كوبايه الشاي والاكتشاف الخطير

من كام يوم كنت بتفرج على فيلم عائلي..

وفي مشهد فيه المدرس نادى على تلميذ وطلب منه يقرأ حاجة من الكتاب..

الولد رد وقال ان الكتاب مش معاه..

فالاستاذ طلب منه يمد ايده علشان يضربه..

الطفل رد بصوت مرعوب وقال
"والله يا استاذ انا حافظ كل الدروس.. حافظها عن ظهر قلب.."

كلمة
"ظهر قلب"
استوقفتني..

كلمتنا المرة دي بحرف الظاء.. والظهر.. ظهر القلب..

لما اتفرجت على المشهد ووقفت مع الكلمة فكرت فينا..

في مخ كل حد فينا.. في عاداتنا وسلوكياتنا.. اللي مخنا بقى حافظها عن ظهر قلب..

مثلًا الصبح ندوس على البراد علشان نصب كوباية الشاي..

نرش كم كبير من الملح والفلفل على البيض العيون..

نقف نشتري كوباية قهوة من البنزينة مهما سعرها زاد..

نرجع البيت مرهقين نفتح التلاجة وناكل على الواقف..

نقعد على الكنبة نمسك الريموت ونشغل التلفزيون..

كل دي حاجات مخنا بقى حافظها عن ظهر قلب..

واحنا مع كم المشتتات والضغوطات اللي في الحياة

بقينا عايشين ومش عايشين..

عايشين وبنتصرف باللي جسمنا بيعمله وفقًا للإشارات اللي مخنا بيبعتها واللي مسجلها في الخلايا العصبية للمخ..

وبالتالي ايه؟ وبالتالي كل يوم ما هو الا تكرار لليوم اللي قلبه وفي النهاية تقريبًا احنا مش عايشين..

بعد الفيلم قررت اني الأيام اللي بعدها اراقب كده ايه اللي أنا حافظاه عن ظهر قلب..

المهم نزلت من البيت وفي طريقي للشغل فكرت اني هقف الأول اشرب قهوة في مكاني المفضل وبعدين اروح الشغل..

وبعدين سألتني "انت عايزة قهوة دلوقتي؟" لاقيت الرد لأ.. أنا النهارده عايزة اروح الشغل على طول..

اليوم اللي بعده كنت شغالة من مكتبي في البيت.. وانا بفطر لاقتني بشغل البراد، سألتني انت عايزة فعلًا تشربي شاي مع الفطار النهارده؟ دلوقتي؟.. لاقيت الرد لأ..

ونقيس على كده بقى حاجات كتير على مدار اليوم…

عايزة تشغلي التكييف؟ عايزة تأكلي بيض النهارده؟ عايزة تلبسي البنطلون ده؟

من يوم الفيلم وأنا كل شوية اقفشني واسألني يا ترى اللي بنعمله ده لاننا حافظينه عن ظهر قلب ولا لأننا فعلًا عايزين نعمله..

طبعًا الحياة بحضور وتواصل مع النفس حمادة تاني خالص..

مش عن ظهر قلب.. لا.. حياة من القلب.. بدون ظهر العقل اللي بيحجب القلب ويغطي عليه..

كلمتنا النهارده عن ظهر القلب.. عن انسان عايش بقلب.. بيسعى من قلبه وبحضور.. انسان فاهم مش حافظ..

#من_الألف_للياء_١٧_ظاء

#مقالة_اسبوعية

#حروف

#كلمات

#قراءة

#استماع

#تواصل_فكري

#تفاعل_عاطفي

#رقي_انساني

#سعادة_مصر

#كن_إنسانًا

#إيمان_رفعت