أهم ٦ مواقف نتصرف فيهم بحكمة
من سنين كنت بحضر مجلس علم في رمضان. ويومها كان الموضوع هو طلب السماح من الناس اللي ظلمناهم.
رجعت يومها وأنا عمالة افكر مين ممكن اكون ظلمته ومحتاجة اتواصل معاه. من أول الناس اللي اتكلمت معاها امي وطلبت منها تعفو عني في اي حاجة زعلتها او ضايقتها فيها. وانها تسامحني وتعفو عني. وبعدها عملت نفس الحاجة مع ولادي وزوجي. وبدأت افكر مين تاني؟ ومع شريط الماضي افتكرت مشهد ليا مع واحدة من الطلاب اللي درست لهم. وموقف لنا مع بعض وازاي هي زعلت مني بعده جدًا. وانا كنت شايفة اني عندي حق في تصرفي معاها. وهي كانت عايزاني اتكلم معاها قبل التصرف ده. فكرت انها زعلت واني عايزاها تسامحني. وبعت ادور عليها فين لاقيتها بتدرس بره مصر. بعت لها اعتذار وطلب سماح وردها كان انها سامحتني.
الموقف ده بفكرة طلب العفو والسماح اتعلمت منه درس مهم جدًا. درس بعنوان القانون وروح القانون. بعنوان الفرق بين العدل والحكمة. اتعلمت ان مش كفاية اتصرف بعدل. مهم اني افكر بحكمة قبل ما اتصرف بعدل.
موقف/Attitude الحكمة وقيادة الذات
من الحاجات اللي بتشدني جدًا في اي مكان كبار السن، الناس اللي فوق الستين. بحب اتفرج عليهم، اتعلم منهم، اسمع احاديثهم. احد الحاجات اللي بدور عليها من خلال تعاملي معاهم ومتابعتي لهم هي الحكمة. الأطفال مثلًا بيفتقروا الحكمة اللي بتتكون من خلال تجارب الحياة والخبرات اللي الإنسان بيمر بيها. هل معنى كده إن كل حد كبير في السن حكيم؟ لأ طبعًا. لأن مش كل الناس الكبيرة في السن تعرضت لخبرات تُثقلها في الحياة. ممكن تكون ناس عاشت حياة روتينية نمطية وبالتالي عاشت نفس السنة سبعين مرة ومش حكيمة. وممكن تكون ناس مرت بالفعل بمواقف بس ما كانتش بتقف وتفكر وتتعلم منها وبالتالي الخبرات والتجارب راحت هباءًا منثورا. وده اللي بحب اتابعه مع كبار السن. واحد كبير جسمه ممشوق بيلعب رياضة في النادي الصبح بدري، كل مرة اروح الاقيه، ماسك عصاية وبيلف التراك. وواحد كبير في السن اصغر من الأول، سمين جدًا وقاعد ياكل بنهم. واحد قاعد لوحده وبيتعامل مع الجرسون بحدة. وواحد معاه اصدقاؤه وبيضحكوا وبيفطروا مع بعض.
من تأمل الكبار بتعلم، بتمنى اكون اكثر حكمة في اختياراتي في الحياة. في تعاملاتي مع الناس. في ترتيب اولوياتي.
ليه؟ لأن الإنسان اللي بيسعى يقود حياته محتاج يكون حكيم. يتعلم من تجارب اللي حواليه. مقولة قريتها واتعلمت منها ده كانت بتقول:
“A stupid person never learn from his mistake. A smart person always learn from his mistakes. A wise person learns from the mistakes of others.”
وبالتالي بدل ما يحتاج الإنسان يقع في كل أنواع المشاكل ويطلع منها ويتعافى منها، ممكن يجرب يتعلم من اللي حواليه اللي اكبر منه سنًا ويكتسب خبرة. وبالتالي يقدر يقود ذاته من نقطة الف لنقطة باء بخبرة ووعي لأن عنده حكمة.
طيب هي ايه أنواع الحكمة؟
في سعيي للتعلم عن الحكمة قريت مرة تعريف جميل لها بيقول:
”الحكمة هي ماذا يقال ولمن يقال ومتى يقال وأين يقال وكيف يقال.“
استوقفني التعريف… وفكرت في أمي، اللي كانت لما تحب تعاقبني على حاجة وأنا طفلة كانت تاخدني في اوضة لوحدنا وتتكلم معايا. كانت بتتصرف بحكمة في الجزئية دي.
هل دي بس الحكمة؟
لاقيت تعريف تاني كان بيقول انها الحكمة في القول والفعل. يعني ماذا نفعل ومتى نفعله واين نفعله ومع من نفعله وكيف نفعله.
ومن الاتنين، الحكمة في القول والفعل لمبة نورت عندي. إن الحكمة تأثيرها ممتد على اللي حوالينا. يعني لما بنتصرف او بنتكلم ده بيأثر في غيرنا. التعريف فيه ”مع من؟“ وبالتالي مجرد إن الإنسان يتصرف او يتكلم بحكمة هيكون مؤثر في غيره. غيره هيتعلم منه ويكتسب خبرة في التعلم. ويتحول هو كمان لإنسان أكثر حكمة - لو اتعلم.
ايه أهم ٦ مواقف نتصرف فيهم بحكمة؟
١- مع نفسنا يوميًا في اختياراتنا وترتيب أولويات اليوم. مقولة قريتها لروبين شارما كانت بتقول
"Your days are your life in miniature. As you live your hours, so you create your years.”
يعني ايامنا هي صورة مصغرة من حياتنا، بالطريقة اللي بنعيش بيها ساعات يومنا بنشكل سنين عمرنا.
وبالتالي أول واهم جانب نتصرف فيه بحكمة هو وقتنا، ايامنا، اولوياتنا واختيارنا اللي بتشكل حياتنا.
٢- مع احب الناس لنا
ماذا نقول/نفعل.. امتى وفين وقدام مين؟ اهلنا، اخواتنا، ولادنا، ازواجنا، اصدقائنا…
بنتصرف ازاي؟ بنقول ايه؟ بنهز ثقتهم بنفسهم؟ بنسخر منهم ونقول كنا بنهزر، بننتقد قدام الناس ونحرجهم؟
٣- من الناس اللي بتتعدى الحدود اللي رسمناها
نعتذر بحكمة، بشياكة، نوضح الحدود ايه بدون رد فعل عنيف أو غضب او احراج لهم أو ضعف من جانبنا
٤- موقف الرخاء المادي أو السعة من الرزق
لا نصرف باسراف ولا نبخل ونقطر… نختار فعلًا بحكمة نصرف ايه، فين، مع مين، وامتى..
٥- مع وقت التعرض للايذاء او الظلم
وده من اصعب الاختبارات.. بدل ما نتحول من مظلوم لظالم، نتصرف بحكمة. مش بس بعدل. بحكمة.
٦- وقت لما نخطئ (احنا او ولادنا)
نقف ونطلع بره الصورة ونراجع التجربة ونطلع منها بدروس مستفادة ونتصرف بحكمة مش بقسوة ولا عنف.
لو عايز تقود نفسك راجع موقفك من الحكمة، يا ترى بتتصرف وبتتكلم بحكمة ولا..
ولو فعلًا نفسك تبقى اكثر حكمة راقب الناس الأكبر سنًا منك واتعلم منهم وقبل كل شئ ادعي ربنا يرزقك الحكمة وافتكر قوله سبحانه وتعالى في كتابه الكريم في سورة البقرة:
" يُؤْتِي الْحِكْمَةَ مَنْ يَشَاءُ وَمَنْ يُؤْتَ الْحِكْمَةَ فَقَدْ أُوتِيَ خَيْرًا كَثِيرًا وَمَا يَذَّكَّرُ إِلَّا أُولُو الْأَلْبَابِ ”
أحد الفيديوهات المفيدة جدًا في موضوع الحكمة لجيم رون موجودة في اللينك ده
أحد الكتب العميقة اللي قريتها من سنين وفرقت معايا في موقف الحكمة كانت بعنوان
Meditations by Marcus Aurelius
#الموقف_الرابع ـوـالعشرين_الحكمة
#كتابة
#قراءة
#تعليم
#تطبيق
#مجتمع
#كن_إنسانًا
#سيب_اثر
بعاداتي باصمم حياتي
سلسلة بعاداتي باصمم حياتي - ١٧ حلقة هدية للتعرف على كيفية تبني العادات والإلتزام بها
