إنتي اشتغلي ايه؟

ونقول بسم الله الرحمن الرحيم..

ونبدأ سلسلة جديدة.. بعنوان من الألف للياء..

وأول حرف بنبدأ بيه حرف الألف..

إنتي اشتغلي ايه؟ اغلبنا اتفرج على ماري منيب وضحك على المقطع ده من المسرحية..

إنت اشتغلي ايه؟ مش مهندس، ولا دكتور ولا أم ولا طالب..

مش مخرجة ولا حارس ولا طباخ ولا مذيعة..

إنتي، إنت وأنا.. كلنا هنا بنشتغل شغلانة واحدة..بتبدأ بحرف واحد.. بحرف الألف..

شغلانة اسمها إنسان.. 

للأسف كتير منا في زحمة الحياة ومع اخطاء متكررة في التربية بينسى الدور ده.. 

وبيتوحد مع دور تاني..

اللي بيتقمص دور الطالب واللي بتمسك في دور الأم.. 

واللي بتعَرَّف نفسها بالدكتورة فلانة.. واللي وشه يحمر ويخضر لو الناس نادته من غير ما تقول له يا هندسة.. او يا بشمهندس..

زمن بقينا فيه بنقَيِّم بعض بالأدوار.. لو أم ومش بتشتغل فقيمتها اقل من رائد الأعمال مدير الشركة..

ونسينا إن كل حد فينا اتخلق إنسان، وهيموت إنسان..

وإن الإنسان ده عليه حاجة واحدة اساسية..

حاجة اسمها "سعي"

وان ليس للإنسان الا ما سعى.. 

وإن السعي ده سوف يُرى 

زي ما ربنا علمنا في سورة النجم في قوله تعالى:

" وَأَنْ لَيْسَ لِلْإِنْسَانِ إِلَّا مَا سَعَىٰ 39 وَأَنَّ سَعْيَهُ سَوْفَ يُرَىٰ 40"

النهارده مع حرف الألف بنتكلم عن الإنسان.. اللي بيسعى..

بيسعى في ايه يا ترى؟

في قطع رحم؟ في خيانة مراته؟

في الإنتقام من ابو العيال بعد الإنفصال المر؟

في نفخ الشفايف وشد الوش؟

في بيع منتجات الناس مش محتاجة لها علشان مكسب مادي؟

في تنزيل صور وفيديوهات على الوسشيال ميديا تستفز الناس؟

في تضييع ساعات على التك توك في تفاهات؟

يا انسان..

اول كلمة نزلت لك في القرآن من الهك الواحد كانت اقرأ..

اقرأ القرآن.. واقرأ علوم تانية تفهم بيها يعني ايه انسان..

اتعلم ازاي تعيش حياتك كإنسان.. من روح وقلب وعقل وجسم..

اول كلمة كانت اقرأ.. بحرف الألف..

وإنسان بحرف الألف..

وإله بحرف الألف…

والقرآن بحرف الألف..

يا إنسان اقرأ القرآن واعبد الإله الواحد الأحد..

اسعى.. خليك انسان بيسعى.. وهو مستحضر ان السعي ده سوف يرى..

وان فيه جزاء بعد كده..

بلاش ننزل نفسنا درجات بإننا نحصر نفسنا في وظايف او مسؤوليات..

بلاش ربنا العظيم يرقي كل حد فينا لدرجة إنسان 

واحنا نهمش الترقية دي ونمسك في دور فاني زائل..

ألف إنسان..

كل يوم كل حد فينا بيصحى، بيصحى كإنسان عليه سعي..

خلينا كل يوم نصحى نجدد نيتنا ونفتكر ان سعينا في اليوم ده متسجل..

واخر اليوم قبل ما ننام نعمل وقفة مع السعي.. لو لاقيناه كان سعي في الخير وسعي للغير نحمد ربنا

ولو لاقيناه غير كده نستغفر ونجدد نيتنا 

وننوي ان في اليوم الجديد هنسعى سعي افضل..

سعي انسان عايز يرتقي بعيلته.. عيلة كبيرة أسمها الإنسانية..

سعي انسان فاهم ومستوعب ان السعي بتاع كل يوم وكل ساعة سوف يرى..

حرف الألف إنسان.. بيسعى.. 

يا ترى بتتمنى تسعى في ايه؟ سعي يُرى في الآخرة..

اتمنى واسعى كإنسان..

وافتكر دايمًا تقول مع بداية كل سعي.. بسم الله.. والله المستعان..

الف إنسان..

#من_الألف_للياء_١_الف

#مقالة_اسبوعية

#حروف

#كلمات

#قراءة

#استماع

#تواصل_فكري

#تفاعل_عاطفي

#رقي_انساني

#سعادة_مصر

#كن_إنسانًا

#إيمان_رفعت