سلاسل التعلق ومفاتيح السجن

في يوم جمعة وفي ساعة صبحية كنت قاعدة في البلكونة مع زوجي العزيز..

بعد ما خصلنا فطار، وكان بيشرب فنجان قهوة..

واتكلمنا عن هدوء الشارع يوم الجمعة وازاي بقى دوشة رهيبة باقي ايام الأسبوع..

واتكلمنا عن جمال منظر النيل من البلكونة.. مع الشارع وهو هادي والمدرسة اللي قدامنا اجازة..

والحديث اخدنا لحد ما لاقتني بقول لجوزي بصوت قاطع وحاسم وجاد

"لو فاكر اني هكمل في البيت ده لحد اخر العمر تبقي غلطان. أنا عايزة أعزل. مش عايزة افضل هنا في البيت ده."

زوجي استغرب، لأن الحوار كان ودي وهادي. 

النبرة بتاعت صوتي خلته ينتبه، اني بتكلم جد فعلًا.

ورده كان اني لو ناوية اعزل فعلًا وبجد، يبقى نعزل دلوقتي. على طول.

العزال ممكن يبدو لبعضكم   موضوع عادي، سطحي، عملي..

حد بيقرر يغير مكان سكنه، بيلم اشياؤه وبياخدها وينقلها في مكان تاني، ويعيش.

ده الظاهر او يمكن العملي او يمكن اللي بيمر بيه بعض الأشخاص.

انما بالنسبة لي الموضوع كان متشعب.

عزال يعني بيغير مكان عشت فيه عشرين سنة. كل ركن فيه ذكريات مع عيلتي، مع اصحابي، مع قرايبي..

يعني مكان كل اموري فيه متنظمة، اللي بتساعدني في البيت ومواعيدها وبطلب ايه منين، والبواب عارف يجيب كام رغيف ويوم ايه والساعة كام..

وبالرغم من ان كل اموري كانت في سيستم واحد ومريحني، الا اني كنت عارفة اني عايزة اعزل. 

علشان ابعد عن التلوث السمعي اللي المدرسة اللي قدامنا عاملاه وبالذات بعد ما بقت بتشتغل فترتين..

بس كل مرة بنفتح الموضوع زوجي وانا بنشيل الهم، ونقعد نعد في ايجابيات البيت ونلغي الفكرة.

يومها في البلكونة زوجي طلب مني اما اعزل علي طول او اقفل الموضوع نهائيًا.

وانا كنت مترددة…

مش بس علشان ذكرياتي.. ولا السيستم.

كنت مرهقة من الفكرة، من كم المجهود المطلوب، من اول لم كل حاجتي لبيع العفش لشراء عفش جديد لنقل وترتيب البيت الجديد، لإني اعمل نظام جديد والاقي واحدة تيجي تساعدني، وانظم جدولي تاني بعد العزال علشان انزل شغلي واشوف اهلي واقابل صحابي اللي كلهم قريب من البيت القديم. 

كنت مترددة بسبب المجهود المطلوب… كنت كسلانة..

وكنت خايفة. خايفة مارتحش في المكان الجديد او ما اتبسطش، 

كنت جبانة..

كنت عايزة اعزل..

لأني شفت ناس بعد ما ولادها كبروا عايشين في بيوت كبيرة عليهم..

وبيقضوا حياتهم ينضفوا ويلمعوا في البيوت.. 

اللي مفيش حد بيدخلها..

وحجم البيوت ما بقاش مناسب لحالتهم الصحية ولا المادية.

انما متمسكين بالبيوت لأنه البيت بالنسبة لهم فيه كل ذكرايتهم.

والفكرة دي بالذات كانت اكتر حاجة مخلياني عايزة اعزل.

لاقتني لو عشت في البيت القديم هفضل اسيرة الماضي..

بشوف اوضة ابني اللي سافر فاضية وقلبي يتعصر..

اشوف كرسي السفرة بتاعه فاضي ابكي..

اتعلمت من اللي اكبر مني ان فيه ناس لما بتفضل في نفس البيت بعد ظروفها ما تتغير بتعيش أسيرة الماضي..

فقررت اني اعزل علشان ابقى بفكر في المستقبل.. بيت جديد بظروف جديدة بأحداث جديدة..

انما كنت مترددة وشايلة الهم..

زوجي طلب مني سرعة تأكيد القرار.. لأنه هيبدأ في التنفيذ..

ولاقتني بكلم المعالجة النفسية بتاعتي وبطلب منها تساعدني في ترتيب افكاري، والتعامل مع مشاعر الحيرة والقلق..

وبعد جلسة معاها، وبفضل الله اخدت قرار العزال..

وبلغت زوجي بالتحرك..

ولاقتني بعد ما شعري شاب بفرز والم واحط في شنط وكراتين..

ولاقتني ببيع سفرتي والصالون واوض النوم..

كله.. الا مكتبتي ودولابي.. الباقي كله بعته..

علشان ابدأ مرحلة جديدة، بعد ما ولادي كبروا واستقلوا بحياتهم

وانا بفكر جديد وتوجه جديد ناحية المستقبل..

لاقتني بعد ما شعري شاب محتاسة في الفرش..

وبسأل امي جهزتي ٤ بنات ازاي..؟!

وبطلب مساعدة من اخواتي واصحابي وقرايبي في الفرش..

لاقتني محتاسة في الأشياء اليومية.. المكوجي والسوبر ماركت والجزار.. 

وبطلب مساعدة من اصحابي وجيراني ومن الأمن اللي في مكان سكني الجديد..

لاقيت التفاصيل اليومية بتستهلكني..

ولاقتني ببكي من الضغط العصبي..

وبتصل بالكوتش العزيزة نهى ايهاب تساعدني في التعامل مع الضغط العصبي..

ولاقتني بتساءل عن الناس اللي بتغير بلد.. عملوها ازاي؟

وانا في بلدي وفي نفس المحافظة وبس تغيير المنطقة السكنية عمل فيا كده..

وانا بتكلم نفس اللغة وعندي عيلة بتساعدني ومحتاسة كده..

وتعبانة كده..

لاقيت التجربة اصعب بكتير من زمان..

زمان وانا في العشرينات عزلت مرتين… 

ما كنتش بعاني كده..

لاقتني بعد ما شعري شاب الموضوع اصعب بكتير..

وفضلت شهور اجرب نظام واعدل واقيم واغير واجود..

لحد ما مر ١٨ شهر.. سنة ونص..

ولاقتني في يوم قاعدة في الجنينة بتاعت بيتي الجديد وبشكر ربنا…

انه اداني الشجاعة اني اعزل، والمقدرة اني انقل في بيت اصغر بجنينة، واني اتخلص من تعلقي بالبيت القديم وبالنيل وبالبلكونة. و انه رزقني بزوج يسمع ويتفهم احتياجاتي، وبناس كتير تساعدني، ورزقني الإمكانيات اني انقل لبيت تاني…وبالقوة والمثابرة اني اواصل ل١٨ شهر لحد ما استقر..

ولاقتني بكتب لنفسي جواب شكر..

على اني عبرت عن نفسي بوضوح وحزم وجدية يوم البلكونة.. اني قلت لجوزي اني "عايزة أعزل"..

اني الضوضاء السمعية بقت تعباني جدًا،

واني محتاجة انقل في مكان جديد واهدى ويكون اصغر..

لاقتني بكتب لي جواب شكر اني كنت متواصلة مع نفسي، وعارفة أنا عايزة ايه..

مش الناس بتعمل ايه.. واقلدهم ازاي..

لاقتني بشكر نفسي ان ناس كتير بعد ما شعرها شاب بتنقل في بيوت اكبر وتقعد تشتكي من البيوت الفاضية والعيال المشغولة..

ولاقتني بشكر نفسي اني نقلت في بيت مناسب للمرحلة ولرغبتي في الهدوء والبساطة..

لاقتني بشكر نفسي ان فيه ناس مكسلة تغير وعايشة تعبانة وبتصحى تشتكي وتنام تشتكي بدل ما تغير اللي تاعبها..

ولاقتني سامعة نفسي في المستقبل بتشكرني.. اني حطيت وقت ومجهود وتفكير وتخطيط وفلوس وتنفيذ علشان نعيش حياة جودتها اعلى ومناسبة ليا اكتر بالذات بعد ما شعري شاب..

ايه اكبر درس اتعلمته من العزال.. ؟

درس التخلي عن التعلق بكل صوره وأشكاله..

التعلق سجن بنتحبس فيه ونعيش نكرر الأيام واحنا فاكرين اننا عايشين..

ومانعين نفسنا من أننا نعيش بجد وإننا نجرب ونجدد ونختار اللي فعلًا ملائم لنا في الحاضر مش اللي كان ملائم او اللي باقي الناس بتقول ان ده الملائم..

بعد ما خصلت عزال وفرش البيت بشكل بسيط ويبعث السلام اللي عايزاهم حاليًا.. لاقتني مطلوب مني ابدأ رحلة جديدة.. الطلب كان صدمة بالنسبة لي.. استقبلته بالدموع.. و..

لا، اكمل لكم المرة الجاية… تابعوني، بعد ما شاب

#بعد_ما_شاب_٢١

#العمر

#التعلم

#النمو

#السعي

#التغيير

#الشجاعة

#الجرأة

#الحماس

#الصحة