من الألف ل الياء

 

في يوم من سنين طويلة كل حد فينا كان لسه طفل.. مش عارف يقرأ ولا يكتب..

وحد او اكتر من حد، بدأ يعلمنا.. حرف حرف.. مش كلمة كلمة..

يعلمنا نقرأ الألف ويعلمنا نكتبها ازاي.. 

وحرف ورا حرف علمنا الأبجدية

من الألف للياء..

علمنا كلمة بتبدأ بكل حرف.. 

واكتر الأوقات ورانا صورة للكلمة دي..

علمنا إن الف يعني أب او أم.. وان باء يعني بطة…

وبدأنا مع التكرار نحفظ الحروف والكلمات..

ونعرف نقرأها ونكتبها..

منا اللي اتعلم بسرعة.. ومنا اللي اخد وقت طويل علشان يتعلم..

انما كلنا اتعلمنا.. 

كلنا، كلنا اللي بنقرأ السطور دي.. مش كلنا كبشر على كوكب الأرض..

لأن حاليًا في القرن الواحد والعشرين لسه فيه ملايين البشر مش عارفين الحروف.. ولا بيعرفوا يقروا ولا بيعرفوا يكتبوا..

كلنا هنا من القراء.. على قنوات السوشيال ميديا..

ولأن فيه ناس تانية مش من القراء.. سواء بتعرف تقرأ انما مش بتحب تقرأ.. 

او مش بتعرف تقرأ..

فكرت المرة دي سلسلة مقالاتي تكون مكتوبة ومنطوقة..

اللي يحب يقراها يقراها..

واللي يفضل يسمعها يسمعها..

السلسلة بعنوان من الألف للياء..

كل مقالة هتكلم عن حرف.. عن كلمة او اكتر بتبدأ بالحرف ده..

هتكلم عن اللي اتعلمته عنها، او تجربتي الشخصية، او موقف لمسني..

كل مرة هقف مع القراء والمستمعين علي حرف..

من حرف الألف لحرف الياء..

 

واسبوع ورا اسبوع نفكر مع بعض في الكلمات والسطور.. 

والمفاهيم والتجارب.. 

علشان نتفاعل عاطفيًا ونتواصل فكريًا ونرتقي إنسانيًا..

 

 

بعاداتي باصمم حياتي

سلسلة بعاداتي باصمم حياتي - ١٧ حلقة هدية للتعرف على كيفية تبني العادات والإلتزام بها