٣ اسرار عن السجادة الحمراء

وأنا طفلة ابويا اللي يرحمه كان بياخد اجازة كل سنة في الصيف.. ويسافر بينا، أنا ومامتي واخواتي، بره مصر.. علشان نشوف العالم ونستوعب ان الدنيا مش مصر بس.. وبالتالي الأفق بتاعنا يتسع..

سفرية منهم كنا في اسبانيا. ووالدي قرر يحجز لنا عرض لمصارعة التيران..

يومها كنت في حالة تعجب على استنكار.. ازاي الراجل بيخاطر بحياته كده؟ وازاي اتصاب ولسه مكمل.. ولفت نظري لون الستارة اللي ماسكها المصارع. سألت والدتي ليه لونها احمر؟ ردت علي بتلقائية إن اللون ده بيستفز التور.. وبيخليه ثائر اكتر.. وفهمت يومها ان اللون الأحمر بيحرك مشاعر اللي يشوفه!

اللون الأحمر هو الحاجة اللي عيني وقعت عليها على الVision board بتاعتي.. جنب صورة قناة اليوتيوب كنت حاطة صورة Ted Talk.. كنت عايزة ادي كلمة في مسرح كبير وفي حدث خاص بال Ted Talks

بعد قناة اليوتيوب اللي حكيت لكم عنها المرة اللي فاتت، عيني وقعت على صورة كنت مختاراها، فيها سجادة مدورة حمراء ومكتوب Ted 

فكرت في الصورة وقلت يعني اعمل ايه؟ طبعًا يكون حلو لو قدمت كلمة في حدث كده.. وكمان بعدها نزلت الفيديو بتاعها في صفحتي على الفيس بوك وكمان على قناة اليوتيوب.. بس اعمل ده ازاي؟

وقفت عند النقطة بتاعت اعمل ده ازاي..؟ وكملت يومي عادي.. ما بين مهامي كإنسانة شعرها شاب،  وزوجة  وأم..وما بين مسؤولياتي كموظفة.. ومر ٣ ايام وحصل..حصل اللي ماكنتش اتوقعه!

لاقيت رسالة من رقم غريب من بنت اسمها رضوى..

منظمة TED Talks لجامعة القاهرة.. وبتسألني لو احب اقدم علشان اكون Speaker معاهم بعدها بشهرين! 

ده اسمه ايه؟ حد سامع حاجة؟ حد بيتصنت علينا؟ 

يعني ازاي؟ ازاي ابص على الصورة اللي فيها الدايرة الحمراء.. وافكر اعمل ده ازاي؟ 

واكمل الأيام من غير حتى ما احكي لحد او اتكلم والاقيه بيحصل..؟!

سحر ده؟

طبعًا تحمست ورديت عليها بالمرافقة. وبدأنا ننزل اجتماعات مرتين في الأسبوع.. البنت كانت في سن قريب من سن ولادي وطلابي..

وأنا، بعد ما شعري شاب، قعدت معاها هي وزميلتها علشان يراجعوا معايا هقول ايه، وهتكلم ازاي، وهقف على المسرح ازاي..

ومروا الشهرين.. ولاقتني في ابريل ٢٠١٧ واقفة في مُدَرَج بكلية القصر العيني، بقدم Ted Talk 

ولاقتني بتكلم عن الشباب وازاي هما كنوز منتظرة حد يكتشفها.. 

وبتكلم عن المعاني اللي بنديها لحاجات في حياتنا..

معنى الفشل، معنى النجاح، معنى التفوق..

معنى صغر السن، معنى كبر السن.. معنى الشعر اللي شاب..

وبعد ما اليوم خلص، ناس من الحضور فضلوا يشكروني ويقولوا ان كلمتي كانت احلى كلمة واكثرها تأثيرا في اليوم..

أنا؟ على السجادة الحمرا؟ بعد ما شعري شاب؟ واحسن Ted Talk؟

يومها استوعبت ان الموضوع اكبر من كلمة طِلِعت على مسرح شاركتها في عشرين دقيقة..

يومها استوعبت ان فيه فعلًا قوانين في الحياة غير ملموسة بتحركنا وبتحرك أحداث حياتنا..

قانون وقفني على سجادة حمرا بمجرد اني حطتها في صورة مُجمعة وبصيت عليها وقلت "عايزة" احققها..

قانون بيقول لي انت عليكي الحلم.. وازاي دي مش بتاعتك، طالما بعد الحلم بتسعي فاللي ربنا كلفك بيه وطلبه منك..

سيبي ازاي عليه.. على القادر… كله عليه هين..

ولما فكرت في القوانين دي..وفي القادر سبحانه وتعالى… الي بيسر لنا تحقيق اللي بنتمناه.. فكرت في خطوة كنت خايفة جدًا جدًا اخدها..

بالذات بعد ما شعري شاب.. 

ايه الخطوة؟ احكي لكم المرة الجاية

تابعوني المرة الجاية مع 

#بعد_ما_شاب_٨

#العمر

#التعلم

#النمو

#السعي

#التغيير

#الشجاعة

#الجرأة

#الحماس

#الصحة