١٠ نقط يساعدوك تحدد لو الكتاب يستحق القراءة

"بتقولي ايه يا إيمان؟! بتكلمي الشجر؟ 

ناقص كمان تقولي لي إنه بيرد عليكي!!"

تعليق سمعته من واحدة من دوايري، قالته بسخرية وتعجب لما شاركتها أحد الدروس اللي اتعلمتها من كتاب عظيم عمل نقلة محورية في حياتي..

طبعًا بعد السخرية والتهكم كنت بين نارين، اقول لها "لا طبعًا الشجر مش بيرد.." ولا أقول لها الحقيقة "إنه فعلًا بيرد!"

من سن الخمسة وتلاتين اتعرفت على احد ال Top Role Models  ليا، وهو المؤلف وخبير قيادة الذات العالمي روبين شارما.. بدأت اقرأ كتبه بنهم واسعى اني اطبقها، واتابع فيديوهاته والبودكاست بتاعه.. لحد ما في اواخر التلاتينات وقع في ايدي الكتاب اللي فيه موضوع الشجر ده. الكتاب ده بالذات برشحه وبشدة لكل إنسان في سعي إنه يحسن جودة حياته "كإنسان". الكتاب بعنوان Lessons from the Monk Who Sold His Ferrari وكان من مكتبتي العزيزة، مكتبة الديوان.

الكتاب عرض فيه روبين شارما ١٠١ درس، زي الكابوسلات كده. كل درس في صفحتين تقريبًا، وكل درس فيه لمبة تنور في حياة الإنسان، فكرة يطبقها علشان يبقى احسن، اسلوب حياة يتبناه.

أول ما قرأت الكتاب بدأ عقلي كعادته يفكر ازاى نطبق الكتاب.. وكانت أول خطوة اني اصنف الأفكار اللي عرضها ل٣ أنواع، النوع الأول هي دروس انا اصلًا بطبقها بسبب قراءتي لكتبه خلال السنين اللي قبلها ومتابعة فيديوهاته.. زي اني ابطل شكوى أو اقلل جدًا متابعة الأخبار السامة أو اني اطلب مساعدة..

النوع التاني كان الدروس اللي بدأت تطبيقها انما لسه بعافر فيها، بمشي على سطر وبسيب سطر، بقع واقف واقوم وانام.. بتخبط فيها..

أما النوع التالت فكان الدروس أو الأفكار اللي بالنسبة لي هيروغليفي، حاجات عجيبة أو غريبة أو بالنسبة لي صعبة، أو عندي مقاومة لها.. زي اني اقضي يوم من غير ما البس ساعة او ابص في الساعة أو زي اني اكلم الشجر!

طبعًا دلوقتي بتسأل ايه موضوع الشجر ده :)

الموضوع ببساطة إن شارما عرض فكرة Recruit a board of directors 

أو بمعنى آخر عين مجلس ادارة، تستشيره لما تكون عندك تحديات أو مشاكل، أو بتفكر ومحتاج تاخد قرار، انما محتاج حد يديك مشورة.. 

الفكرة إن مجلس الإدارة ده مش هيكون من ناس في دوايرك الحالية، لأ، يكون من ناس ناجحة ومتقدمة جدًا، هتتخيل نفسك قاعد معاهم وتعرض عليهم الموضوع اللي شاغلك، وتطلب منهم المشورة، وتبدأ تسمع رأي كل حد فيهم، لحد ما عقلك ينور بردودهم ومشورتهم وتلاقي نفسك جات لك فكرة أو لاقيت الحل أو وصلت للقرار. 

الفكرة إنهم يكونوا ناس عظيمة أو ناجحة فعًلا.. والمفتاح التاني إنك تكون بتتعرض لكتبهم أو فيديوهاتهم أو كتاباتهم أو سيرتهم الذاتية، علشان توصل إن كأنك عارفهم، فلما تيجي تعرض موضوعك تتخيل الشخص ده بخلفيته دي ممكن يرد يقول ايه، والشخص ده بأخلاقه دي هيقترح عليا ايه..

طيب ايه علاقة ده بالشجر؟

لما قريت الدرس ده فكرت على طول في الناس الملهمة جدً بالنسبة لي واللي هيكونوا أعضاء مجلس الإدارة: روبين شارما، ليزنا نيكولز، ستيفن كوفي، نيلسون مانديلا، الأم تيريزا، مارتن لوثر كينج (وبعدها بكام سنة ضميت لهم كمان جيم رون ووين داير). 

المهم اني حددت مين هما أعضاء مجلس الإدارة. وبمعرفتي بنفسي لاقيت إني اتخيل انهم معايا وانا قاعدة بين ٤ حيطان هيكون مش مناسب ليا… فقررت اني اروح جنينة بحبها جدًا في النادي اللي مشتركة فيه ويكون لقائي معاهم هناك. في الجنينة بدأت اتأمل الشجر، وبدأت كل شجرة اتخيلها واحد منهم، وكان فيه قدامهم نخلة اعتبرتها أنا.. وبقيت كل اسبوع ليا طقس في الجنينة، احدد ايه الموضوع أو المشكلة أو القرار، واروح اقعد قدام الشجر واتخيل النخلة بتقول لهم الموضوع وهما واحد واحد بيرد وفقًا لمعرفتي بيه وقراءتي عنه.. 

طبعًا اول كام مرة الموضوع كان مش مثمر.. باروح اقعد ولا الهوا.. بعد كام مرة، بدأت أنظم تنفسي، واغمض عيني واهدي ايقاع مخي.. وهوب لاقيت الشجر بيرد عليا… ولاقيت شارما بيقول لي جربي ده، وكوفي بيقول لي ارجعي اقرأي القصة دي من كتاب، والأم تيريزا بتقولي لي ولا يهمك لأن الموضوع كله من أوله وأخره بينك وبين ربنا.. ومرة ورا مرة، لاقيت حياتي بتتنقل لمستويات اعلى من الفكر، والحضور، والفاعلية بسبب ربنا سبحانه وتعالى اللي هداني اني اقرأ الكتاب ووقفني اني اخلصه ونور لي اني اصنف الدروس واني اسعى اني اطبق درس ورا درس والهمني بموضوع الجنينة والشجر..

وصلت لفين في الكتاب؟

اني طبقت ١٠٠ درس من ال١٠١، على مدار سنين طويلة.. ما استعجلتش نفسي.. وكنت بمشي تاتا تاتا… علشان اتقدم لقدام، بدل ما امشي بسرعة في التطبيق ونفسي يتقطع فاقع او ارجع لورا..

هل كل الدروس كانت زي بتاع مجلس الإدارة؟ لأ، فيه دروس كتير عن ازاي تعيش فعًلا كإنسان..كائن حي..

ليه من أكتر الكتب اللي برشحها؟

١- لأن المحتوى قيم جدًا 

٢- لأن المحتوى متنوع مش بيركز على العيلة بس او الصحة بس او الشغل بس، على جوانب الحياة المختلفة

٣- لأن الكاتب ملهم جدًا واسلوبه سهل ممتنع 

٤- لأن فصول الكتاب قصيرة تناسب الناس اللي ملهاش طولة بال على القراءة

٥- لأن الخط بتاعه والتنسيق مريح للعين حتى للناس اللي في بيحتاجوا نضارة قراءة 

٦- لأن الإنجليزي بتاعه بسيط ويناسب القارئ العادي ويساعده يفك عقدته من القراءة بلغة اجنبية

٧- لأني طبقته واختبرت امكانية تفعيل الدروس اللي فيه 

٨- لأني - بفضل الله - جنيت ثمار تطبيقه في جوانب مختلفة في حياتي 

٩- لأنه متوفر في مصر 

١٠- لأن القيمة اللي بندفعها فيه صغيرة قوي جنب العائد الكبير من قراءته وتطبيقة 

طيب وصلت لفين في الحياة؟

إني بضحك لما بفتكر رد فعل الست اللي سخرت مني.. وقلبي بيتملي دفا لما بتفكر رد فعل صاحبتي، لما اتقابلنا مرة في النادي وروحنا نتمشى في الجنينة وطلبت مني اوريها فين روبين شارما واي شجرة هي ليزا نيكولز.. ولفينا يومها بين الشجر وصبحنا عليهم وضحكنا..

حياتنا فيها ناس مش هتستوعب احنا بنعمل ايه ولا ليه وممكن تسخر بقصد او بدون قصد..

وحياتنا فيها برضه ناس هتفهم احنا بنعمل ايه وهتشجعنا وهتشاركنا..

خلينا زي ما شارما علمني، نتخلص بالتدريج من الناس السامة و/أو المحبطة.. ونستبدلهم بناس إيجابية، داعمة ومشجعة..

من غير ما نشيل في نفسنا أو نتضايق او نغضب..

خلينا زي ما شارما قال في درسه رقم ٦٤ نمارس العفو عن كل من سخر منا..

وخلينا نفتكر إن أول كلمة كانت إقرأ.. فلنقرأ.. ونعمل…. ونُعَلِم..

ولو عايز الكتاب سمعي بالإنجليزي هتلاقيه في اللينك ده (له عنوان مختلف بس نفس المحتوى)

https://www.youtube.com/watch?v=EUvyYU2_ygM

#كتب_غيرت_حياتي_٩

#اكتر_ناس_الهمتني

#كتابة

#قراءة

#تعليم

#تطبيق

#مجتمع

#كن_إنسانًا

#سيب_اثر