وصفة سحرية للتغلب على الخوف من مكانك وببلاش

من كام سنة كنت في معسكر شركتي منظماه في وادي النطرون..

وكعادتي صحيت بدري ونزلت اجري الساعة خامسة صباحًا..

واحدة من المشتركات شافتني من بلكونة اوضتها..

وعلى الفطار سألتني "ايمان.. انتي مش بتخافي تنزلي لوحدك والدنيا ضلمة كده..؟"

ابتسمت وسألتها "مين قال اني بنزل لوحدي..؟"

ردت قال لي "شفتك الصبح من البلكونة وكنتي لوحدك.."

ضحكت وقلت لها "نزلت مع ربنا.."

هي استغربت وبصت لي وهي منتظرة مني شرح..

قلت لها ربنا قال "وأنا معه اذا ذكرني.."

فأنا بذكر ربنا وأنا نازلة.. وبذكر ربنا خلال الجري.. وبحس فعلًا ان ربنا معايا..

وبلاقي نفسي مليانة سلام وسكينة واتطمئنان..

سمعت الكلام وبان عليها التعجب مع شوية استغراب وشوية اعجاب..

حرف المرة دي حرف الميم..

ميم معية…

ايه احلى من كده؟ ايه اكرم من كده؟ 

ايه يطمن اكتر من كده؟ ايه فضل اوسع من كده؟

ايه عطاء اكبر من كده..؟

ساعات بقعد اسرح في المعنى ده..

وازاي ربنا قريب.. لطيف.. 

اول ما نذكره بس يكون معانا..

مش محتاجين حجز مسبق ولا مبلغ كبير..

ولا واسطة علشان يهتم بالحالة..

ولا دور يجي علينا..

بس ذكر ويكون معانا..

ايه ده؟

عملت مرة وقفة مع المعية..

واتسكفت من نفسي..

لاقتني بستشعر المعية في المنع والعسر بس..

كل ما يكون عندي ضائقة اذكر ربنا..

كل ما احس بخوف اذكر ربنا..

كل ما احتاج مساعدة اذكر ربنا..

وفكرت ليه بذكر مع العسر بس..

ليه مذكرش ربنا في حالة اليسر كمان.. 

في وقت الرخاء..

اذكر ربنا علشان اشكره.. علشان احمده..

اذكر ربنا علشان اعبر عن امتناني.. 

اذكر ربنا علشان اعبر عن تعجبي لازاي حلها من عنده بالشكل ده؟

اذكر ربنا علشان اقول له اللهم لك الحمد كما ينبغي لجلال وجهك وعظيم سطانك..

اذكر ربنا علشان اشكره على الصبر عليا.. كل الأيام اللي كنت فيها في غفلة.. والأيام اللي فيها الفت النعم..

اذكر ربنا علشان احس بالأنس… بالود.. باللطف.. بالرحمة.. بالسلام..

ميم معية… 

فيه حكمة بحبها جدًا بتقول

"من كان الله معه فمن عليه، ومن كان عليه فمن معه، من وجد الله فماذا فقد، ومن فقد الله فماذا وجد؟"

النهارده، في يوم عيد ميلادي ال ٤٨، بفكرني تاني بالحكمة دي.. وحرف الميم.. ذكر ..معية.. انس، لطف، ود، سلام، سكينة..

اللهم لك الحمد..

ميم معية.. معية الله جل علاه

#من_الألف_للياء_٢٤_ميم

#مقالة_أسبوعية

#حروف

#كلمات

#قراءة

#استماع

#تواصل_فكري

#تفاعل_عاطفي

#رقي_انساني

#سعادة_مصر

#كن_إنسانًا

#إيمان_رفعت