيرة التغذية اللي لجأت لها في ٢٠١٩ هنا
https://www.facebook.com/theleanfactor
* من اجمل الكتب اللي ساعدتني اتبنى والتزم بالعادات كتاب بعنوان The compound effect
Darren Hardy صورة الغلاف هنا
#الموقف_السادس_الثبات
#كتابة
#قراءة
#تعليم
#تطبيق
#مجتمع
#كن_إنسانًا
#سيب_اثر
بعاداتي باصمم حياتي
سلسلة بعاداتي باصمم حياتي - ١٧ حلقة هدية للتعرف على كيفية تبني العادات والإلتزام بها
