مشهد الممثلة اللي ابكاني بحرقة..

الفترة اللي فاتت قررت ارجع اتفرج على مسلسلات عربي.. من سن الأربعين كنت بقيت أفضَّل القراءة أو الأعمال اليدوية في وقت راحتي، أو التمشية في الطبيعة أو ركوب العجلة.. أو اني اروح السينما أو متحف أو معرض فني.. إنما مش مسلسلات.. بس مع العزال وضغط المرحلة الإنتقالية قررت ارجع اشوف كده اخبار المسلسلات ايه من باب الترفيه.. 

مسلسل منهم كان "بالحجم العائلي".. في مشهد منه لاقتني ببكي مع البطلة.. وهي بتتكلم مع يحيى الفخراني وقد ايه هي كانت محتاجة له وانه لما اتشغل عنها بعيلته هي حسيت انها وحيدة… وكانت محتاجة له..

دموعي معاها خلتني الأول افكر فيها كممثلة.. وازاي بمنتهى البساطة قدرت توصل مشاعر حقيقية.. ودموعي اخدتني لورا اكتر من عشر سنين.. وقتها كنت حاسة زيها.. اني وحيدة، ضعيفة.. قليلة الحيلة..

وقتها كان عندي التهاب في الأحبال الصوتية.. والدكتور منعني من الكلام.. كتبت لفاروق ابني في يوم على ورقة الطلبات الناقصة في البيت ورقم السوبر ماركت علشان يتصل بيه.. اتصل والراجل اللي بيرد قفل في وشه وقاله بلاش لعب عيال ومعاكسة.. فاروق رجع كلمه تاني وقال له مامتي ممنوع تتكلم لأنها عيانة واحنا محتاجين الحاجات دي.. ورجع الراجل قفل في وشه وصمم ان فاروق بيعاكس.. بالرغم من ان ده السوبر ماركت اللي كنت بتعامل معاه وقتها بقى لي تسع سنين.. وحتى لما عرف العنوان من فاروق رفض يصدق.. 

يومها حسيت بغضب على حزن علي استياء.. وبعت لجيهان اختي رسالة اطلب منها تطلب هي الطلبات علشان السوبر ماركت مش مصدق فاروق.. ويومها ردت عليا وقال لي "تحت أمرك يا قمر.. اطلبي كل اللي انت عايزاه أي وقت.." يومها طلبت لي الحاجة.. ويومها حسيت بطبطبة.. وحسيت بمعنى جبر الخواطر.. يومها حسيت بامتنان لربنا انه رزقني بأخت كبيرة حنينة.. 

يوم المسلسل مع دموعي لاقتني بفكر في جيهان اختي الكبيرة.. وفي مواقف كتييير لها في تعبي ومرضي وشدتي وحزني وفي فرحي ونجاحي وسعادتي.. شفتها سند في كل موقف.. وفكرت قد ايه نعمة لا تقدر بتمن الأخ أو الأخت السند.. اللي بيشوف اخوه حتة منه، امتداد له.. 

فكرت في حديث الرسول عليه الصلاة والسلام:"مَثَلُ المُؤْمِنِينَ في تَوَادِّهِمْ وتَرَاحُمِهِمْ وتَعَاطُفِهِمْ، مَثَلُ الجَسَدِ إذا اشْتَكَى مِنْهُ عُضْوٌ تَدَاعَى له سَائِرُ الجَسَدِ بالسَّهَرِ والحُمَّى".. وفكرت في جيهان.. وبكيت على الممثلة اللي ورتني حال ناس كتير.. اهلهم ماتوا ومفتقدين قوي حد من دمهم يهتم بيهم..

وفكرت كمان في ناس تانية، عايشة وبتصلي وبتصوم وبتروح عمرة وبتتصدق.. وفي نفس الوقت قاسية مع اقرب الناس لها.. تطرد اختها من بيتها او تاخد ورث اخواتها او تقاطع قرايبها.. وفكرت وفكرت..

لاقتني بشوف المسلسل بعين تانية.. مش انه وسيلة ترفيه.. انما وسيلة تفكير… وسيلة الواحد يشوف من خلالها مواقفه ومواقفه الناس التانية.. ويسترجع من خلاله مشاعر ولحظات عاشها.. لحظات فرقت في علاقات..

بالنسبة لي اغلى ورث ابويا سابهولي هو اخواتي.. وأعظم هدية امي قدمتهالي هي تربيتها لينا اننا نحب بعض واننا نعيش حديث الرسول عليه الصلاة والسلام.. اننا جسد واحد..

أما بقى عن جيهان اختي.. فهي شمس حياتي.. اللي مجرد التفكير فيها بيخلي دموعي تسيل من كم الامتنان لربنا انها اختي.. نِعم الأخت…

ياللا نتقي الله في علاقاتنا..

ياللا نعيش حديث الرسول عليه الصلاة والسلام في حياتنا..

ياللا نربي ولادنا عليه..

ياللا نخزي الشيطان اللي كل امله انه يخرب عائلاتنا..

ياللا نرتقي بالإسلام من طقوس قدام الناس لخلق وحال.. قدام رب الناس..

ياللا نخلق لحظات مع الناس، لحظات طيبة.. توصلنا لحياة طيبة فوق الأرض وتحت الأرض..

#علاقات_في_لحظات

#مشاعر

#ذكريات

#الخير_موجود

#اروي_غيرك

#تفاءلوا