لغز المكان الواسع وازاي ممكن يخنقنا

في أكتوبر سنة ٢٠١٥ تميت سن الأربعين.. ومع السن ده عملت وقفة كبيرة من نفسي.. 

وقفة محورية منهم سميتها "مسيرة تخلي".. 

وقتها كنت ساكنة في بيت بقى لي فيه ١٤ سنة.. 

وكنت حاسة اني بقيت مخنوقة.. مش لأن البيت ضيق.. بالعكس.. لأن البيت واسع..

تيجي ازاي دي؟ 

تيجي إن بسبب البيت الواسع كنت لما بشتري حاجة عندي مكان احطها فيها..

وبقيت مع السنين للأسف مشغولة بالتكاثر.. تكاثر اللبس، الجزم، الشنط، الاكسسوار..تكاثر ادوات المطبخ.. تكاثر الديكور..

ومع الوقت بقيت لما افتح دولابي احس اني مخنوقة.. ادخل مطبخي الواسع احس اني مخنوقة..

المهم اني من حبي للقراءة ومع كتاب كنت بقراه ومش فاكرة اسمه، الكاتب تطرق الى موضوع الminimalise 

بدأت اتفرج على فيديوهات واشوف الناس اللي عندها مقتنيات قليلة عايشة ازاي وحاسة بإيه..

وبدأت افكر اني عايزة ابقى minimalist وعملت وقفة مع الفكرة…

وقررت اني اخدها بالتدريج.. مش فجأة..

بدل ما اقوم يوم اقول أنا عايزة اتخلص من كل حاجة..

لأ، اقوم كل يوم واقول عايزة اتخلص النهارده من حاجة..

وقتها قعدت افكر في بيتي وبيوت ناس اكبر مني سنًا..

وازاي لما كبروا عزلوا في بيوت اوسع.. وبقوا يستخدموا اوضة ولا اتنين بس من البيت الجديد الواسع..

ويشتكوا من مصاريف البيت الكبير، والولاد اللي استقلوا وبقوا قليل لما بيجوا يعمروا البيت..

فكرت في النماذج دي، وفي نموذج ال minimalist وقررت اني عايزة اعزل في بيت اصغر… مش اكبر.. 

واني اقلل مقتنياتي واحدة بواحدة لحد يوم لما اعزل.. ويومها اخد معايا بس اللي أنا عايزاه..اللي أنا هحس معه بالحرية، بالسلام، بالسعادة وبالبهجة.. هحس معاه بالرضا.. هحس معه بالغناء.. بالإستغناء..

المرة دي حرفنا هو حرف الغين.. 

غين.. غناء.. استغناء..

قبل الأربعين كانت فكرتي عن الإنسان الغني هو الإنسان اللي عنده بيت كبير، وعربية جديدة ومقتنيات كتير.. وبيسافر كتير.. كله يا كتير، يا جديد، يا كبير..

بعد الأربعين نظرتي للحياة مع القراءة والتجارب ومشاريع خدمة المجتمع والخبرات اللي اكتسبتها فيها، نظرتي وافكاري اتغيروا.. 

بقيت شايفة الغنى في الإستغناء..

الاستغناء عن شقة كبيرة بقت واسعة عليا أنا وجوزي…

الإستغناء عن مقتنيات كتير قوي مش بستعملها بقى لي سنين وغيري ممكن يستفيد بيها..

الإستغناء عن أفكار وموروثات وتقاليد قديمة مش بتاعتي ومش عجباني ومش بتضيف لحياتي او حياة غيري أي قيمة..

خد معاك الأفكار اللي لازم البس كل مناسبة لبس جديد ولازم كل سفرية تكون في فندق سبع نجوم.. ولازم اتغدى في المكان الفلاني والا ياي الناس تقول ايه..

مسيرة تخلي.. بدأتها من سنين وبجني ثمارها كإنسان من يوم ما بدأتها..

احساس الخنقة والندم وتأنيب الضمير اللي كان متملك مني بسبب الإسراف والشراء والتكاثر اتبدل..

وبقيت عايشة وانا حاسة اني خفيفة.. حرة.. غنية..

غين غناء.. بالاستغناء..

كل مرة حرف.. بخاطب بيه الإنسان.. اللي كرمه ربنا وجعله خليفة له..

وحرف ورا حرف بتمنى أوقظ نفسي و أوقظ الإنسان ونتشجع احنا الاتنين واحنا مستوعبين ان مفيش علينا الا السعي

وان السعي ده سوف يرى..

#من_الألف_للياء_١٩_غين

#مقالة_أسبوعية

#حروف

#كلمات

#قراءة

#استماع

#تواصل_فكري

#تفاعل_عاطفي

#رقي_انساني

#سعادة_مصر

#كن_إنسانًا

#إيمان_رفعت