١٠ مفاهيم محورية لتحسين العلاقة بين الرجالة والستات

في العيد الكبير سنة ٢٠٠٥ كنت في حالة هيستيرية…

لحظة مرت عليا استوعبت فيها مشاعر الإنسان قبل لحظة الإنتحار..

كان يوم عيد صحيح.. إنما زوجي العزيز وأنا حصلت بينا مناقشة بسبب لحمة الخروف اللي لسه مدبوح..

والمناقشة تحولت إلى خناقة، وفي لحظات لاقتني مش حاسة بنفسي إلا وأنا متجهة ناحية البلكونة وكل اللي في بالي إني هفتح الازاز وارمي نفسي من البلكونة و"ارتاح"..

موقف فهمت بعد حوالي ١٥ سنة منه اني كان عندي Trauma من مشهد دبح الأضحية ولحمة الخروف.. وإن الحالة اللي وصلت لها، من انسان كان بيحضر انه يخرج يوم العيد يقابل العيلة لإنسان في حالة هيستيرية رايح ينط من البلكونة، مش حاجة عادية… انما ممكن تحصل..

يومها قبل ما افتح الازاز مر في عقلي شريط زي فيلم السينما كده لشاب اعرفه نط من البلكونة.. ومع الشريط شفت الألم اللي انتحاره سببه لعيلته كلها من أمه لأخواته لأعمامه وقرايبه.. وفي نفس الشريط شفت ولادي.. وتخيلتهم في ألم.. ولاقتني بدل ما افتح الإزاز بلف واديه ضهري.. 

يومها روحت اتوضيت وصليت وسجدت وبكيت ودعيت وتضرعت لربنا واستعذت بالله من الشيطان الرجيم…

وعلى آخر اليوم كنت هديت شوية.. وبدأت افكر في سؤال "أنت عايزة ايه؟".. سؤال فكرني بفيلم الشقة من حق الزوجة ومحمود عبد العزيز وهو بيسأل مراته:" عايزة ايه يا كريمة؟ …يعني لو طلقتك هتسبيني أنام؟"

يومها كان ده سؤالي.. عايزة ايه يا إيمان علشان اليوم يعدي وننام؟

ويومها كنت مش عارفة، فعلًا.. فإيمان سألتني.. طيب عايزة تتطلقي؟ 

وردي كان لأ.. خالص! عايزة اكون زوجة سعيدة.. بس كده.

يومها وصلت للاجابة دي ونمت. بدون خطط او تفاصيل، اكتفيت بإني عايزة أكون زوجة وسعيدة. 

وتاني يوم اخدتني وروحت مكتبة الديوان لأول مرة. دخلت دورت على كتب عن العلاقات الزوجية.. ولاقيت كتاب جون جراي "الرجال من المريخ والنساء من الزهرة والأطفال من الجنة". اشتريت الكتاب ورجعت وبدأت اقرأ. وقد كان...

بسبب إني محبة للقراءة، ناس  كتير بتبعت تسألني عن ترشيحات لكتب. وردي بيكون على حسب الجانب اللي نفسك تتقدم فيه في الحياة، أو على حسب الهدف من القراءة. تنمية مهارة غير الترفيه غير الثقافة العامة… وردي برضه بيكون لو إنت متزوجة اقرأي الكتاب ده.

السلسلة دي عن كتب غيرت حياتي..للأحسن.. أعظم كتاب هو كتاب الله عز وجل، القرآن الكريم، واللي بإذن الله اختم بيه السلسلة علشان يكون ختامها مسك. وأول كتاب هيكون الكتاب ده، بتاع المريخ والزهرة والجنة. والناس بتسألني عن أشخاص فرقت في حياتي. والرد هو جون جراي بكتابه ده. 

من زوجة كانت رايحة تفتح الإزاز وتنط بعد خناقة زوجية يوم العيد.. لزوجة سعيدة - بفضل الله عز وجل ثم العلم اللي اتعلمته وطبقته من جون جراي.

من الكتاب ده اتعلمت ١٠ مفاهيم محورية للعلاقة بين الرجالة والستات

١- ان الراجل محتاج يدخل الكهف وما تعكننيش عليه وإن كل ما قعد في الكهف كل ما ده دل إنه مضغوط ومحتاج مساحة أكبر.. مش إنك تتقمصي وتلوميه، لأ تتعاطفي معاه إنه مضغوط.  

٢- إنه كراجل بصفة عامة بيحب يكون لوحده وإنت كست بتحبي تكوني مع غيرك (بصفة عامة).

٣- إن طريقة كلامك هو مش بيفهمها، محتاجة تتكلمي دوغري تمامًا.

٤- إن طريقة كلامه غيرك، اللي هو بيقوله هو اللي بيقوله بدون تحميل لكلامه ولا تحوير ولا تدوير.

٥- إنه محتاج يلاقيكي إنت سعيدة علشان يسعدك اكتر. 

٦- إن سعادتك دي دورك ومسؤوليتك إنت وهو يزود الكريمة اللي على الوش بس.

٧- إنه محتاج يسمع منك كلمات تقدير بشكل دوري وعلى أبسط الحاجات اللي بيعملها علشان يتشجع يعمل تاني وأكتر. 

٨- إنه مش عايز يسمع منك نقد. 

٩- إنك محتاجة تتسمعي ومحتاجة تطلبي منه إنه ما يقدمش حلول لو كل هدفك انك تبرطمي بس.

١٠- إنه غيرك، بيركز على شيء واحد وانت بتعملي ١٦ حاجة في نفس الوقت، هو مش أقل ولا أضعف، هو مختلف، هو مريخي وانت زهروية..

وحاجات تانية كتير اتعلمتها من الكتاب.. النقطة المحورية كانت انه في الكهف معناه إنه مضغوط!! مش معناها إنه مش بيحبني زي الأول أو زهقان مني أو كل الخزعبلات اللي كانت مالية دماغي… وكمان فكرة إن كل حد فينا بيتكلم لغة مختلفة، فمحتاجين نترجم كل حد فينا بيقول ايه علشان نفهم بعض ويكون بينا سكن ومودة ورحمة.

بعد الكتاب أنا هديت.. وبدأت اسعى إني أطبق الكتاب.. أجزاء منه واحدة واحدة..

وكانت دي نقطة البداية..

البداية اني اتحرك تجاه هدفي إن أكون زوجة سعيدة،

البداية إني اشوف أطفالي قطعة من الجنة وإني افهم إنهم جزء من اثري وجزء مهم مش عائق او مصدر تشتيت،

البداية إني ارجع للقراءة تاني بعد توقف لمدة ١٥ سنة تقريبًا،

البداية إنى اقرأ كتب بالإنجليزي واسعى إني أفهم فعلًا وماتحججش بإني من مدرسة فرنساوي، 

البداية إني افهم إن الكتب ممكن تغير حياة الناس، 

البداية إني اقرأ كتب في مجال التنمية الذاتية بعد ما كانت كل قراءاتي روايات والغاز، 

البداية إني افهم زوجي واقدره فعلًا،

البداية إني احس بالامتنان لأمي انها حببتني في القراءة من وأنا طفلة،

البداية إني احس بالامتنان لأبويا الله يرحمه إنه صمم إني وأنا في إعدادي اروح المركز الثقافي البريطاني واشترك في كورسات انجليزي علشان احسن اللغة لأنه كان شايف انها مفتاح مهم جدًا في الحياة،

البداية إني أقع في حب مكتبة الديوان وابقى بزورها بشكل دوري 

البداية إني ابقى بشتري كتب واعمل ميزانية مفتوحة لها 

البداية إني اتصرف كمنتصر مش ضحية..

البداية كانت مع..

بلكونة وفكرة انتحار… ولحمة خروف يوم العيد.. وشريط مر قدامي وشكل ولادي وهما زعلانين… 

ورف في مكتبة وسطور لجون جراي.. ومريخ وزهرة وجنة…وقد كان

كتاب وكاتب ربنا عز وجل غير ما بي بيهم بعد ما غيرت ما بنفسي..

ربنا يومها، على السجادة ومع البكاء والسجود والقرب.. ولأنه قريب مجيب، سمعني.. وهداني لأنا عايزة ايه وهداني لكتاب جون جراي.. وسبب الأسباب..

ربنا.. الله.. القريب المجيب.. 

كل كتاب وكا كاتب سبب..

خلينا فاكرين رب الأسباب ومسببها.. 

اللي سامعنا وقريب.. وندعي يدلنا هو لأشخاص تفرق في حياتنا..

وكتب تنور عقولنا..

اللينك ده فيه ملخص سماعي لكتاب المريخ والزهرة لجون جراي باللغة العربية.

 https://www.youtube.com/watch?v=o60NzTy7zN0

 الكتاب مفيد مش بس للأزواج، الكتاب مفيد لكل راجل او شاب علشان يفهم أهل الزهرة ويعرف يتعامل معاهم ازاي

ومفيد لكل ست او بنت علشان تفهم اهل المريخ وتتعامل معاهم ازاي.. سواء أب او زوج أو أخ أو زميل عمل… 

ياللا نتعلم لغة بعض..

ياللا نقرأ كتب تغير حياتنا للأحسن..

ياللا نطبق الكتب دي في حياتنا..

#كتب_غيرت_حياتي_١

#كتابة

#قراءة

#تعليم

#تطبيق

#مجتمع

#كن_إنسانًا

#سيب_اثر