يا تري بتقدر تطبق حرف التاء فى حياتك؟

الف به ته.. 

حروف في الأبجدية.. كل حرف بتبدأ بيه كلمات.. ومع تغيير ترتيب الحروف تتغير الكلمات وتتغير المعاني..

كل مرة بنتكلم عن حرف.. وكلمة بتبدأ بالحرف ده..

اتكلمنا عن الف إنسان.. وباء بقاء..بقاء في سعي..

المرة دي مع حرف التاء هنتكلم عن التعلم..

تاء تعلم.. تعلم مش دراسة ولا مذاكرة 

ولا امتحانات.. ولا شهادات..

تعلم علشان النمو والتطور.

تعلم بيه يكون الإنسان حاجة اسمها Life Long Learner 

يعني متعلم مدى حياته..

تعلم مش بالنمط اللي كتير منا اتربى عليه..

في مدرسة وفصول و بمواد درجات اعمال سنة..

تعلم من مصادر تانية بالإضافة للمدرسة والكلية والجامعة..

كتير منا الناس بيتخرج من الجامعة وبيبطل يتعلم.. 

وعقله بيربط التعلم بالدرجات والإمتحانات ويقفل من التعلم تمامًا..

وناس اقل بتقرر تتعلم بس في مجالها، في مجال تخصصها علشان الترقية او الوظيفة..

وناس اقل كمان بتتعلم في مجال جنب مجالها علشان توسع نطاق شغلها او تغير نوعه..

وناس اقل بقى بتتعلم..

فعلًا بتتعلم من كل حاجة حواليها..

بتتعلم من كون الله المنظور.. من السما والشجر..

بتتعلم من الغراب وازاي دفن غراب..

وبتتعلم من النمل ازاي بيساعد بعضه.. 

بتتعلم من العصافير بركة البكور..

وبتتعلم من الأرض بركة العجز..

بتتعلم من كبار السن اعراض الهرم..

وبتتعلم من الأطفال التلقائية والعفوية..

بتتعلم من النهر الهدوء والصفاء..

وبتتعلم من الدراما الراقية دروس ومواعظ..

ناس عقلها مفتوح للتعلم..

زي الرادار اللي بيسجل طول الوقت.. 

ناس حاضرة.. مركزة.. عايشة وهي فعلًا عايشة..

مش قافلة دماغها ان التعلم جوا جدران فصل ومحتاج منهج وكتاب..

ناس مع الوقت وبسبب عقلها اللي بيتعلم من كل حاجة حواليها بتوصل لحاجة اسمها حكمة..

مقولة قريتها مرة كانت بتقول الغبي هو اللي يقع في نفس الخطأ مرتين.. لانه ماتعلمش..

والذكي اللي وقع في الغلط مرة وما كررهوش لأنه ذكي.. اتعلم من غلطه..

أما الحكيم فهو اللي بيتعلم من خطأ غيره.. مش محتاج يقعد فيه بنفسه.. 

يا ترى احنا اغبياء ولا اذكياء ولا حكماء..

تاء تعلم..

تعلم دائم ومستمر..

تعلم بهدف النمو والتطور الإنساني..

تعلم الإنسان بيتعلم بيه ازاي يعيش انسان افضل.. يسعى سعي افضل.. علشان حال الإنسانية يكون افضل.. 

الف انسان.. باء بقاء بسعي.. تاء.. تعلم وتطور للإرتقاء بالإنسانية..

مش لدرجة ولترقية.. ولا شهادة ولا دبلومة دولية..

خلينا نخلي الشهادات والدبلومات وسائل مش غايات..

للإرتقاء بالدنيا.. وللفوز في الآخرة..

مش للتفاخر ولا التسابق ولا التعالي..

الف انسان.. باء بقاء بسعي.. تاء.. تعلم وتطور للإرتقاء بالإنسانية..

#من_الألف_للياء_٣_تاء

#مقالة_اسبوعية

#حروف

#كلمات

#قراءة

#استماع

#تواصل_فكري

#تفاعل_عاطفي

#رقي_انساني

#سعادة_مصر

#كن_إنسانًا

#إيمان_رفعت