السر المحوري في ان العلاقة تفضل حلوة

"ايه سر ان الحب يفضل موجود…

إن العلاقة تفضل حلوة؟

هل مثلًا إنكم كل فترة تطلعوا سفرية حلوة مع بعض؟"

سؤال سالهوني شاب عزيز علي جدًا..

في سن فاروق ابني، وخاطب..

هو وخطبيته خلال إفطار رمضاني كنا فيه اتقابلنا،

وسألني السؤال ده قدام عروسته..

السؤال عجبني جدًا..

إنه شاب وفي سعي هو وعروسته يتعلموا من خبرات اللي حواليهم..

وسؤال فيه اهتمام منه انه فعلًا عايز يبني علاقة حلوة..

وسؤال بيتضمن حذره من ان العلاقة تتضعف مع الوقت..

سؤال فيه حكمة ونضج من شاب عايزة يبني علاقة حلوة..

طيب وردي؟

ردي كان بمقولة لأحد الناس الملهمة جدًا بالنسبة لي

وهو ستيفن كوفي، مؤلف كتاب العادات السبعة للأشخاص الأكثر فاعلية.

المقولة بتقول: "In relationships little things are the big things"

يعني في العلاقات، الحاجات الصغيرة هي الحاجات الكبيرة، هي الحاجات المهمة..

مع اصحابي احب فعلًا كل فترة اطلع سفرية حلوة..

نستمتع فيها مع بعض ونشارك اخر اخبارنا..

انما مع زوجي؟ 

ستيفن كوفي وضح انها الحاجات الصغيرة..

زي ايه حاجات صغيرة؟

زي مثلًا فنجان القهوة بتاعه اللي على نار هادية..

أو طريقة تعليق القمصان بتاعته..

او زي نوع الشوكولاته اللي هي بتحبها..

او زي لون الورد المفضل ليها..

تفاصيل يعرفها بس الناس اللي عايشة مع بعض و"قريبين"

ليه الحاجات الصغيرة؟

لأنها بتحسس الطرف التاني

انك قريب منه

انك مهتم بيه

انك مركز معاه

انت بتحبه

انك منتظم في الاهتمام (Consistent)

انك حاطه أولوية 

انك بتفكر فيه 

انك فاهمة

انك مستوعب ان الحاجات الصغيرة مش تافهة طالما مهمة عنده

انك بتحترمه 

في زمن بقينا فيه مستعجلين، 

بقى الراجل في البيت مفتقد التفاصيل الصغيرة دي..

ومش لاقيها (في اغلب الوقت) غير عند مامته..

عملت لك ال…. اللي بتحبها..

جبت لك ال.. اللي بتحبه..

والست؟ 

لو اتربيتي زيي هتلاقي أمك بتقول لك 

شوفي جوزك عايز ايه..

اطلب ايه علشان جوزك..

وهتلاقي إنك انت مش موجودة..

ونلاقي الرجالة بتقارن زوجاتها بأمهاتها..

ونلاقي الستات عايشة في حرمان عاطفي..

ونلاقي بيوت بتتفكك..

واطفال وشباب بيتعقدوا من الجواز..

زي ما عود كبريت ممكن يخلي النار تولع وحرق البيت كله..

ممكن تفاصيل صغيرة تخلق ود بين الطرفين..

تخيل كده..

راجل بيفتح درج الشرابات بيلاقي مراته مركزة انه تحط الشربات بالترتيب اللي بيريحه..

ابتسم ولبس..

نزل راح الشغل ووهو راجع جاب شيكولاتة ولا وردة واحدة لمراته..

من نوع هي بتحبه..

ورجع البيت قدمها..

حاجات محتاجة فلوس كتير؟ 

محتاجة مجهود كبير؟

لا.. محتاجة حاجة اسمها "اهتمام ان العلاقة تبقى حلوة.."

سؤال الشاب اللي سألهوني..

ازاي اخلي العلاقة حلوة..

مش كل يوم هجيب ورد..

انما ممكن كل يوم اركز في التفاصيل..

ممكن كل يوم احط بوسة على راس مراتي وانا نازل واقول لها بحبك..

او ادعي لي.. 

او خدي بالك من نفسك..

واجدد نيتي انها صدقة..

هتاخد اقل من دقيقة، وهتفرق معاها اليوم كله..

وممكن رسالة حلوة في وسط اليوم اقول له شد حيلك..

او شكرًا انك بتشتغل علشان توفر لنا مال حلال..

العلاقة الحلوة سرها في الحاجات البسيطة..اللي نفضل نعملها

بمداومة

لو عايزين العلاقة تدوم.. وتدوم حلوة..

#اتجوز؟_٢٧

#الزواج

#اﻷسرة

#المجتمع

#السنة