هل جعان لحرف الثه زي ناس كتيرغيرك؟

الف به ته ثه.. 

وصلنا لحرف الثاء.. او الثه..

حرف تقيل حبيتين.. تلاقي الأطفال ساعات مش عارفة تنطقه.. او منهم اللي نقول عليه الحق ده بيسهسه.. 

حرف مش موجود في كل اللغات.. موجود في لغتنا..اللغة العربية..

حرف واحنا صغيرين اتعملنا ان ثاء ثعبان.. او ثعلب.. 

وبقى مرتبط عندنا بحاجة تقيلة.. مخيفة..

خلينا نعمل وقفة معاه.. وناخد كلمة بتبدأ بحرف الثه وتغير علاقتنا وتعاملنا مع الحرف ده..

كلمتنا هي ثناء.. بمعنى مدح..

كلمة وأنا صغيرة مش فاكرة اني اتعرضت لها كتير.. 

فاكرة اني اتعرضت للنقد ملايين المرات… في البيت وفي المدرسة..

فاكرة اني مرة كنت في مجلس علم.. وان الشيخ قال اننا ما نثنيش على حد.. علشان ما يتغرش..

وفاكرة اني لما عرفت عن لغات الحب الخمسة اتفاجئت لما لاقيت ان كلمات الثناء والمديح واحدة من لغات الحب..

يومها فكرت في الناس اللي لغة الحب بالنسبة لهم هي الثناء.. عايشين ازاي لو الناس بتعاملهم بالنقد او من غير ما تمدحهم علشان ما يتغروش..؟

فكرت في كلمات الثناء ولاقيت اني مش عايشة بيها.. عايشة بكلمات النقد..

لو لاقيت خدمة دون المستوى اشتكي.. 

لو لاقيت الأكل مش تمام في المطعم اشتكي للمدير..

ولو لاقيت الحمام مش نضيف اشتكي للدادة في النادي..

بعد كتاب لغات الحب فكرت اغير الموجة..

من موجة النقد لموجة الحب.. بكلمات الثناء..

بدأت اركز بالعكس..

الاقي الأكل حلو اقول للجرسون يشكر الطباخ ويقول له تسلم ايديه..

الاقي الأوردر وصل حلو، ابعت رسالة شكر واقول لهم تسلم ايديكم الأوردر هايل..

الاقي حد موهوب في حاجة اقول له ما شاء الله على الموهبة، صوتك حلو جدًا…

الاقي الحمام نضيف اقول للدادة تسلم ايديكي الحمام فُلة..

ولاقيت..

لاقيت الناس جعانة لكلمات المديح…

لاقيت ابتسامات من القلب على وشوش ناس لما شكرتها..

لاقيت دموع تأثر في عيون بتلمع لما اثنيت عليهم..

ولاقيت دعوات من القلب بحرارة لناس بسيطة لما قلت لها تسلم ايديكي..

لاقيت ناس بتقول لي "ياااه… قد ايه كلامك فرق معايا وملاني طاقة.."

او "يااااه.. قد ايه بيفرق معايا كلام التقدير.."

لاقيت الناس عطشانة حب باللغة دي…

ولاقيتهم بيتملوا طاقة من مجرد كلام بسيط عفوي تلقائي من القلب..

فكرت في حرف الثاء.. من ثعبان سام اتعلمت الحرف من خلال صورته وانا طفلة..

لثناء من القلب اتعلمت الكلمة واثرها وأنا في التلاتينات..

وفكرت قد ايه ممكن كلمات الثناء تغير حياة الناس حوالينا..

لما نختار كلام من القلب انما نسدد بيه فعلًا…

مش مديح او اطراء فارغ..

لا ثناء على حاجة حقيقية.. وقتها الثناء بيوصل لقلبهم وبيكون من قلبنا..

في زمنَّا.. زمن الطلاق والإنفصال والنزاعات والتنمر..

قد ايه لغة الحب دي ممكن تفرق..

زوجة ممكن كلمات ثناء من جوزها تفرق وتملاها طاقة..

زوج كلمات ثناء من مراته على سعيه ممكن تصبره..

ولاد كلمات ثناء لأهلهم ممكن تهون عليهم تعبهم لولادهم..

مدير كلمات ثناء منه لموظف تخليه يشتغل الضعف..

انسان كلمات ثناء منه لإنسان غيره تخليه يحس انه متشاف.. ومتقدر.. 

مين منا ما يتمناش يكون متقدر من غيره… وبالذات من احب الناس له..؟

ثه ثناء..

الف انسان..بيثني على انسان علشان ينشر حب بين افراد عيلته الكبيرة.. عيلة الإنسانية..

#من_الألف_للياء_٤_ثاء

#مقالة_اسبوعية

#حروف

#كلمات

#قراءة

#استماع

#تواصل_فكري

#تفاعل_عاطفي

#رقي_انساني

#سعادة_مصر

#كن_إنسانًا

#إيمان_رفعت